1 Pambitâŋa tava pawaŋa rârâ uru ipâŋga lâ miki ŋginimi. Aku ŋinde nde duvi mana, a? Ŋinde miki kasama lâ. Miki uru ilomi kâki ŋana kagona mbaliŋa kie-kie, aku ŋinde iveta paraŋa ipâŋga lâ ilomi kalomi.

2 Miki ilomi ŋalae koŋa tu kagona mbaliŋa kie-kie, andeta miki ŋandai kakai ŋga. Mine kala miki uru kapunzi tamâta pâta simâte. Miki ilomi yosi pa mbaliŋa, taitu miki kakai, ande tia. Mine kala miki uru kapawa sakamao ndo wa kaveta paraŋa wa. Miki ŋandai kano pa Maro Kindeni tu ma mbaliŋa ilami ŋga, aku ŋana duvi ŋinde kâ, ande miki kakai mbaliŋa ŋinde tia. 3 Aku lâ zo ŋana miki kakai noŋa pa Maro Kindeni tu i ma mbaliŋa ilami, ande miki kakai tia, ŋana tu nemi ilo-kalo nde soki-soki. Miki ilomi tu kakai mbaliŋa ŋana kandeka ku katambira kaa nâ, aku kalomi kapa ŋana Maro Kindeni kâ.

4 Miki nde katogo taine toŋge ipile kaiwa tamâne ku ilâ itambira tini potomule! Miki kaloŋo ŋga; ambo tamâta toŋge ilo pa tâno ŋine ne vetâŋa wa kelekele wa, ande ikai kazâŋa pa Maro Kindeni. Tiambo miki kazizâla ŋana ŋinde kâ, a? Tamâta ea ilo tu iveta mete kuku tâno ŋine ne vetâŋa, ande i imo Maro Kindeni ne kazâŋa tamâta. 5 Maro Kindeni kawa ŋgua ikeno lâ pepa tini, aku ŋgua ŋinde itula pwataki tu i io Koroani Sapâŋa imâ ilonda lâ, aku Maro Kindeni ilo ŋalae tu kinda ma tao ilonda ndo ilâ papa i simbo nâ. Tiambo miki katu ŋgua ŋine nde ŋgua kaa nâ, a? 6 Taitu Maro Kindeni ne wisi-wisi nde imâ ŋalae ndo pa kinda. Mine kala i kawa ŋgua ikeno lâ pepa tini mine tu,

7 Mine nde ara ŋana miki ma kapatawa warakami tinimi lâ Maro Kindeni nao, aku kapaveta kuku i kawa ŋgua. Ambo miki ma kakai kazâŋa pa Sadana, ande i ma ipilemi ku ikâwa ilâ. 8 Ambo miki ma kalâ kamo Maro Kindeni tini laiti, ande i kala ma imâ imo ku miki mine nâ. Miki kiesaka tamwatami, ara ŋana miki ma kapaveta kuku vetâŋa ara nâ, itogo tamâta ipua mbau ŋana ipâŋga tini mbâra-mbâra kâ. Aku miki tamâta ea kamo tava ilomi kalomi rua-rua nâ, ande ara ŋana miki ma kasoki ilo-kalo sakamao ikeno ilomi ŋinde piti, ŋana ilomi ma ipâŋga mbâra-mbâra kâ. 9 Ara ŋana miki ma kalomi ŋgere ŋana nemi vetâŋa soki kâ, aku kalomi sukâŋa wa ilomi malia wa kata ŋalae wa. Miki tamâta ea uru kandeka ŋana nemi vetâŋa soki kâ, ande ara ŋana miki ma kapalele ku kamo tava ilomi malia ndo. 10 Ambo miki ma kapatawa warakami tinimi lâ Maro Ŋalae nao, ande i ma isuka miki kâki.

11 Niŋgu-nambwe wukale, miki ma kaporo ŋgua sakamao ilâ panzi ninda-nambwe kalo-tawana tamâta ndimo. Tamâta ea isowe ŋgua sakamao ilâ pa ninambwe kalo-tawana tamâta wa italea i wa, ande ŋinde itogo tamâta ŋinde italea ku iporo ŋgua sakamao pa Maro Kindeni ne tukuŋa tona. Aku lâ zo ndia noko kutalea tukuŋa ŋinde, ande noko kupu muli papa marumbu lâ, aku kupamorai tu noko nde ŋalae kala kupole tukuŋa. 12 Taitu Maro Kindeni simbo nâ ipulia ŋgua tukuŋa, aku i simbo nâ ma ipare nia panzi tamâta. I simbo nâ ikura ŋana iyautenzi tamâta ku via mao ilanzi, aku i simbo nâ ikura ŋana izavarunzi kâ. Mine kala noko nde ea kala kutu kutalea ŋgua ilâ panzi noko tini pinde, a?

13 Miki tamâta pinde uru kaporo ŋgua mine; “Tiambo ŋainani tâku mbwale tâku, ande naŋa ma ayoka alâ pa lawea toŋge, aku ma akai wurâta ŋana mbaliŋa kâ ikura mbwera taitu.” Ayo, noko tamâta ea uru kuporo ŋgua kaŋa mine, ande kuloŋo ŋga; 14 Noko ŋandai kusama ŋana vetâŋa ndia ma ipâŋga lâ mbwale kâ. Noko ne via nde itogo mundo ipâŋga ku imo zo tini nâ, ŋineŋga walele nâ marumbu ndo, aku nao tia lâ. 15 Mine nde ara ŋana noko ma kuporo ŋgua kaŋa mine; “Ambo Maro Ŋalae ma isâu pa naŋa, ande naŋa ma amo viâŋgu, ku ma aveta wurâta ŋinde iloŋgu tu aveta.” 16 Andeta miki uru kapasuka warakami tinimi. Miki kapandekâna warakami, andeta kalomi kapa ndo ŋana Maro Kindeni kâ. Aku vetâŋa rârâni kie mine nde vetâŋa sakamao ndo. 17 Miki rârâni taitu-taitu kalomi ŋgere sondo ŋga; ambo Maro Kindeni itula vetâŋa ara toŋge pa noko tu kuveta, andeta noko ŋandai kuveta vetâŋa ŋinde ŋga, ande ŋinde nde kiesaka.