1 Köna keugö kapaŋkölköl aka miaŋgö böhi tosatŋi Jerusalem sitinöhök kageri, yeŋön Jisösgöreŋ kaba tokoget. 2 Nalö miaŋgöreŋ Jisösgö gwarekurup tosatŋan böröŋini kude saŋgoŋda dom amöt qahö qeba nene negetka eŋgeka uruŋini böliyök.

3 Farisi (Köna keugö kapaŋkölköl) aka Juda ambazip tosatŋi pakpak yeŋön ambösakon yeŋgö silikŋini wuataŋgöba malget. Miaŋgöra böröŋini mutuk saŋgoŋ soroköbagun nene nemalget. 4 Mewöyök nupnöhök me maketnöhök kamei, mutuk o utuba arim tönjöratagun nene misirimalget. Mewöyök kiwi qambi, közökimbut aka jout pakpak mi saŋgoŋda amöt qemalget. Silik mewöŋi mewöŋi mi gwötpuk wuataŋgöba malget.

5 Miaŋgöra Köna keugö kapaŋkölköl aka miaŋgö böhi yeŋön Jisös kewö qesim waŋgiget, “Göhö gwarekurupkan wuanöŋgöra ambösakoninaŋgö silikŋini qahö wuataŋgöba böröŋini domamöt qahö qeba töndup nene neze.”

6  * Ais 29.13Mewö qesim waŋgigetka kewö jii mötket, “O urumeleŋgö silesile ambazip, kezapqetok azi Aisaianöŋ mönö eŋgö könaŋamŋini törörök indela Buzup Kimbi kun kewö ohoi ahöza,

8 Aisaianöŋ mewö ohoyök. Iŋini mönö miaŋgö dop Anutugöreŋ jöjöpaŋ keu andö qeba ambösakonŋinaŋgö silikŋi wuataŋgömakze. Mi qahö dop kölja.”

9 Mewö jiba kewö jiyök, “Nanŋini silikŋini walŋi wuataŋgöbingöra mönö ölöpŋanök Anutugöreŋ jöjöpaŋ keu qeapkömakze. 10  * Eks 20.12; 21.17; Lew 20.9; Dut 5.16Miaŋgö keuŋi kun kewö: Mosesnöŋ kewö jim kutuyök, ‘Iwinamgi mönö göda qem etkimakŋan,’ aiga ‘Kunŋan iwiŋi me namŋi qesuahömawi, i mönö qegetka kömuma.’ 11 Mewö jim kutuyökmö, iŋini keu mi oŋgita kewö jimakze, ‘Kunŋan iwinamŋi yetköra kewö jima. Wösöni mötzal. Nöŋgö naŋgönaŋgö yuaini buŋa qem aŋgubahorak, mi lök Anutugö daŋge tahaya albi ahöza. Mi saiwap naluköra kewöta albi ahöza. 12 Kunŋan mewö jiiga dop kölma.’ Mewö jiba jöhöm waŋgigetka iwinamŋi yetköra baukbauk kun qahö toroqeba etkimakŋa. Mi qahö dop kölja. 13 Yei! Mewö aka nanŋini ahakmemeŋinaŋgö silikŋini jim kutuba miaŋön Anutugöreŋ jöjöpaŋ keu utala omaŋi aka pömsöm qemakza. Iŋini yuai mewöŋi gwötpuk ahakze.” Mewö meleŋ eŋgiyök. Mewö.

14 Jisösnöŋ ambazip kambu kunbuk eŋgoholi kagetka kewö jii mötket, “Iŋini mönö körek keu ki kezap ala möt asarime. 15 Azi yaigepŋeyök yuai uruŋe gemakzawi, miaŋön mönö tölohom waŋgimamgö osimakzapmö, nanŋi urukönömŋeyök keu kota erakzawi, miaŋön mönö tölohom waŋgimakza. 16 Kunŋan kezapŋambuk malja ewö, yaŋön mönö keu ki kezap ala möt kutuma.” Mewö.

17 Jisösnöŋ mewö jiba ambazip kambu eŋgömosöta anda miri kunöŋ öŋgöyök. Öŋgöba tariga gwarekurupŋan dopkeu miaŋgö könaŋaŋgöra qesiget. 18 Qesigetka kewö jii mötket, “O alaurupni, iŋini mewöyök mötmötŋini ölöpŋi qahö akze me? Nene yuai azi yaigepŋeyök uruŋe gemakzawi, mi tölohom waŋgimamgö osimakza. Mi möt kutuze me qahö? 19 Mi urukönömŋe qahö gemakzapmö, kömgokŋe geba yaigep erakza.” Jisösnöŋ keu mewö jiba miaŋön “Numbu nene pakpak mem sarahim teköyök.”

20 Jisösnöŋ toroqeba kewö jiyök, “Azi urukönömŋeyök keu kota erakzawi, miaŋön mönö tölohom waŋgimakza. 21 Ambazip uru könömŋineyök yuai kewöŋi asuhuba korakza: Keu bölöŋi mötmöriba serowilin akingö mörakze. Yoŋgorö memba suŋa jinaŋ memba ambazip eŋguget kömumegö mörakze. 22 Qesabulum akingö mörakze. Membagu membingö nepaqepalok köpösöŋgömakze. Bidaŋda gatmisimisi, jiliwitiŋ aka isimkakalek akingö mörakze. Lösö jiba urupik akingö mörakze. Kezapjupjup aka körögisigisi akingö mörakze. Söŋgöröqök mala andöqeqe keu yöhösaŋ jiba Anutu mepaiköbingö mörakze. Jakbak-öraŋböraŋ aka uruqahö ahakze. 23 Yuai bölöŋi pakpak miaŋön mönö ambazip uru könömŋineyök kota ambazip tölohom eŋgimakza.” Mewö.

24 Jisösnöŋ wahöta Genesaret gölme mosöta siti qetŋiri Taiö aka Saidon mietkö distrik qetŋi Fonisia miaŋgö uruŋe anök. Anda miri kunöŋ öŋgöba buzupŋi kunŋan mötpapuköra numbuŋini muhungöyökmö, töndup tölapŋe malmamgö osiyök. 25 Osiiga miaŋgöreŋök ambi kun böratŋi moröŋan ömeŋambuk maliga Jisösgö buzupŋi möta yaŋgöreŋ kaba könaŋe geba simin kölök. 26 Ambi mi Judaya qahöpmö, Grik keu jiba malök. Iwinamŋan Siria prowinsgö Fonisiagöra. Yaŋön böratŋaŋgö uruŋeyök öme közölmapköra ulet waŋgiyök. 27 Ulet waŋgiiga kewö jii mörök, “Juda nini mutuk nanine nahönböraturupnini gumohom eŋgiinga bikŋi eŋguma. Miaŋgöra morö yeŋgö miriŋineyök beret memba kiam eŋgiinga qahö dop kölbapuk. Juda nini kianurup eŋgö qetŋini kiam qerakzin. Nöŋön mutuk Juda ambazip bauköm eŋgibiga kantri tosatŋi eŋön mönö kiamgö dop mamböta malme.”

28 Mewö jii möta kewö meleŋnök, “Kembu, mi ölöp mötzalmö, kiam moröŋi yeŋön mönö mewöyök morö yeŋgöreŋ nene boromŋi tebol bapŋe eriga nemakze.”

29 Mewö meleŋniga Jisösnöŋ kewö jii mörök, “Keu mewö jizanaŋgöra ölöp möt gihizal. Öme miaŋön mönö dölki böratki mosöta anja. Miaŋgöra ölöp anman.”

30 Mewö jii möta miriŋe ani ömenöŋ böratŋi mosöriga dumŋe ahöiga ehök. Mewö.

31 Jisösnöŋ kunbuk Taiö siti gölme mosöta Saidon sitinöŋ anda oŋgita mösököba Ten-taon gölmegö bibiŋi oŋgita Galiligö o aŋgö kösutŋe kayök. 32 Kaiga kezapduhup azi kun keuŋi qahöwakŋapköra ahöhi, mi waŋgita Jisösgöreŋ kaget. Kaba böröŋi nöröpŋe almapköra qesim waŋgiget. 33 Qesim waŋgigetka azi mi waŋgita ambazip kambu mosöta kungen anohot. Anda Jisösnöŋ börö suapŋi kezapŋe ala kinda kunbuk nanŋi börö suapŋe söutköba nesilamŋe misiriyök. 34 Misiriba suepnöŋ ui öŋgöiga osoŋgombuk köuluköba nanŋe keunöŋ “Efata,” nanine keunöŋ Tohonöŋ! mewö jiyök.

35 Mewö jiiga kezapyahötŋan tohoyohotka nesilamŋan lolohoiga keuŋi ölöpŋanök jiyök. 36 Jiiga Jisösnöŋ miaŋgö buzupŋi ambazip jiget mötpepuköra qetal eŋgiyök. Qetal eŋgiba kapaŋ köliga yeŋön mi kapaŋ köla jim sehiba malget. 37 Jim sehiba malgetka ambazipnöŋ kamböŋda welipköba kewö jiget, “Yuai pakpak ölöpŋanök ahakza. Kezapduhup kezapŋini metohoiga mötketka ambazip mötökŋi yeŋgö nesilamŋini pösariga keu jimakze.” Mewö.