1 Westíora nete, kimisha hora yantanpake, moa oranti iketian, Pedro betan Juan Dios rabiti xobonko kabékona iki.

2 Jain iká iki westíora joni chanto jaskábi pikota. Netetiibi, Metsáshaman akin janekana Dios rabiti xobo xepotiain bexon yasánkanai, jain jikiaibo jato koríki yokánon ixon.

3 Jatian Pedro betan Juan jikiai oinxonra, ja jonin jato koríki yokata iki.

4 Jaskáketian rabéxonbi, ja joni kikinhakin beiskana iki, jainxon Pedron yoia iki: —Noa oinwe —akin.

5 Jaskáa jato kikinhakin oinna iki, jawetanishoko menikanti shinanxon.

6 Jaskákenbi Pedron yoia iki: —Eara koríkioma iki itan orooma iki, ikaxbi ea jayatara en mia meniai, ja Nazarethainoa Jesucriston janenko, ¡Wenitax niwé! —akin.

7 Jaskáaxon mekayao mekenman metsontaanan nichinhinabaina, jatianbi ja rabé taebi itan jawen tae patonkobo moa jakona iki.

8 Jainoaxa weniti choronhinakainax, moa nii peokoota iki. Jaskatax moa janbix niax jato betanbi Dios rabiti xobo meran jikii, Dios rabii choron choronkaina iki.

9 Jatian moa nixon, Dios rabiaitian oinnaxa jonibo,

10 kikinni ratékana iki, ja jaton onanna joni jaskara winóketian. Ja iká iki, ja metsáshaman janeya Dios rabiti xobo xepotiain yakáxon, jato koríki yokápachoai joni.

11 Ja chanto iwanaxbi benxoatoninra, Pedro betan Juan potayamaa iki; jaskara oinnax ikonbiresi ratetax, jatíbi jonibo jatoki ishtobeirankana iki ja Salomónman xobo chibó akin akanainko ikanaitian.

12 Jaskákanaitian oinxon, Pedron jato yoia iki: “¿Jawekopiki mato ratetai, *Israelita jonibo? ¿Jawekopiki non atipana koshinbi iamaxon jakonhira ixon, nato joni non nimaa keskáakin maton shinannai?

13 Ja non reken papashokobo, Abraham, Isaac itan Jacobnin Diossenra jawen yonoti Jesús kikin joni imaa iki, jara yatanxon maton joni koshibo meniketian, Pilaton jaweakashamainbi mato keenyamaa iki.

14 Ja ochaoma itan jakon joni pikotinin keenyamataanan, ja retemis joni pikonon ixonres maton yokata iki.

15 Jaskáaxonra ja jati Ibo maton retea iki, ikaxbi Diossen jirimaa iki, jara non kikinhakin onanke.

16 Ja maton oinna, itan maton onanna joni jakon baneta riki, Jesús ikonhaxes iká. Jaskáakin Jesús ikonhaxa kikinni benxoke. Jariki ja maton oinna.

17 Nokon kaibobo, ramara en onanke, ja maton koshiboyaxonbi Jesús reteyantanara, onanyamaxon maton aká iki.

18 Ikaxbi jaskáaxonresa Diossen senenhaa iki, ja *Cristo mawáti jawen *profetabo meranxon yoini.

19 Jaskara iken, maton jakonma shinanbo akonkin jenetaanan, Dioski banéribikanwe, maton ochabo mato soaxonon, jatianra non Ibon maton shinanbo tantimati iki,

20 ja moabi Cristo mato raanxonti shinanna ixon, raanxontaanan, ja iki Jesús.

21 Ramara Jesús naikanbipari iti jake, ja moatian jawen jakon *profetabo meranxon yoini keskáakin Diossen jatíbi jawékibo jakonhakai kaman.

22 Moiséssenra yoia iki: ‘Non Ibo Diossenra mato xaranmea, westíora maton rarebo ea keská *profetaribi imanoxiki. Jan yoiai joibora maton senenhaxonti jake.

23 Jatian jaweratobaonki jawen joi senenhaxonyamai, jabora moa Diossen jonima iti iki’, akin.

24 Rama netebaon iti jawékibora, Samuelninpari yoikin peoa iki. Jatian jaribira wetsa profetabaonribi yoikana iki.

25 Mato riki ja *profetabaon chiní bakebo, itan ja maton reken papashokobo betan ja senenhabekonti joi Diossen aní nokoabo. Diossenra Abraham yoia iki: ‘Min chiní rarebobo kopíra, jatíbi jonibo en jato jakon imanoxiki’, akin.

26 Jatian Diossenra jawen Bake jirimaxon, rekénpari matoiba raana iki, mato jakonhanon ixon, itan westioraxonbo jakonma jawékibo maton akonkin jenenon ixon”, akin jato aká iki.