1  * Dan 7.3; Ind 17.3, 7-12; Dan 7.4-6Miaŋgö andöŋe jemnemba kun ilikŋi 10 aka nöröpŋi 7 mi köwetnöhök koriga ehal. Ilikŋi 10 miaŋgöreŋ ila jalö 10 kölgetka tatket aiga nöröpŋi mohot mohot miaŋgöreŋ qet mepaqepaikŋinambuk ohogetka ahöyök.

2 Jemnemba mi ekiga kewö ahök: Kaisoŋgolomŋi mi lepad taigögö tandök ewö ahök. Köna böröŋaŋgö sölöpŋi mi beö sömbupkö sölöp ewö ahök. Numbuŋi mi laion sömbupkö numbuŋi ewö tandök. Sekak namŋan mönö ösumŋi, jakömbuak dumŋi aka ambazip galöm köl eŋgimapkö kukösumŋi öŋgöŋgöŋi mi jemnemba waŋgiyök. 3 Waŋgiiga nöröpŋi kun mi uzi köhöikŋi kunöŋ mei kömumawaŋgö dop ahökmö, uziŋan misiriiga löpötŋanök tarök. Gölmegö ambazip körek pakpak yeŋön auruba jemnemba mi andöŋe wuataŋgöba anget. 4 Wuataŋgöba anda sekak namŋaŋgö waikŋi memba möpöseiba malget. Kukösum mewöŋi mi jemnemba waŋgiyöhaŋgöra i aka jemnembagö waikŋi mewöŋanök memba möpöseiba kewö jiget, “Daŋön jemnembagö dop akawak? Daŋön i tuarenjoŋ ak waŋgiba yambuk aumamgö köhöibawak?”

5  * Dan 7.8, 25; 11.36Mewö jigetka Satanöŋ jemnembagö numbuŋi sölölöhöiga köhöiba jakbak-öraŋböraŋ qakŋe mepaqepaik keuŋi laŋlaŋ jiba malök. Anutunöŋ Satan qahö aŋgön köliga ilitmamgö kukösumŋi mi köiŋ 42 miaŋgö dop ahöm waŋgimapköra jim teköyök. 6 Mi jim teköiga numbuŋan aŋaŋiiga Anutu ilita malök. Anutugö qetŋi, Suep miriŋi aka Suep uruŋe maljei, mi pakpak mönö mepaqepaik ak eŋgiba malök. 7  * Dan 7.21Mewö maliga Satanöŋ ambazip sarakŋi tuarenjoŋ ak eŋgimamgö kukösumŋi waŋgiiga yembuk bim auba luhut al eŋgiyök. Luhut al eŋgiiga Satanöŋ ambazip isikŋini pakpak kambuŋinaŋgö dop, keu tandökŋinaŋgö dop aka kantriŋinaŋgö dop mi mönö jemnembagö böröŋe al eŋgiyök.

8  * Sum 69.28Ambazip körekmakörek gölmenöŋ maljei, yeŋön mönö jemnembagö waikŋi memba möpöseiba malme. Anutugö ambazip solanŋi qetŋini Suep mire papianöŋ ohoget ahözawi, yeŋönök mönö jemnemba mi qahö möpöseime. Möpŋaŋgö möpŋe Anutunöŋ Suep gölme miwikŋaim etkiyöhi, nalö miaŋgöreŋök könahiba qetŋini mi malmal köhöikŋaŋgö papia miaŋgöreŋ ohoba mala kotket. Malmal papia mi Lama moröŋi qeget kömuyöhi, mönö yaŋgö buŋaŋi ahöiga galöm kölakza.

9 “Kunŋan kezapŋambuknöŋ malja ewö, yaŋön mönö keu ki kezap ala möt kutuma! 10  * Jer 15.2; 43.11Kun kösö mire anmawaŋgö dop akzawi, yaŋön mönö miaŋgöreŋ anma. Kun bimgö sou ketaŋan ugetka kömumawaŋgö dop akzawi, yaŋön mönö mewö kömuma.* Tosatŋan keu mi kewö meleŋje: Kunöŋ bimgö sou ketaŋi (bainat) miaŋön tosatŋi eŋguiga kömumei, tosatŋan mönö nanŋi mi sou mewöŋan ugetka kömuma. Miaŋgöra ambazip sarakŋi, eŋön mönö kapaŋ köla lömböt memba mökösöŋda pöndaŋ möt nariba malme.” Mewö.

11 Kunbuk ekiga jemnemba kun gölme uruŋeyök korök. Mi ilikŋi yahöt Lama moröŋaŋgö ilikŋi ewöya aka keuŋi mi sekak namŋi ilikŋambuknöŋ jiyöhi, mönö mewöŋanök jiba malök. 12 Yaŋön kota alaŋi mutukŋaŋgö jitŋememeŋi aka kukösumŋi pakpak memba miaŋön yuai pakpak alaŋaŋgö jeŋe ahök. Mewö aka gölme ambazip kuŋguba sölölöhöm eŋgiiga auruba alaŋi mutukŋaŋgö waikŋi memba möpöseiget. Jemnemba mutukŋi mi uzi köhöikŋan mei kömumamgö ahökmö, misiriiga löpötŋanök tarök.

13 Jemnemba yahötŋi yaŋön aŋgöletot ketaŋi tandökŋi könaŋi könaŋi meyök. Kun meyöhi, mi könöp bölamnöŋ suepnöhök eta gölmenöŋ kaba jeiga ambazipnöŋ mi jeŋinan eket. 14 Anutunöŋ Satan qahö aŋgön köliga kukösum waŋgiiga jemnemba mutukŋaŋgö jitŋememeŋi aka yaŋgö jeŋe aŋgöletot könaŋi könaŋi memba malök. Miaŋön mönö gölmegö ambazip tilipköm eŋgiiga jaŋjuŋ aka sohoget. Sohogetka kewö kuŋguba jim kutum eŋgiyök, “Iŋini mönö jemnemba mutukŋaŋgö imutŋi söhöba kuŋguget kiniga göda qem waŋgiba malme. Jemnemba mutukŋi mi bimgö sou ketaŋan (bainat) qegetka uzi mei kömumamgö dop ahökmö, töndup guliba maljawi, mönö yaŋgö imutŋi kuŋgume.”

15 Mewö aketka Satanöŋ kukösum jemnemba könaŋgepŋi waŋgiiga tandö lopioŋ mi mem gulim waŋgiiga könahiba söŋgörö-ösum alök. Mewöyök jemnemba mutukŋaŋgö imutŋi mem letoriga azi keu jiba ambazip kuŋgum eŋgiiga kewö asuhuyök: Denike yeŋön tandö lopioŋ miaŋgö waikŋi qahö memba möpöseigeri, i mönö körek eŋgugetka kömuget. 16 Jemnemba könaŋgepŋan ambazip körek pakpak kewö kuŋgum eŋgiba jiyök, “Iŋini mönö jemnemba mutukŋaŋgö muŋgem supapŋi mi jemesoholŋine me böröŋini ölŋe mekötahöme.” Mewö jiiga nanŋini nupŋini memakzei aka toŋinaŋgö welenŋini öne qemakzei, ambazip pomŋi aka wanapŋi, ketaŋi aka moröŋi yeŋön mönö körekmakörek muŋgem supapŋi mi memba sileŋine mekötahöba kösöget.

17 Denike yeŋön jemnembagö qetŋi me qetŋaŋgö jaŋgöŋi sileŋine qahö memba malgeri, yeŋön mönö nene yuai stuanöŋ me maketnöŋ söŋgöröŋi membingö aka albingö osiget.

18 Keu ki möt asaribingö mötkutukutuŋi kewö: Kunŋan mötkutukutuŋambuk maljawi, yaŋön mönö jemnembagö jaŋgöŋi oyoŋma. Jaŋgöŋi mi gölme azigö jaŋgöŋi akza. Supap jaŋgöŋi mi 666. Mewö.