1  * Rom 15.26; Eks 16.18O urumeleŋ alaurupni, Anutunöŋ kalem möriamŋi urumeleŋ könagesöŋi könagesöŋi miaŋgöreŋ neŋgii ölŋan mönö Masedonia prowins uruŋe ölöpŋanök asuhuyök. Nöŋön iŋini miaŋgöra gukmaulem malbepuköra möta kösohotŋi kewö jimam: 2 Yeŋön kahasililiŋ miwikŋaiba mötketka lömbötŋambuk esapköm eŋgiiga wanapŋi kötökŋi maljemö, mi töndup önöŋi qahö söŋgaigeraŋgöra aka urumeleŋ alaurup naŋgöm eŋgibingöra moneŋ naluk keta bölökŋi alget.

3 Yeŋgö könaŋini kewö naŋgöba jimam: Kunŋan qahö kuŋgum eŋgii nanŋini sihimŋinan töndup ahuiga amqeba ösumŋinaŋgö dop nalukŋini alget aka mi tok oŋgita eŋgiget. 4 Yeŋön mönö kapaŋ köla gwötpuk kuŋgum neŋgiba kewö uleta jiget, “Nini tok Judia prowinsgö ambazip sarakŋi bauköm eŋgibingö mötzin. Miaŋgöra Pol, gi ölöp Oŋ! jinöŋga mönö simbawoŋ möta nup miaŋgö bahöŋi amqeba membin.”

5 Mewö jiget jibiga naluk almegö mambörali, miaŋgö dowök qahöpmö, mi oŋgita kewö aket: Yeŋön mutuk naŋgönaŋgö Kembugö jeŋe dop köljawi, mi akingöra uruŋini jöhöget aka miaŋgö andöŋe Anutugö jitŋi tem kölbingö möta nanŋini malmalŋini mi mewöyök neŋgö börönine alget. 6 Miaŋgöra Taitus kewö jim kutum waŋgial, “Gi mönö naŋgönaŋgö nup mi lök könahiba menöŋ. Miaŋgöra mi mönö toroqeba Korint könagesö bauköm eŋginöŋga urukalemŋini kondela moneŋ naluk ketaŋi mi kunbuk toroqeba algetka sutŋine teköma.”

7 Urugö yuai könaŋi könaŋi mi keleŋmaleleŋ buŋa qem aŋguba kewö aka malje: Ölöpŋanök Kraist möt nariba Buŋa keu ölŋi jim soroköba Anutugö sihimŋi möt kutuba tosatŋi naŋgöm eŋgibingö pöndaŋ köpösöŋgömakze. Eŋön mönö tosatŋi eŋgoŋgita ölöpŋanök jöpaköm neŋgiba qetpuk akze. Miaŋgö dop naŋgönaŋgö nup ki mewöyök mönö ölöp mem soroköba tosatŋi eŋgoŋgitketka qetpuk akŋa.

8 Mewö jiba moneŋ almegöra qahö jim kutum eŋgizal. Mi qahöpmö, urukalemŋini geŋmoŋambuk akza me qahöwi, mönö mi esapesapnöŋ ala könaŋini mötmamgö mötzal. Könagesö tosatŋan gönmönahot mosöta naŋgönaŋgö nupŋini öl töhönŋa memba zeŋ kinjei, keu mi jiba miaŋön iŋini esapköm eŋgizal.

9 Naluk dawik almegöra kewötmei, miaŋgöreŋ mönö Kembunini Jisös Kraistkö könaŋaŋgö tandökŋi mötmörime. Iŋini yaŋgö kalem möriamŋi ketaŋi mi kewö mötze: Yaŋön Suepkö öröyuai pakpakö Toŋi öŋgöŋgöŋi ahökmö, töndup iŋini oyaeŋkoyaeŋgö pomŋi akŋegöra aka gölmenöŋ eta etqeqeŋi aka malmalŋi tököba mosörök.

10 Moneŋ almegöra qahö jim kutum eŋgizalmö, Jisösnöŋ söpsöp alöhi, miaŋgö dop qambaŋni miyök eŋgizal. Eŋön yambu emune lök naŋgönaŋgögö mutukŋi aka miaŋgö nupŋi kapaŋ köla meget aka mi toroqeba membingö sihimŋi köhöikŋi mötket. 11 Nalö kewöŋe nupŋini mi mönö mem teköme. Mutuk naŋgönaŋgö nup membingö kapaŋ köla awöweŋgögeri, miaŋgö dop mi mönö toroqeba mem teköme. Yuai ahöm eŋgizawaŋgö dop mönö nalukŋini gwötpuk alme. 12 Miaŋgö könaŋi kewö: Naluk albingö sihimŋinan ahuba ahöza ewö, mönö yuai ahöm eŋgizawaŋgö dop algetka Anutunöŋ möt aŋgön köli dop kölja. Yuai qahö ahöm eŋgizawaŋgö dop mönö qahö kewöta jim eŋgimakza.

13 Naluk ketaŋi algetka alaurup yeŋgö malmalŋinan amqeiga nanŋini qakŋine lömböt öŋgömapköra qahö mötzinmö, alaurup osiba mözöröŋgözei, yembuk mendeŋda öröröŋ malbingöra mötzin.

14 Miaŋgöra nalö kewöŋe yuai keleŋmaleleŋ ahöm eŋgiiga tosatŋan malmalŋinaŋgö yuaigöra osizei, iŋini mönö mi bauköm eŋgigetka dopŋe akŋa. Mewö aka nanŋini könaŋgep yuaigö osigetka yeŋgö öröyuaiŋinan keleŋmaleleŋ ahömawi, nalö miaŋgöreŋ mönö i kun bauköm eŋgime. Mewö ak aŋgugetka alabauk silikŋinan öröröŋ akŋa. 15 Mi Buŋa keu ki ohoget ahözawaŋgö dop akŋa, “Gwötpuk mem tokoba malgeraŋön nanŋini dop negetka numbu surukŋini qahö ahöiga boromborom mem tokoba malgeraŋön nene yuaigöra qahö osiget.” Mewö.

16 Anutunöŋ Taitusgö uruŋi sölölöhöiga eŋgöra ni ewö waimanjat möta bauköm eŋgimamgö kapaŋ köla malja. Miaŋgöra “Anutu saiwap!” jizal. 17 Nöŋön Taitus eŋgöreŋ kamapkö qesiba uruŋi kuŋgubiga imbiŋi meleŋnök. Miyök qahöpmö, nanŋak iŋini bauköm eŋgimamgö möta köpösöŋgöba nanŋi sihimŋaŋgö dop neŋgömosöta Korint eŋgöreŋ kamamgö jiyök. 18 Neŋön urumeleŋ alanini kun melaininga yambuk kamahot. Kiaŋgöreŋ Ölöwak Buŋa jim sehimakzawaŋgöra i mönö urumeleŋ könagesö dop möpöseim waŋgimakze.

19 Yaŋgö keuŋi toroqeba kewö jimam: Masedonia urumeleŋ könagesö yeŋön mönö i möwölöhögetka naŋgönaŋgö nalukŋi mi memba nembuk mohotŋe köna anbin. Neŋön Kembu nanŋaŋgö qetbuŋaŋan sehimapköra möta naluk ketaŋi mi ölöp galöm köla Judia prowinsnöŋ anda eŋgibin. Alabauk eŋgibingö urukalemnini mewö aukŋe kondeljin.

20 Mewö aka naŋgönaŋgö naluk ketaŋi mi tilipqilip asuhui sohobapuköra ölöp galöm köl soroköbin. Kunŋan siliknini miaŋgöra jim neŋgibapukö möta kapaŋ köla kinjin. 21  * Qam 3.4Keu miaŋgö könaŋi kewö: Neŋön silik Kembugö jeŋe diŋdiŋi akzawi, mi qötöŋgatpinbukö galöm mem aŋgumakzin. Miyök qahöpmö, silik ambazip jeŋine dop köljawi, mi mewöyök akingö möta kapaŋ köljin.

22 Yetpuk urumeleŋ alanini kun mi mewöyök melaininga kama. I nalö gwötpuk esapköm waŋgiba tandökŋi kewö ehin: Yaŋön mönö nalöŋi nalöŋi Kembugö nupŋi memamgö könöpkönöp ahakza. Nalö kewöŋe iŋini tosatŋi alabauk eŋgibingö mötzei, mewö möt narim eŋgizawaŋgöra mönö eŋgöreŋ kaba bauköm eŋgimamgö möta urukönöp ketaŋi ahakza.

23 Nöŋön Taitus kewögöra möwölöhöyal: Yaŋön nöŋgö alabaukni aka nup meme neŋakni akza. Urumeleŋ könagesöŋi könagesöŋi yeŋön alayahötnini yahöt mi möwölöhöm etkigetka jitŋememeŋini akzahot. Kraistkö qetbuŋaŋan mönö yetköra aka qarimakza. 24 Miaŋgöra azi karöbut mi kamei, i mönö urukalem ak eŋgiba könaŋini mewö kondelgetka ekŋe. Mewö akŋe ewö, neŋön silikŋinaŋgöra sileŋini möpöseinini, keu miaŋgö ölŋan mönö aukŋe asuhuiga eketka urumeleŋ könagesö gwötpuk yeŋön mötme. Mewö.