APOCALIPSIS.
18.
Neskata pekáo naikanmeax wetsa ángel joaitian en oinna iki. Jara koshi shinanya iká iki. Jawen penekanra mai tenaa iki. 
Jara koshin yoyo ika iki: “¡Moara keyóke. Moara keyóke, ja ani jema Babilonia! ¡Jara moa yoshinbaon jati banéke, jainoaxibi jatíbi meskó jakonma yoshinbo jain jonékanti. Jainoax jatíbi kerás pechia yoinabaon naa, itan kerás ani yoinaboyabi, ja omisti jawékibo jain ikantiribi banéke!” iki. 
Jatíbiainoa jonibora wetsabo betanbires yorantibo akí; ja vino xeax paena keskábo ikana iki, nato netemea apobaonra jabé yorankana iki. Jainoax jawékinin maroai nato mainmea jonibora, koríkiakana iki, jan jato jawéki bixona. 
Jainoax jakiribi naikanmeax yoyo ikai en ninkata iki: “Nokon jonibo, ja jemameax pikókanwe, jato betanbi mato ochayamanon, itan ja jakonmabires jawéki jatoki joái, matokiribi pakénaketian. 
Naikan kamanbira bebonhira jaton ocha akábo nokóke. Jatian Diossenra jaton jakonma jawéki akábo onanke. 
Ja wetsabo jan aní keskaribiakin, jaribi ashokokanwe, jan jato aká bebonbires jaribi akanwe; ja wetsabo paeya xeati meskoxona iní bebonbires já meskoxonshokokanwe. 
Ja rabíkin jakonma jawékibo aboa kopí, onitsapimaxon, winimakanwe. Jara ikai jawen shinan meran neskati: ‘Nenora ea yakáke, westíora apo ainbo keská; eara benomaatama iki, itan jawetianbira ea onitsapiamanoxiki’, iki. 
Jaskara kopíra, westíora netebicho jatoki jakonmabires jawéki pakénoxiki: mawáti, winiti itan jawékiatinin iti, jainxon chiikanribi jato menonoxiki, ja jatíbi atipana koshia Ibo Diossen, jato castigana ikax”, ikibo. 
Ja nato netemea apobo ja ainbo betan yorannax jakonmain paketabora; winiananbibo yoyo inoxikanai, ja ainbo menota koin chankata oinnax. 
Jaskáakin castigana oinnaxa, raketi ochóbiribi charotax neskánoxikanai: “¡Jawe ireskiaipanon, jawe ireskiai; ja ani jema Babilonia jatíbi jawékia, ishtonbiresa miki castigo pakéke!” iki. 
Ja jaton jawékinin maroai nato netemea jonibora ja jema kopi, winiananbi yoyo inoxikanai, moa jabaon jaton jawékibo marokin bixonti yamaketian. 
Jabo iki: Oro, koríki, metsáshaman makanbo, jainoax perlabo, lino chopa jakonshamanbo, joshin ami pokoa chexeya seda chopabo. Jainoax jatíbi meskó ininti jiwibo; ja jiwi akana jakonshoko jawékibo, ani yoina xeta akana jawékibo; jainoax *bronce akanabo, hierro akábo, jainoax mármol akanabo, 
jainoax chitari, inin jawékibo; ja iki *incienso, *mirra, itan wetsa inintiboribi. Jainoax vino, aceite, jakon harina, trigo, jainoax jawéki jan boti yoinabo, ovejabo, kabayobo, carrobo, itan ja iboaxon yonokanaibobi, ja iki jonibo. 
Jatian ja jema yoii neskánoxikanai: “¡Ja mia jan keenkatitai bimioma riki moa mia; ja min jakon jawékibo itan min icha jawékibora, jatíbitian moa yamanoxiki!” iki ika. 
Ja jawékibo ja jeman boax marotaanan koríkiakanabora, castiganketian oinnax, raketi ochóres charotax winiananbi yoyo iki, 
neskánoxikanai: “¡Jawe ireskiaipanon, ja ani jemamea jonibo! Lino chopa jakonshaman, itan metsá joshin bexnan chopayabo saweax, metsáshamani oron, perlanin jainoax metsáshaman makanbaonribi raokaatabo ikanai. 
¡Ishtonbiresa jaton icha jawékibo keyóke!” iki. Jatíbi ja wapóromea *capitánboyabi jato betan boaibaon, jainoax marinerobo, itan jatíbi ja aniparon teetaibaonribi ochóxonbi oinkana iki. 
Jatian ja jema menotai koin oinnax, neskati saí ikana iki: “¿Jamenyaa iki, wetsa jema nato ani jema betan senenti atipana?” iki. 
Jaskataxa winiananbi sion iki, chii potobo mapokookana iki, jainoxa neskati saí ikana iki: “¡Jawe ireskiaipanon, ja ani jema! Ja jayata jawékibaonra; ja aniparon niai wapóro ibobo koríkiakana iki. ¡Jabora ishtonbires keyóke!” iki. 
Rarokanwe naikan ikanabo, nato jema jaskata kopí; mato Diossen jonibo, mato jan raanabo, jainoax *profetaboribi, Diossenra jato castiganxon atibi keskáakin mato ake ikibo. 
Jatian westíora ángel atipana koshiaton, westíora jan reneti ani makan keská wakexon aniparonko potaax neskata iki: “Jaskáribiira mia ani Babilonia jema keyóti jake, jatianra jawetianbi mia oinyamanoxikanai. 
Jawetianbira jakiribi ja jemanxon arpa ten akanaibobi, flauta, itan trompeta akanaibobi non ninkátima iki. Jainoax meskó jawékinin teetai joniboribi yamati iki, itan reneti makanman renekanaiboribi non ninkátima iki. 
Jainra jawetianbi moa westíora lanparinbi joéyamanoxiki. Jainxon ja wanoti fiesta akanai jatsanboribi moa ninkáyamanoxikanai. Ja jain iká jatíbinin maroaibora ikana iki, jatíbi nato nete jan koshia jonibo, itan jatíbiainoa jonibo min yobekanbo jato parana”, iki. 
Ja jemameara, *profetabo, Diossen jonibo, itan jatíbi nato netenxon retekana jonibaon jimi merakana iki.