1 KORIN
Pepa Paulo iŋgere muŋga panzi kalo-tawana tamâta simo Korin lawea
Korin nde lawea ŋalae toŋge lâ Grik tâno. Paulo muŋga imo Korin lawea itula pâri ara panzi (Pâri Tamâta 18:1-18), aku muli, zo toŋge imo Efesus lawea (16:5-8), ande iŋgere ŋgua ŋine ilâ panzi kalo-tawana tamâta simo Korin. Kinzi muŋga siŋgere ŋgua pa Paulo sikasoŋa i ŋana pakâeŋa ne mâsi wa kâŋa-nuŋa ne tukuŋa wa (7:1, 8:1-13), kala Paulo itu iporo ŋgua taulo panzi. Aku isama tu malia pinde ipâŋga lâ Korin ŋgu ŋgininzi, kala simo sipawa ŋgua (1:10-12, 5:1-2). Mine nde Paulo ilo kura tia iporo ŋgua kaika pinde panzi ŋana simo ilonzi kalonzi taitu ku tininzi mwasa nâ panzi tininzi pinde.
1
1 Naŋa Paulo, Yesu Kirisi ne pâri-tamâta naŋa. Muŋgani Maro Kindeni ipatea naŋa ku isarawana tu ma akai wurâta ŋine kâ. Naŋa amo taitu kuku ninda-nambwe Sostenes, 2 kala aŋgere ŋgua lâ pepa ŋine tini imâ pa miki Maro Kindeni ne ŋgu kamo Korin lawea. Nanayoni Maro Kindeni ipatea miki pa i tamwata, ku iveta miki kapaipa kuku Yesu Kirisi. Mine nde miki kapâŋga kamo ŋgu sapâŋa. Iveta mine nâ pa miki katavanzi tamâta simo lawea lawea, kinzi ŋinde uru siwâŋgi pa nenda Maro Ŋalae Yesu Kirisi, ina kinzi nenzi Maro Ŋalae wa kinda nenda Maro Ŋalae wa. 3 Tamânda Maro Kindeni ku Maro Ŋalae Yesu Kirisi rua nenzi wisi-wisi wa wisi-pisi wa imâ pami.
Paulo kawa ndaŋge ilâ pa Maro Kindeni
4 Nanayoni Yesu Kirisi ikai Maro Kindeni ne wisi-wisi ŋinde imâ pami, kala iveta kie ara ndo pami. Mine nde naŋa kawâŋgu ndaŋge ilâ pa naneŋgu Maro Kindeni ŋana miki kâ ikura zo zo. 5-6 Naŋa kawâŋgu ndaŋge mine pa Maro Kindeni ŋana duvi ŋine kâ; maka muŋga katula ŋgua pami ŋana Yesu Kirisi kâ, aku ŋgua ŋinde nde ikeno kaika lâ ilomi kalomi. Miki kapaipa kuku Kirisi lâ. Mine nde Maro Kindeni kelekele arara rârâni ilami lâ, ŋgua arara kie-kie wa ilo-kalo arara kie-kie wa. 7 Mao nâ, Koroani Sapâŋa ne wisi-ara kie-kie rârâni nde ikeno pami lâ, kala miki kandolo ŋana sâ toŋge tia. Ande kala zo ŋine miki uru kao tinimi pa Maro Kindeni tu ma itula nenda Maro Ŋalae Yesu Kirisi ipâŋga nia yo. 8 Maro Ŋalae Yesu Kirisi ma isukami ŋana kamandi kaika lee, ikura lâ i tamwata ne zo ŋana itaulo imâ kilo kâ. Mine kala lâ zo ŋalae ŋinde, ande miki ma kamo ilomi mbâra-mbâra ndo lâ i nao, nemi soki toŋge tia. 9 Ŋana tu Maro Kindeni uru iveta ikura ne ŋgua pâŋa rârâni, aku i tamwata muŋgani isarawami ŋana kapaipa kuku i Natu Yesu Kirisi kâ, ina nenda Maro Ŋalae.
Kinzi Korin ŋgu nde sipwa pwapwataki
10 Niŋgu-nambwe wukale, naŋa akai nenda Maro Ŋalae Yesu Kirisi ndamwa ku ano kaika pami tu miki rârâni ma kamo ilomi kalomi taitu nâ. Naŋa tiniŋgu pwâka tu miki ma kapwa pwapwataki ku kamo piti piti. Ara ŋana miki ma kamo lâ ŋgu taitu nâ tava ilomi kalomi taitu nâ. 11 Opopo, niŋgu-nambwe wukale, tamâta pinde lâ Kloe ne ŋgu nde sitapâri pa naŋa siporo tu pambitâŋa nde uru ikeno lâ miki ŋginimi. 12 Naŋa aporo ŋana ŋgua kaŋa-kaŋa ŋinde miki taitu-taitu uru kaporo. Miki pinde uru kaporo tu, “Naŋa apono muli pa Paulo”, aŋga pinde nde kaporo tu, “Naŋa apono muli pa Apolos”, aŋga pinde nde kaporo tu, “Naŋa apono muli pa Petero”, aŋga pinde nde kaporo tu, “Naŋa apono muli pa Kirisi”.
13 Mana mana, a? Kinda takura tu tapu Kirisi pwapwataki mine tia ndo! Tiambo naŋa Paulo atâra lâ kâi popole tini ku amâte ŋana avila miki kâ, a? Tia ndo! Tiambo miki muŋga kakai lââ-liliŋa lâ naŋa Paulo ŋâŋgu, a? Tia ndo! 14 Naŋa kawâŋgu ndaŋge pa Maro Kindeni, ŋana tu naŋa ŋandai alilinzi tamâta rârâ lâ nemi ŋgu ŋinde ŋga. Naŋa alilinzi Krispus ku Gaius rua simbonzi rua nâ. 15 Mine nde tamâta toŋge ikura tu iporo mine, “Maka kakai lââ-liliŋa lâ Paulo ŋa”, ande tia ndo. 16 (O, naŋa kaloŋgu kapa. Mao nâ, naŋa kala alilinzi Setepanas tavanzi tamâta pinde simo i ne luma tona. Aku tiambo naŋa alilinzi tamâta pinde tona, tâku tia tâku. Ŋinde naŋa asama sondo tia.) 17 Ŋana tu Kirisi ŋandai isupwa naŋa amâ ŋana alilinzi tamâta kâ. Isupwana amâ ŋana atula pâri ara pwataki kâ. Andeta naŋa ŋandai atula pâri ara pwataki tava ŋgua mona-mona, itogo kinzi ilo-kalo tamâta uru siveta mine. Naŋa tiniŋgu pwâka tu naneŋgu ŋgua mona-mona ma isowe tamâta ilonzi. Ambo naŋa ma aveta mine, ande Kirisi ne mateŋa lâ kâi popole tini ma ipâŋga itogo kelekele kaa nâ.
Kirisi nde Maro Kindeni ne walo kaika
18 Mao nâ, tamâta pinde kalonzi tawana tia kala soka nzâla ŋinde ilâ pa mateŋa kâ, aku kinzi ŋinde uru ilonzi tu ŋgua ŋana Kirisi ne mateŋa lâ kâi popole tini kâ ande ŋgua kapa-kapa nâ. Aŋga kinda tamâta pinde, ande Maro Kindeni ikai kinda piti lâ kondoma ilo, aku kinda ŋine tasama tu ŋgua ŋinde ŋana kâi popole kâ nde itula Maro Kindeni ne walo kaika kilala pwataki. 19 Maro Kindeni kawa ŋgua ikeno lâ pepa tini mine tu,
“Naŋa ma azavaru kinzi ilo-kalo tamâta nenzi ilo-kalo. Naŋa ma aveta tâno tamâta nenzi ilo-kalo arara ŋinde ipâŋga kelekele kaa nâ.”
20 Ayo, mine nde mana mana ŋananzi tâno ŋine ne ilo-kalo tamâta, a? Aŋga mana mana ŋananzi pananâŋa tamâta ŋana Mose ne ŋgua tukuŋa kâ, a? Aŋga mana mana ŋananzi tamâta ŋinde uru sipawa ŋgua kaika, a? Maro Kindeni itula pwataki lâ tu tâno ŋine ne ilo-kalo rârâni nde ilo-kalo kapa-kapa nâ. 21 Mine nde Maro Kindeni, ina ilo-kalo ara warika, ipatea tu kinda tâno tamâta warakânda nenda ilo-kalo ma ikura tu ivila kinda ŋana tasama i kilala kâ, ande tia. I tamwata ipatea nzâla toŋge ŋana ikainzi tamâta piti lâ kondoma ilo, aku maka uru kaporo katula ŋgua pwataki ŋana nzâlani ndaina. Kinzi tâno tamâta situ ŋgua ŋinde nde kapa-kapa. Aŋga tamâta ea kinzi sikai ŋgua ŋinde kaika ku kalonzi tawana Maro Kindeni, ande i ikainzi ŋinde piti lâ kondoma ilo. 22 Kinzi Juda tamâta ilonzi ŋalae tu ma simora mâsi kaika pinde, aŋga kinzi tamâta lâ tinikoa ŋgu nde simakâsa ŋana sikai ilo-kalo ara kâ; 23 aŋga maka nde katula ŋgua ŋana Kirisi ne mateŋa lâ kâi popole tini kâ. Kinzi Juda tamâta tininzi pwâka ndo ŋana siloŋo ŋgua ŋinde kâ, aŋga kinzi tamâta lâ tinikoa ŋgu nde situ ŋgua ŋinde nde kapa-kapa nâ. 24 Andeta muŋgani Maro Kindeni isarawa kinda Juda tamâta pinde wa kinda tamâta pinde lâ tinikoa ŋgu wa, aku kinda ŋine tasama mine; Maro Kindeni ne kaika wa ilo-kalo ara wa nde ipâŋga kanaŋo lâ Kirisi tini. 25 Mao nâ, kinzi tâno tamâta situ Maro Kindeni ne ilo-kalo nde kapa-kapa nâ. Taitu i ne ilo-kalo ndainani nâ nde ipole tamâta nenzi ilo-kalo ndo lâ. Aku kinzi situ Maro Kindeni ne kaika nde ŋalae koŋa tia. Taitu i ne walo kaika ndainani nâ nde ŋalae tina, ipole tamâta nenzi kaika ndo lâ.
26 Niŋgu-nambwe wukale, ara ŋana miki ma kalomi ŋgere sondo ŋana zo muŋgâŋa kâ. Naŋa aporo ŋana zo ŋinde Maro Kindeni isarawami tu kapâŋga kalo-tawana tamâta tia yo yo. Lâ zo ŋinde, ande miki pinde nâ kamo katogonzi ilo-kalo tamâta lâ tâno tamâta naonzi. Miki pinde nâ nde kamo tava nemi kaika, aŋga miki pinde nâ nde kamo tamâta ŋalaŋala. Miki ŋinde kambwaŋemi nde kiri-mwata nâ. 27 Andeta Maro Kindeni itu iveta maŋeti panzi ilo-kalo tamâta wa kinzi tamâta ŋalaŋala wa. Mine nde ipatea kinda tu tapono muli pa i, kinda ŋine tamo tatogonzi tamâta kapa-kapa kaa nâ lâ tâno tamâta naonzi. 28 Mao nâ, Maro Kindeni itu izavaru kelekele ndia kinzi tâno tamâta situ nde kelekele ŋalae. Mine nde ipatea kinda sugorai tamâta, kinda ŋine ŋânda tia kala tamo tatogo kina mine lâ tâno tamâta naonzi. 29 Mine nde tamâta toŋge ikura tu ipasuka i tamwata tini lâ Maro Kindeni nao, ande tia. 30 Maro Kindeni tamwata ne pateâŋa ikeno mine, kala io miki kapasipa lâ taitu kuku Yesu Kirisi. Aku Kirisi itula Maro Kindeni ne ilo-kalo ara ŋinde kilala pwataki pa kinda lâ. Yesu Kirisi ikai nzâla piti pa kinda tu ma tapâŋga ilonda mbâra-mbâra lâ Maro Kindeni nao, aku ina iveta kinda tapâŋga Maro Kindeni ne ŋgu sapâŋa tona. Aku inani kala ikai kinda piti lâ kondoma ilo tona. 31 Mine nde Maro Kindeni ilo tu kinda ma tapono muli pa i kawa ŋgua ŋine ikeno lâ pepa tini mine tu, “Tamâta ea itu isuka tamâta toŋge ŋa kâki, ande i ma isuka Maro Ŋalae simbo nâ ŋa kâki.”