5
Galöm bohonini Jisösnöŋ mönö bauköm neŋgimakza.
1 Gölmegö jike nup galöm bohonŋi pakpak mi ambazip sutŋineyök möwölöhöm eŋgiba nup kewö memegöra kuŋgum eŋgimakzin: Yaŋön ambazip jitŋememenini aka Anutubuk urumohot aka malbingö nupŋi memba siŋgisöndok ahinaŋgö sömbup kalemŋi kalemŋi mi Anutugöra ala miaŋön jöwöwöl ohomakza. 2 Nanŋi urumöt-mötŋi tosatŋan mewöyök lölö-wöröŋi akza. Miaŋgöra ambazip gukmaulem qakŋe jaŋjuŋ ahakzei, mi ölöp wösömötmöt qakŋe ak neŋgimakza. 3 * Lew 9.7Lölöwöröŋi akza-waŋgöra mönö nanŋi siŋgisön-dokŋi aka könagesöurupŋi yeŋgö siŋgisöndokŋini mewöyök köl könjöratmapköra sömbupnöŋ jöwöwöl ohomakza. 4 * Eks 28.1Kunŋan qetbuŋa mi nanŋaŋgöra qahö buŋa qem aŋgumapmö, Anutu-nöŋ Aron oholöhi, miaŋgö dop mönö i mewöyök oholja.
5 * Sum 2.7Miaŋgö dop Kraistnöŋ mewöyök nanŋak jike nup galöm bohonŋi akŋapkö qetbuŋaŋi mi nanŋaŋgöra qahö buŋa qem aŋguyökmö, Anutunöŋ kewö jim kutum waŋgiyök, “Göŋön nöŋgö Nahöni aknöŋga nöŋön mönö merak göhö Iwigi akzal.”
Keu miaŋgö dop jike nup galöm bohonini ahök.
6 * Sum 110.4Keu miyöhök jii Buŋa Kimbigö kembaŋi kunöŋ kewö ahöza, “Göŋön mönö Melkizedek ewö jike nup galöm aka nalö teteköŋi qahö mal öŋgöman.”
7 * Mat 26.36-46; Mak 14.32-42; Luk 22.39-46Jisösnöŋ silebuk gölmenöŋ mala miaŋgöreŋ mönö nalöŋi nalöŋi köuluköba köhöikŋanök qeriga imbilŋan eri Anutu kömupnöhök mekömapkö köhöiyöhi, i qesim waŋgiba malök. Qesim waŋgiba mala Anutu göda qeba keuŋaŋgö bapŋe al aŋguba malöhaŋgöra Anutunöŋ köulukŋi mörök. 8 Nahönŋi ahökmö, Anutunöŋ mi töndup sihimbölö qahö jöhöi qakŋe öŋgöi möta miaŋgöreŋ temkölkölgö könaŋi miwikŋaiba möt soroköyök. 9 Mi möta aködamunŋi pakpak miwikŋaibagun mönö oyaeŋkoyaeŋ teteköŋi qahö malbingö kondotkondot Toŋi ahök. Miaŋgöra ambazip yaŋgö jitŋi tem köla maljei, mi pakpak mönö ölöp kondot eŋgiiga oyaeŋkoyaeŋ akŋe. 10 Toŋi mi aiga Anutunöŋ i Melkizedek ewö jike nup galöm bohonŋi akŋapkö jim teköba al waŋgiyök. Mewö.
Mötnaripkö ölŋi sohobapukö galöm meme keu
11 Keu mi ölöp toroqeba gwötpuk jim qaribinakmö, eŋön keu möta wuataŋgöbingö taŋqaŋ aka gaunjeje akze. Miaŋgöra mi jim asarim eŋgibingö osikosi akzin. 12 * 1 Kor 3.2Iŋini nalö köröpŋi könagesö walŋi mala ölöp nalö kewöŋe lök böhi qaqazu akŋeaŋgö dop akeakmö, nanŋinak Anutugö keu kötŋi mutukŋi mi kunŋan dumŋe kunbuk kusum eŋgimapköra osimakze. Iŋini mönö qaköba Buŋa keu mi juzu ewö nembingö mötze. Nene köhöikŋi ewö mi nembingö osimakze. 13 Kunŋan mi juzu ewö nemba maljawi, yaŋön mönö toroqeba morösepsep ewö akza. Anutugö jeŋe solanŋi akingö keu kusum eŋgiinmö, yaŋön miaŋgö könaŋi qahö möt kutuba tönpin malja.
14 Morösepsep ewö maljapmö, nene köhöikŋi mi ambazip mötmötŋinan qariyöhi, mönö yeŋön nemegöra aka ahöza. Ambazip Buŋa keu sundan köl guliba malgetka urumötmötŋinan lök möŋaiiga ölöp amqeba silik pakpak kewöta ölöpŋi aka bölöŋi mendeŋ etkiba ölöpŋi wuataŋgömakze. Nene köhöikŋi mi yeŋgöra aka ahöza.
*5:3: Lew 9.7
*5:4: Eks 28.1
*5:5: Sum 2.7
*5:6: Sum 110.4
*5:7: Mat 26.36-46; Mak 14.32-42; Luk 22.39-46