APOCALIPSIS.
5.
Jainxon en oinribia iki, ja ani yakatinin yakataton jawen mekayao mekenman kirika xei tsomaa. Ja kirika iká iki okenbekonbi wisháya, itan jan taxnantinin kikin kanchis akin xepoa. 
Jainxon en oinna iki, westíora atipana koshia ángel koshin yokati neskatai: “¿Tsoamein iti iki nato kirika chopenoxon jan xepoabo ras ati atipana?” iki. 
Ikaxbi naikanbobi nin mainbobi, itan ja mai naman ikábobi tsoabi yama iká iki, ja kirika xepoabo jan chopexon yoyo axon onanti atipana. 
Jatianra ea ikonbiresi winia iki, jan kirika xei chopeanan yoyo axon onanti atipana tsoa jonibi yamaketian. 
Ikaxbi jain yakata westíora *ancianonin ea yoia iki: “Moa winiamawe; ja judáinoa jonibo xaranmea león keska, ja David ipaoniton rareboninra moa janharesa iki. Janresa ati atipanke ja kirika xei chopekin, itan ja kanchis jan xepoa kepenkin”, akin. 
Jainxon en oinna iki, ja chosko jiria jawékibo napo jainoax ja ani yakati bebon, itan ja ancianobo napo, westíora *Cordero chankata retekana keská. Jara kanchis machanya, itan kanchis beroya iká iki; ja iki ja kanchis Diossen Shinan jatíbi mainko raana yoii iká. 
Janra ja ani yakatinin yakata nokobainxon, jawen mekayao mekenman iká kirika xei bia iki. 
Jatian ja kirika xei biketianra, ja chosko jiria jawékibo betanbi ja rabé chonka chosko ancianobo, ja *Cordero bebon chirankookana iki. Jatíbi jabora arpayabobires ikana iki, itan ja *incienso bochóya oro copayabobires. Ja iki Diossen jonibaon oración. 
Jainoaxa nato bená bewá neskati bewakana iki: “Miabichores iki atixonbi ja kirika xei bixon, jan xepoabo ras ati atipana, mia mawáni kopí; jatian ja min jimi chikotatonra marokin min bia iki, meskó axéya jonibo, meskó joiabo, meskó ani jemameabo, itan meskó jonibo, Diossenabo inon ixon. 
Jabora apobo itan ja non Diossen tee ati *sacerdotebo min jato imaa iki. Jabaonra nato main ikana jonibo jato ikinnoxiki”, iki. 
Japekao en oinxon ninkata iki, ja jiria jawékibo, itan ja *ancianobaon ani yakati kateax, icha ángelbo yoyo ikanai. Jabora ikana iki, tson topontimati kikinbires icha. 
Jabora kikinbires koshin bewai neskákana iki: “¡Ja mawáni *Cordero riki, itixbi jatíbi atipana koshia iti, jatíbi jawékia iti, onan shinanya iti, itan koshi shinanya iti, jaki jakonhakin shinanti, ani, itan rabiti!” iki ikanai. 
Jainxonra en ninkata iki, jatíbi ja Diossen joniaka jawékibo, naikanmeax, mainmeax, itan mai meranoa, jainoax aniparomea jawékibo, neskati bewakanai: “¡Ja ani yakatinin yakata betan ja *Cordero, ibanon já non rabiti, jaki jakonhakin shinanti, ja riki ani, itan atipana koshia. Jara jatíbitian jaskara inóxiki!” iki. 
Ja chosko jiria jawékibora neskati saa ikana iki: “¡Jaskara ibanon!” iki. Jatian ja rabé chonka chosko ancianobaon chirankooxon rabikana iki.