4
Kinzi sio Petero ku Yoane rua lâ luma sakamao ilo
1 Petero ku Yoane rua siporo ŋgua panzi tamâta yo, ŋineŋga kinzi patarawâŋa tamâta simâ sipâŋga panzi, sitavanzi luma sapâŋa ne sambara nenzi koipu wa kinzi Sadyusi ŋgu tamâta pinde wa.
2 Kinzi wisinzi nâna, ŋana tu Petero ku Yoane rua situ Yesu parina panzi tamâta tu imandi sânda lâ mateŋa nianzi imo via kilo, aku ne mandiŋa ŋinde ikai nzâla piti panzi mateŋa tamâta tu ma muli simandi simo vianzi kilo. 3 Ŋineŋga tamâta ŋalaŋala ŋinde sikai kinzi rua ku sipanzi kaika sionzi lâ luma sakamao ilo. Kari ŋga indue lala lâ, aku kinzi situ rua ma simo luma ŋinde ilo lâ mbo. 4 Andeta tamâta rârâ siloŋo Petero ne ŋgua ŋinde, aku kalonzi tawana. Mine kala kinzi kalo-tawana tamâta kambwaŋenzi nde ipâŋga ikura 5,000 mine.
Petero itula ŋgua lâ kinzi tamâta ŋalaŋala naonzi
5 Mbwale kilo, ŋineŋga kinzi tamâta ŋalaŋala sitavanzi ŋgu nenzi katonâŋa wa kinzi pananâŋa tamâta ŋana ŋgua tukuŋa kâ, kinzi rârâni sipasau lâ Jerusalem lawea. 6 Aku patarawâŋa tamâta nenzi tamâta ŋalae, i ŋa tu Anas, ande imo kunzi, tavanzi Kaiafas, aŋga Yoane nuwaka, aŋga Arisande, aŋga patarawâŋa tamâta ŋalae ne ŋgu ndoni. 7 Sionzi Petero ku Yoane rua simandi lâ tamâta ŋalaŋala ŋinde naonzi, ŋineŋga sikasoŋanzi tu, “Ayo, miki kakai walo kaika ndia wa kapanea ŋoa ndia kala kaveta vetâŋa ŋine.”
8 Ŋineŋga Koroani Sapâŋa ipaŋando Petero, aku Petero iporo taulo panzi tu, “Miki Isrel ŋgu nenda tamâta mbâna-mbâna wa nenda katonâŋa tamâta wa, 9 ambo miki katu kakasoŋa maka rua ŋana nola kavila tamâta toŋge kie sakamao ku kaveta ipâŋga ara mâsi mana, ande ara. 10 Miki tamâta ŋalaŋala wa miki Isrel ŋgu ndoni ŋai, kaloŋo ku kasama. Ŋana Yesu Kirisi Nasarete tamwata ŋa kâ, ande tamâta ŋine kie ara lâ, kala ŋine imandi naomi. Miki muŋga kapu Yesu lâ kâi popole tini imâte, andeta ŋineŋga Maro Kindeni ipaŋo imandi lâ mateŋa nianzi imo via kilo. 11 Yesu nde
‘Mira ŋine miki tamâta ŋana kapa luma kâ katu nde sakamao kala katambira lâ, ande mirani ndaina ipâŋga mira ara ŋana isuka luma ŋgaŋe kaika kâ.’
12 Tamâta toŋge ma ikura tu ikai kinda piti lâ kondoma ilo ku via mao ilua kinda, ande tia. Maro Kindeni ipatea Yesu simbo mai nâ ŋana ivila kinda mine, kala takai via mao lâ i simbo nâ ŋa.” Petero iporo ŋgua mine.
13 Kinzi tamâta ŋalaŋala simoranzi Petero ku Yoane rua siruru tia ku simandi situla ŋgua pwataki, aku sisama tu kinzi rua muŋga ŋandai sipono pepa ŋga, kala simo tamâta kaa nâ. Mine kala kinzi tamâta ŋalaŋala ilonzi rârâ. Taitu sisama tu kinzi rua muŋga simo kuku Yesu. 14 Aku simora tamâta muŋga kie sakamao ŋinde imandi kunzi rua, ku i kie ara kilo. Mine kala sikura tu sileleanzi rua ŋana nenzi vetâŋa kâ, ande tia. 15 Tia ku sikainzi rua ku sionzi lâ nia ŋgaŋe toŋge. Ŋineŋga tamâta ŋalaŋala sipasau ku siporo ŋgua lâ warakanzi ŋgininzi tu, 16 “Ayo, kinda ma taveta mana panzi tamâta rua ŋine. Kinzi rua siveta mâsi kaika toŋge, aku tamâta rârâni simo Jerusalem nde simora ku sisama lâ. Mine nde kinda ma takura ŋana taporo tu, ‘Siveta mâsi ŋinde tia’, ande ma tia. 17 Opopo, ambo ŋgua ŋana mâsi kaika ŋinde ma ilâ isala nia pinde, ande ŋinde ma ara tia. Mine kala kinda ma tatu kaika panzi rua tu ma sipanea Yesu ŋa ku situla ŋgua panzi tamâta kilo ndimo.”
18 Ŋineŋga sisarâwa panzi rua tu simâ, aku situ kaika panzi tu, “Miki ma kapanea Yesu ŋa ku kapanananzi tamâta kilo ndimo.” 19 Andeta Petero ku Yoane rua situ ŋgua lâ kawanzi mine tu, “Ayo, miki warakami kalomi ŋgere sondo ŋga. Ambo maka ma kapu mulima pa Maro Kindeni ne ŋgua ku koka miki nemi ŋgua muli, ande ŋinde ma soki ndo lâ Maro Kindeni nao. 20 Mine kala maka rua kakura ŋana kawama buu, ande tia. Maka ma katula ŋgua pwataki ŋana vetâŋa rârâni maka kamora wa kaloŋo ŋinde.”
21 Siporo mine lâ, ŋineŋga tamâta ŋalaŋala siporo ŋgua pasuleŋa panzi rua lee, ku siyautenzi rua siyâti silâ. Kinzi ŋandai sisânda nzâla toŋge kulu ŋana nâna silanzi rua kâ, ŋana tu tamâta rârâni sipanea Maro Kindeni ŋa ŋana mâsi kaika ŋinde. 22 Mao nâ, mâsi ŋinde nde mâsi ŋalae, ŋana tu tamâta ŋinde imo tava kie sakamao ikura zo luandondo, ipole mbwera tamâta rua (40) lâ.
Kinzi kalo-tawana tamâta sino pa Maro Ŋalae tu kaika ilanzi ŋana situla ŋgua kâ
23 Kinzi tamâta ŋalaŋala siyautenzi Petero ku Yoane rua silâ lâ, ŋineŋga kinzi rua sitaulo silâ kunzi nenzi ŋgu. Aku sitapâri panzi ŋana ŋgua rârâni kinzi patarawâŋa tamâta ŋalaŋala wa katonâŋa siporo panzi ŋinde. 24 Kinzi kalo-tawana tamâta siloŋo ŋgua ŋine lâ, ŋineŋga rârâni ilonzi ilâ taitu, aku kawanzi kâki sikai noŋa pa Maro Kindeni mine tu, “Maro Ŋalae, koipu ŋalae kaika kala noko, nia ndoyo nokoni kuveta samba wa tâno wa tâi wa lââ wa, tavanzi kelekele rârâni simo nia ŋinde ndoni. 25 Muŋga Koroani Sapâŋa io ŋgua lâ timbuma Daviti kawa, ina noko ne kuleŋa tamâta, kala Daviti iporo tu,
‘Mana mana ŋana kinzi tinikoa ŋgu, a? Ŋana sâ kâ ŋga sipa ŋgua ŋana siveta paraŋa kâ, a? Ŋana sâ kâ ŋga siveta ŋgua pâŋa kaa kaa mine, a? 26 Kinzi ŋgu ŋinde nenzi koipu ŋalaŋala siluku ŋana paraŋa kâ. Kinzi nenzi tamâta mbâna-mbâna
‘sipasau tu siroto nzâla ŋana siŋgoloa paraŋa kuku Maro Kindeni tava Koipu Ŋalae ŋinde i muŋga ipatea.’
27 Mao kanaŋo, Maro Ŋalae, muŋga koipu ŋalae Herot kuku Pontius Pilata rua sipasau lâ lawea ŋine kunzi tinikoa tamâta wa kinzi Isrel tamâta wa, aku sipa ŋgua tu ma sipu noko ne wurâta tamâta sapâŋa Yesu, ina nanayoni noko tamwata kupatea lâ. 28 Aku siveta vetâŋa ŋinde rârâni, ikura muŋga noko ne kaika wa ne ilo-kalo kupatea tu ma ipâŋga mine. 29 Mine nde Maro Ŋalae, kala ŋine noko ne wurâta tamâta maka kano pano tu ma kalo ŋgere ŋana ŋgua rârâni kinzi tamâta ŋalaŋala siporo ŋinde, aku kuvilama ŋana karuru tia, kamandi kaika ku katula noko kawa ŋgua pwataki. 30 Aku kano pano tu kusuŋa mbau ilâ panzi pukoŋa tamâta ŋana kuveta tininzi mbalaunzi ara kilo, aku kuveta mâsi kaika pinde lâ noko ne wurâta tamâta sapâŋa Yesu ŋa.” Kinzi kalo-tawana tamâta sikai noŋa mine.
31 Sikai noŋa marumbu lâ, ŋineŋga luma kala sipasau simo ilo ŋinde nde iririŋo. Aku Koroani Sapâŋa ipipi lâ kinzi taitu-taitu ilonzi, kala kinzi rârâni situla Maro Kindeni ne ŋgua pwataki. Aku siruru ŋananzi tamâta ŋalaŋala, ande tia.
Kinzi kalo-tawana tamâta ndoni ilonzi ilâ taitu
32 Kinzi kalo-tawana tamâta ndoni ilonzi ilâ taitu nâ. Mine nde tamâta toŋge imora tamwata ne kelekele toŋge ku iporo tu, “Ŋine nde naneŋgu kelekele nâ”, ande siporo mine tia. Kinzi rârâni sipavila ku sipalulua nenzi kelekele rârâni lâ warakanzi ŋgininzi. 33 Aku walo ŋalae ikeno panzi pâri-tamâta, kala simo situla Maro Yesu parina pwataki tu imâte lâ, ŋineŋga imandi sânda imo via kilo. Mao nâ, Maro Kindeni ne wisi-wisi imâ ŋalae panzi kalo-tawana tamâta rârâni. 34 Mine kala nawalanzi tamâta toŋge imo sugorai nâ, ande tia. Ŋana tu zo pinde, kalo-tawana tamâta pinde sio nenzi tâno wa luma panzi tamâta tu ma siko kâ, ku sikai mbumbu ŋana. Ŋineŋga sikai mbumbu ŋinde simâ, 35 aku silanzi pâri-tamâta tu ma siwae panzi kalo-tawana tamâta ŋinde nenzi kelekele tia.
36 Aku tamâta toŋge imo kunzi, i ŋa tu Yosepe. I nde Saiprus sia tamwata, lâ Livai ne vâsa ŋgu, aku kinzi pâri-tamâta sipatu i ŋa toŋge tu “Banabas”. Ŋoa ŋinde nde duvi mine, “Tamâta ŋana ipu tini kaika panzi tini pinde.” 37 I nde io ne tâno pinde pa tamâta toŋge tu iko, ŋineŋga ikai mbumbu imâ ilanzi pâri-tamâta ŋana siwae kâ.