1 Yesu iporo ŋgua mine panzi ne pâri-tamâta marumbu lâ, ŋineŋga mata kâki ilea pa samba, aku ikai noŋa mine tu, “Mama, zo ŋga ipâŋga lâ. Naŋa iloŋgu tu ma ŋine noko ma kutula noko natu naŋa kilalâŋgu pwataki, aku naŋa kala ma atula noko kilala pwataki mine nâ.

2 Ŋana tu nia ndoyo noko kupateana ŋana akai Maro Ŋalae panzi tamâta ndoni. Mine kala naŋa via mao alanzi tamâta ŋinde noko muŋga kupateanzi tu ma sipono muli pana. Via ŋinde nde ŋana simo vianzi mine ku simo nâ. 3 Aku via mao ŋinde nde duvi mine; tamâta ea kinzi sisama noko Maro Kindeni kilala tu noko simbo nâ nde Maro mao, aku kalonzi tawana tu noko muŋga kusupwa naŋa Yesu Kirisi amâ, kinzi ŋinde ma sikai via mao, ma simo vianzi mine ku simo nâ. 4 Wurâta rârâni noko muŋga kupatea pana, ande naŋa aveta ŋinde marumbu lâ. Aku naneŋgu vetâŋa ŋinde itula noko kilala pwataki panzi tâno tamâta. 5 Mama, siŋgani, lâ zo ŋinde tâno ipâŋga tia yo, ande naŋa amo kuno, aku naŋa ŋâŋgu ŋalae. Kala ŋine naŋa iloŋgu tu noko ma ŋoa ŋalae ndainani nâ kulua naŋa kilo lâ noko tamwata nao.

6 Naŋa atula noko kilala pwataki panzi tamâta lâ, kinzi ŋinde noko kupatea lâ tu ma pwainzi piti lâ kinzi tâno tamâta ŋgininzi ku kulua naŋa. Muŋga kinzi simo noko ne tamâta, aku kinzini nde kulua naŋa lâ. Aku kinzi uru sipaveta kuku noko kawa ŋgua. 7 Kala ŋine kinzi sisama tu kelekele ndoni noko muŋga kulua naŋa, ande kelekele ŋinde iyoka noko mbau ilo imâ pana. 8 Ŋana tu ŋgua rârâni noko muŋga kutula pana, ande naŋa kala atula ŋgua ndainani nâ pa kinzi. Aku sikai sipaveta kuku, kala sisama sondo tu nia ndoyo naŋa amo kuku noko. Kinzi nenzi kalo-tawana ikeno mine tu noko muŋga kusupwana kala amâ. 9 Taitu naŋa ŋandai ano pano tu kuvilanzi tâno tamâta ŋga. Ano pano tu kuvilanzi tamâtani ŋaina noko muŋga kulua naŋa, ŋana tu kinzini nde simo noko ne tamâta. 10 Naneŋgu tamâta rârâni nde noko ne tona. Aku mine nâ, noko ne tamâta rârâni nde naneŋgu tona. Aku kinzi ŋinde uru situla naŋa kilalâŋgu pwataki tu naŋa nde Maro Ŋalae. 11 Kala ŋine naŋa ma amâ pano, aku ma amo tâno ŋine kulu kilo tia. Andeta kinzi ma simo tâno kulu yo. Mine kala Mama, noko Sapâŋa Tamwata, naŋa ano pano tu pwea ŋananzi lâ noko tamwata ŋa kaika ŋinde, ŋana kinzi ma simo ilonzi kalonzi taitu, itogo kinda rua tamo mine. Nia ndoyo noko ŋoa kaika ŋinde kulana lâ. 12 Muŋga, lâ zo ŋinde amo kunzi yo, ande naŋa akai ŋoa ndainani muŋga kulana ŋinde, aku akea ŋananzi. Naŋa akatonanzi sondo nâ. Mine kala ŋgu ŋinde ne tamâta toŋge ŋandai isapiri ku nao tia lâ ŋga. Andeta tamâta taitu mai nâ, inani tamâta ŋana ilâ pa yââ ŋalae ne mbââ ilo, i simbo nâ isapiri lâ. Mine kala noko kawa ŋgua ikeno lâ pepa tini ŋinde nde ipâŋga kanaŋo lâ.

13 Kala ŋine naŋa ma amâ pano. Andeta naŋa iloŋgu tu naneŋgu ndekâŋa ma ipâŋga ŋalae lâ naneŋgu tamâta ilonzi; mine kala aporo ŋgua rârâni ŋine lâ zo ŋine naŋa amo tâno kulu yo. 14 Naŋa atula noko kawa ŋgua pwataki panzi siloŋo lâ. Andeta kinzi tâno tamâta nde sikai kazâŋa panzi, ŋana tu tâno ŋine nde naneŋgu tamâta nianzi mao, ande tia. Aku mine nâ, tâno ŋine nde naŋa niâŋgu mao, ande tia. 15 Naŋa ŋandai ano pano tu pwainzi piti lâ tâno ŋine kulu ŋga. Naŋa ano pano tu pwea ŋananzi, ŋana Sakamao Tamwata ma ikura ŋana izavarunzi tia. 16 Tâno ŋine nde naŋa warakâŋgu niâŋgu mao, ande tia. Aku mine nâ, tâno ŋine nde kinzi nianzi mao, ande tia. 17 Noko kawa ŋgua ndoni nde mao kanaŋo. Mine kala naŋa iloŋgu tu noko ma kuo ne ŋgua mao ŋinde ipaipa lâ ilonzi kalonzi, ŋana ma sipâŋga noko ne ŋgu sondo. 18 Noko muŋga kusupwana kala amâ amo kunzi tâno tamâta. Aku mine nâ, naŋa kala asupwanzi tamâta ŋinde silâ simo kunzi tâno tamâta. 19 Naŋa ao warakâŋgu neŋgu via ndoni imâ pano, ŋana avilanzi tu sipâŋga noko ne ŋgu sondo.

20 Taitu naŋa ŋandai ano pano tu kuvilanzi naneŋgu tamâta ŋine simbonzi nâ, ande tia. Naŋa ano pano tu kuvilanzi tamâta pinde tona, kinzi ŋinde ma muli siloŋo naneŋgu pâri-tamâta nenzi ŋgua, ku ma sio nenzi kalo-tawana imâ pa naŋa. 21 Mama, naŋa iloŋgu tu kinzi tamâta ŋinde rârâni ma simo ilonzi kalonzi taitu, itogo kinda rua tamo mine. Ambo kinzi ma simo ilonzi kalonzi taitu mine, ande kinzi tâno tamâta ma kalonzi tawana tu noko muŋga kusupwana kala amâ. 22 Nanayoni noko walo kaika kulana, aku naŋa kala walo kaika ndainani nâ alua kinzi lâ, ŋana kinzi ma sikura tu simo ilonzi kalonzi taitu, itogo kinda rua tamo mine. 23 Naŋa apaipa kuku kinzi, aku noko kala kupaipa kuku naŋa mine nâ. Naŋa iloŋgu tu kinzi ma simo ilonzi taitu mao. Ambo kinzi ma simo mine, ande kinzi tâno tamâta ma sisama tu noko muŋga kusupwana kala amâ. Aku ma sisama tu noko tini mwasa ndo panzi naneŋgu tamâta ŋinde, itogo uru tini mwasa pa naŋa mine.

24 Mama, naŋa iloŋgu tu kinzi tamâta noko muŋga kulana ŋinde ma simo kuku naŋa. Naŋa iloŋgu tu kinzi ma simora kilalâŋgu pwataki tu naŋa nde Maro Ŋalae. Mao nâ, nia ndoyo, lâ zo ŋinde tâno ipâŋga tia yo, ande noko tini mwasa ndo pa naŋa kala kupateana tu ma akai Maro Ŋalae mine nâ.

25 Mama, noko nde Vetâŋa Sondo Tamwata. Kinzi tâno tamâta ŋandai sisama noko kilala sondo ŋga, aŋga naŋa nde asama noko kilala sondo. Aku naneŋgu tamâta nde sisama tu noko muŋga kusupwana kala amâ. 26 Naŋa atula noko kilala pwataki panzi lâ, aku ma amo aveta mine nâ, ŋana tu ŋinde ma ivilanzi tu tininzi mwasa panzi tininzi pinde, itogo noko tini mwasa pa naŋa mine. Aku ŋinde ma ivilanzi tu sipaipa kuku naŋa warakâŋgu tona.” Yesu ikai noŋa mine.