1 Jaskáketian pichika itin iká ángelnin, jawen trompeta xoon aka iki. Jaskáaketian en oinna iki, ja naikanmeax maiori westíora wishtin paketa. Jára ja ani maikini meran iká pozo kepenti llave menia iki.

2 Jatianra ja xanken meran iká pozo kepena iki. Jainoaxa koin jokona iki, ani horno meranoax ikai keskati. Jatian ja pozo meranoax koin jokonaton, bari betan niwe mapoara, yamé baneta iki.

3 Jatian ja koin meranoaxa chanpobo jokonax, maiori bea iki. Jabora ninbo keska tekamisti koshiabo imaa iki.

4 Jabora yoia iki, ja main iká xobibo, jiwi maxobo, niibo ramiakantima. Ja jawena itiakin jaton betonkoain jato Diossen onantiakamabores ramiatira yoia iki.

5 Ikaxbi jonibo retetima jato yoia iki. Jaskáyamakinra pichika oxe jato chexakaamati yoia iki. Ja chexakaati iká iki, nibon tekaa keská moka.

6 Ja netebaonra jonibaon mawátibo benakinbi nokoyamanoxikanai, mawákashoraibira iamanoxikanai.

7 Ja chanpobo iká iki, jameax reteanannoxon kabayo axeakana keskábo. Jaton maponko iká iki, westíora oro maiti keská maiabo. Jaton bemanan iká iki, jonin bemanan jisábo.

8 Jaton boo iká iki, ainbaon boo keska. Jaton xetabo iká iki, leónman xeta keska,

9 jaton yorabo iká iki, reteanani jan panakaati yami keskatonin panakaatabo. Jatian jaton pechibo iká iki, noyaitian ja reteanantiain bokin, kabayobaon carrobo ninia riri ikai keskati xoo iki.

10 Jaton jinabo iká iki, ninbo tsispin keskábo, jaton jinanko iká iki, pichika oxe jonibo jato masábires tenemati koshi mokayabo.

11 Ja chanpobaon koshi iká iki, ja kini meranoa ángel; jawen jane iki, *hebreo join aká Abadón, jatian griego join iki Apolión iki iká.* Abadón betan Apolión iki iká riki: Keyomis iki iká.

12 Jatianra ja rekena jakonmabires jawéki moa winota iki. Ikaxbira rabeti itipari maxkáke.

13 Jainxon ja sokota itin iká ángelnin, jawen trompeta xoon aribaa iki. Jaskáketian en ninkata iki, ja Dios bebon iká jainxon Dios yoina menoxonti orobires akana, ja chosko machan ikainoax westíora joi pikotai.

14 Jatian ja yoyo ikaitonra, ja sokota itin iká, jawen trompeta tsomaya ángel yoia iki: “Ja Éufrates paro kexa nexakaata chosko Ángelbo chorowe”, akin.

15 Jatianra ja chosko ángelbo choroa iki; ja main jakana kimisha parte iká senen jonibo jato keyonon ixon. Jabora moa benxokakana iká iki; ja hora, ja nete, ja oxe, itan ja baritia jato keyoti.

16 Jatianra en ninkata iki, ja icha kabáyonin peyakaa sontárobo rabé pacha millón.

17 Jaskarara en oinna iki, kabayobo namá keska meran; jatian jan peyakaabo jan xopanametabo iká iki, chii keska joshin, nai keska yankon, azufre keska panshin. Ja kabayobaon mapobo iká iki, león mapo keskábo; jatian jaton kexakanmeaxbo jokona iki, chii, koin itan azufre.

18 Jatian neskara jakonmabires chii, koin, azufre, ja kabayobaon kexakameax jokonatonra, kimisha parte iká senen jonibo keyoa iki.

19 Ja kabayobaon koshi mokara iká iki, jaton kexain, itan jaton jinanko. Jaton jinabo iká iki rono keskabo, jatian jaton mapobaonra natéxon jato ramiaka iki.

20 Ikaxbi ja jakonmabires jawékinin mawáyamai texea jonibaonra, ja moatian apaokani jakonma jawékiboribi akin jeneyamakana iki. Jainxon ja yoshinbo, itan jatonbi ja rabiti oro akana, koríki akana, *bronce akana, makan akana, jiwi akana, rabikin jeneyamakana iki. Ja jawékibo iki oinyamai, ninkáyamai itan niamaibo.

21 Jainoax retemisibo, yobétibo, wetsabo betanbires yorantibo akí itan yometsoiboribi jeneyamakana iki.