1 Festo que ngasẽ Cesaréaa cote ra. Félix rendaque re, mbia rerecuarã. Tres días mose que esɨ Jerusalén cote ra. 2 Huee que sacerdote rerecua ñee ɨcuã ja Pablo rɨɨ̃ nda. Judíos rerecua abe ñee ɨcuã ja Pablo rɨɨ̃. Festo je ñee ñee Pablo rɨɨ̃. 3 —Urembia jiri rã. Pablo eru Jerusalén, ɨ ja rei que sacerdote rerecua Festo je ra. Ɨquia nda eña nde. Ñeenda cúaa. 4 —Pablo tarõ ji ñɨ Cesarea pee. Aruã nda se. Namo jiri ra aso pee, ɨ que Festo ra. 5 —Sã jenderecua abe nyoɨ serese Cesaréaa. ¿Mbae jenye quia Pablo je re? ¿Mbae ɨcuã esaã nde? Nyao pee teñee seje, ɨ que Festo ra.

6 Festo que siqui mbɨrɨ̃ Jerusalén nda. Ocho o diez días. Hue sɨ que eru nyebi Cesaréaa ra. Isamamɨ ngue esɨ mbia chumunuásaa ra. Ae que mbia rerecua cote ra. Ngoi que huee ra. —Pablo jendu rã. Echeẽ tachandu cote, ɨ que mbia je cote ra. 7 Pablo que ɨque cote ra. Judíos Jerusalén jenda que ñee ɨcuã ɨcuã Pablo rɨɨ̃ nda. Maende rocoɨ̃ mbae ɨcuã naa mose. Ñee ñooño erɨɨ̃. 8 Pablo que ñee echeẽ mose ra. Judíos cheẽ ngue esɨbɨshorõ nda. —Mbae ɨcuã mo asaã eãte resẽ. Judíos chɨmbesa amumbayãte resẽ. Romanos nderecua cheẽ amumbayãte no ndesẽ. Dios chuchua abe ambɨɨcuã eãte no ndesẽ, ɨ que Pablo ra. 9 —¿Ndeso sereãte Jerusalén nde? Mañɨ ae ra se quia ndeje hue reae, ɨ rei que Festo Pablo je ra. —Ɨ̃ nda judíos paama ɨã seje. Judíos tambia jiri, ɨ que equia ndua ra. 10 Pablo que ñee ee ra. —Romanos nderecua raque jẽ. Aɨco raque jẽsaa a. Jẽ nguiatu jeñee seje. Ã jẽɨngo raque seɨcuate ã. Mbae ɨcuã mo asaã eãte judíos je resẽ. 11 Se mbae ɨcuã naa tuchɨ mose, ¡seɨquia se jẽ! Judíos ñee ñooño mose serɨɨ̃, ¿mbaerã nda semondobe judíos je re? Semondo aroneate ee. Ererecua tuchɨ je semondo rã. Sã ae quia ñee seje, ɨ que Pablo Festo je ra. 12 Festo que ñee nyecuayã cuayã nguesenda je ra. Aquere que ñee Pablo je cote ra. —“Semondo ererecua tuchɨ je”, ere que seje. Taremondo ee cote, ɨ que Festo Pablo je ra.

13 Aquere que Agripa sɨ Cesaréaa ra. Ererecua rei ae. Berenice rese que esɨ ra. Festo rea. 14 Huee que itõ mocoɨ̃te ra. Festo que Agripa mbiirandu ja Pablo rɨɨ̃ nda. —A emo tarõ ji ñɨ a. Félix que etarõ mɨɨ nda. 15 Seso mose Jerusalén, sacerdote rerecua ñee tuchɨ seje. “Pablo eɨquia”, ɨ rei ngue seje re. Judíos rerecua abe ñee ɨcuã ɨcuã tuchɨ Pablo rɨɨ̃. 16 Acheẽ ndei ngue ee re. “Tei. Mañɨ ae ra mbia mo ɨquiachõ nde. Mbia eɨcuã nenei eã mose seje. Ae ñee ɨcuã nguia erɨɨ̃, sã ũquɨ̃ ngaẽ ñee ee. Sã ñee nguia nyue sésaa”, ae que ee ra. 17 Judíos que ngaẽ a cote ra. “Isamamɨ jeñee tachandu Pablo je”, ae que ee ra. “Pablo jendu rã”, ae que isamamɨ serimba je cote ra. 18 Pablo ucuayãsa que juã ja rei cote ra. Ñee ɨcuã tuchɨte reɨ̃ nda Pablo rɨɨ̃ seje. Pablo chɨsaã ɨcuã mo ngue embuchecuayã ñochɨ̃ nguiã seje. “Mbia ra Pablo mbɨɨcuã tuchɨchɨ̃ nde”, aechɨ̃ ngue se re. 19 “Judíos rã eã ño Pablo. Judío ndua rã eã ño Pablo riqui nguiã ndua”, ɨ chõ ngue judíos ñee ñee seje ra. Jesús, ɨ que emo je ra. Judíos que ñee ɨcuã ɨcuã tuchɨ Jesús rɨɨ̃ nda. “ ‘Jesús que quera sɨ manonde ra’, ɨ que Pablo judíos je ra”, ɨ que Festo Agripa je ra. 20 —“¿Mañɨ ae ra se re?” aete que se ra. Nyebe que acheẽ ee ra. “¿Ndeso sereãte Jerusalén nde? Huee quia nandecheẽ”, ae rei que ee ra. 21 “Sã ererecua tuchɨ quia ñee seje. Semondo ee Roma”, ɨ que Pablo seje ra. “Eno. Aremondo je nda ee re”, ae que ee ra. Nyebe ngue atarõ mbeɨte mɨɨ nguiã, ɨ que Festo Agripa je ra. 22 Agripa que ñee ee ra. —Se abe nda aque cheẽ achandu rã ña, ɨ que Festo je ra. —Eno. Isamamɨ nda echeẽ erechandu cote, ɨ que Festo ra.

23 Isamamɨ ngue Agripa huɨɨrao turã mingue ra. Berenice rese. Ererecua ɨrao. Ererecua ataque chumunua mose que echoɨ ɨque ra. Soldados rerecua que chɨ ja huee ra. Mbia rerecua mo abe que chɨ ra. —Pablo jendu cote, ɨ que Festo mbia je cote ra. 24 Festo que ñee cote ra. —Tacheẽ ndeje, Agripa. Jẽ abe je tacheẽ, mbia rerecua. A eriqui a cote. Pablo, ɨ equia ee. Ae rɨɨ̃ judíos riqui ñee mbeɨte seje. “Eɨquia”, ɨ beɨ seje. Jerusalén jenda abe ñee mbeɨ erɨɨ̃. Cesarea jenda rã. “Sã mano”, ɨ beɨ seje. 25 ¿Mbae rɨɨ̃ nda aba eɨquia re? Mbae ɨcuã mo esaã eãte resẽ. Ae quiarei ñee. “Semondo rã ererecua tuchɨ je”, ɨ que Pablo seje ra. Nyebe tamondo ee. 26 ¿Mbae ɨ ra aba embesa mondo ee re? Mbae ɨcuã ngue esaã eãte. Nyebe Pablo aru nguiã jẽje a. Ndeje chõ ngue aru nguiã, Agripa. Echeẽ ee. Ɨ̃ nda eɨcuã erembuchecua. Ɨ̃ nda eɨcuã ambesa mondo ererecua tuchɨ je. 27 ¿Ma nda aba etarõi mondochõ nde? Eɨcuã mbesa iriã mose, ɨ que Festo Agripa je ra.