Polnöŋ Korint yeŋgöra Kimbi mutukŋi alök..
1.
Kraist Jisösnöŋ Pol ni noholiga Anutugö jitŋaŋgö dop melaimelai azi aposol akzal. Nöŋön urumeleŋ alani Sostenes yambuk tatzit. 
Anutugöreŋ könagesö Korint sitinöŋ maljei, nöŋön embuk Buŋa keu eraum mötpingöra kazal. Kraist Jisösnöŋ iŋini eŋgoholiga yambuk qekötahögetka tök kutum eŋgiiga sarakŋi akze. Mewöyök ambazip denike yeŋön gölme dop Kembunini Jisös Kraistkö qetŋi qeta köulukögetka i aka nini mohok kembu ak neŋgimakzawi, mönö körek eŋgöra Buŋa Kimbi ki ohozit. 
Anutu Iwinini aka Kembu Jisös Kraist yetkön mönö kalem möriam eŋgiyohotka luainöŋ malme. Mewö. 
Iŋini Kraist Jisösbuk qekötahöba kingetka Anutunöŋ kalem möriamŋi eŋgiyöhi, miaŋgöra mönö nalö dop eŋgöra Anutuni saiwap jiba möpöseimakzal. 
Iŋini Kraistpuk qekötahöba kingetka nup memegö mötmöt kalemŋi keleŋmaleleŋ eŋgiiga mötmöt könaŋi könaŋi buŋa qem aŋguba ölöp Buŋa keugö könaŋi pakpak jimakze. 
Nini Kraistkö könaŋi naŋgöba jiinga keu miaŋgö ölŋan ahuba köhöii kinjeaŋgö dop mötmöt kalem pakpak mi eŋgiyök. Miaŋgöra Anutu möpöseimakzal. 
Miaŋgöra nup memegö mötmöt kalem kungöra qahö osiba kinda Kembunini Jisös Kraistnöŋ kunbuk asuhumapköra mambörakze. 
Kembunini Jisös Kraistnöŋ mem köhöim eŋgiiga nalö teteköŋe aukŋe asuhumawi, nalö miaŋgöreŋ iŋini solanŋi aka keuŋini qahö kinda i ekŋe. 
Anutunöŋ keuŋi törörök wuataŋgöba bauköm eŋgimakŋa. Yaŋön iŋini nanŋi Nahönŋi Jisös Kraist Kembuninambuk toroqeba malmegöra eŋgoholök. Mewö. 
O urumeleŋ alaurupni, nöŋön Kembunini Jisös Kraistkö qetŋe kewö uru kuŋgum eŋgizal: Iŋini mönö körekŋanök urumohot aka sutŋine jujul kude aka malmemö, uruŋini mindirigetka mohot aiga mötmöt mohot wuataŋgöba malme. 
O urumeleŋ alaurupni, iŋini sutŋine aŋgururuk gwötpuk aka maljei, miaŋgö buzup keuŋi ambi Kloegö saiwaurup tosatŋan mönö jigetka möral. 
Kewögöra mi jizal: Eŋgöreŋök tosatŋan kewö jimakze, “Neŋön Polgö keuŋi wuataŋgömakzin.” Tosatŋan “Neŋön Apolosgö keuŋi wuataŋgömakzin,” jimakze. Toroqeba tosatŋan kewö jimakze, “Neŋön Pitögö keuŋi wuataŋgömakzin.” Dumŋe kunbuk tosatŋan kewö jimakze, “Neŋön mönö Kraistkö keuŋi wuataŋgömakzin.” 
Kraistnöŋ jula gwötpuk ahök me? Pol nöŋön mönö eŋgöra aka maripomnöŋ kömuyal me? Pol nöŋgö qetne o melun mem eŋgiget me? Mewö möt sohobepuk? 
Nöŋön eŋgöreŋök Gaius aka Krispus o melun mem etkialmö, tosatŋi mi qahö mem eŋgialaŋgöra “Anutu saiwap!” jizal. 
Miaŋgöra “Polgö qetŋe o melun mem neŋgiget,” kunŋan keu omaŋi mewö jibapuk. 
O ölŋa, Stefanas aka yaŋgö saiwaurupŋi mi mewöyök o melun mem eŋgialmö, yeŋgö andöŋine kun o melun mem waŋgial me qahöpto, mi törörök qahö mötzal. 
Kraistnöŋ ni ambazip o melun mem eŋgimamgöra aka qahö melaim niŋgiyökmö, Ölöwak Buŋa jim sehimamgöra jiiga anda kamakzal. Kraistnöŋ neŋgöra aka maripomnöŋ kömuyöhi, nup miaŋgö ösumŋan eta omaŋi akapuk. Miaŋgöra Buŋa keu mi gölme azigö mötkutukutu qakŋe laŋ qahö jimakzal. Mewö. 
Ambazip könöp siagö buŋaya akŋei, yeŋön maripomŋaŋgö Buŋa keuŋi möta miaŋgöra mötket uruqahö keuya akza. Mewö akzapmö, Suepkö buŋaya akzini, neŋgöra keu miaŋön mönö Anutugö kukösumŋi indeli mörakzin. 
Miaŋgö keuŋi Buŋa Kimbinöŋ kewö ohoget ahöza, “Nöŋön mötmöt ambazip mötkutukutuŋini köndeŋbiga sohoma. ‘Möt asarim yakömakzin,’ jimakzei, yeŋgö mötmötŋini mönö mem sohobiga sörörauba omaŋi akŋa.” 
Mötkutukutu ambazip ölŋi mi denike malje? Buk oyoŋda mötmötkö könaŋi miwikŋaigeri, mi denike? Gölmenöŋ jitnakölikö böhi aka keu meleŋqeleŋda jimakzei, mi mönö ölŋa qetpuk akze me? Gölmenöŋ mötkutukutu ketaŋi ahözawi, Anutunöŋ mönö mi mem kaheiiga (sahahaiiga) uruqahö mötmöra akza. Keu mi ölŋa. 
Anutunöŋ nanŋi mötkutukutuŋaŋgö dop gölmenöŋ malmalgö areŋi alökmö, ambazipnöŋ nanŋini mötkutukutuŋine naŋgöba mewö miaŋön Anutugö könaŋi möt kutubingö osiba tönpin malget. Osiba mala Kraistnöŋ maripomnöŋ kömuyöhi, miaŋgöra “Uruqahö keuya!” jiba mötketmö, Anutunöŋ Buŋa keu mi neŋön jim sehibingöra jiyök. Mi jim asariinga denike yeŋön uruŋini meleŋda möt narizei, mi dom-amöt qem eŋgimamgö möri dop kölök. 
Juda yeŋön aiwesök aŋgöletot asuhumegöra kapaŋ kölakzemö, Grik kantri yeŋön mötkutukutuŋinan sehimapköra jarumakze. 
Mi jarumakzemö, neŋön Kraist maripomnöŋ qeget kömuyöhaŋgö Buŋa keuŋi jim sehimakzin. Juda yeŋön keu mi mötketka uruŋini böliiga miaŋgöreŋ qaköba uruŋini qahö meleŋmakze. Kian kantri yeŋön miaŋgöra mötketka uruqahö keuya akza. 
Gwötpukŋan mewö mötzemö, Anutunöŋ neŋgoholi urunini meleŋnini, neŋgöra Kraistnöŋ mönö Anutugö mötkutukutuŋi indela Anutugö kukösumŋi neŋgimakza. Juda me kantri tosatŋi akzini, mi töndup Kraistpuk qekötahöba kinda mohot akzin. 
Ambazip neŋgö mötkutukutunini aka ösumnini mi eretŋi. Anutunöŋ uruqahö akawak, miaŋön mönö töndup ambazip mötkutukutunini oŋgita öŋgöŋgöŋi ketaŋi akawak. Anutunöŋ lölöwöröŋi akawak, miaŋön mönö töndup ambazip ösumnini oŋgita köhöikŋi kötökŋi akawak. 
Urumeleŋ alaurupni, nanŋini könaŋini denöwö ahöiga Anutunöŋ eŋgoholöhi, mi mötmöriget? Iŋini gwötpukŋan gölmegö mötkutukutu ketaŋi qahö memba malget. Gwötpukŋan kukösum qakŋe sukinapŋinambuk qahö malget. Iwiurupŋini gwötpukŋan qetbuŋaŋinambuk qahö malget. 
Mewö qahöpmö, gölme ambazipnöŋ eŋgöra mötketka uruqahö ambazip omaŋi akzei, Anutunöŋ mönö iŋini mewöŋi möwölöhöm eŋgiyök. Gölmegö mötmöt ambazip ipŋi mi gamu qem eŋgiyök. Gölme ambazipnöŋ eŋgöra mötketka lölöwöröŋi akzei, Anutunöŋ mönö iŋini mewöŋi möwölöhöm eŋgiyök. Gölmegö kukösum ambazip ipŋi mi gamu qem eŋgiyök. 
Gölme ambazipnöŋ jijiwilit ak eŋgiba könaŋinaŋgöra mötketka etqeqeŋi akzei, Anutunöŋ mönö iŋini mewöŋi möwölöhöm eŋgiyök. Gölmenöŋ yuai akzei, yeŋgö qetbuŋaŋini mem solanii qahöwakŋapköra yuai kun qahö akzei, mönö mi möwölöhöm eŋgiyök. 
Kunöŋ Anutugö jemesoholŋe sileŋi memba öŋgöbapuköra mönö mewö meköba möwölöhöm eŋgiyök. 
Anutunöŋ nam köl eŋgiba eŋguaŋgiriga Kraist Jisösbuk qekötahöba mal köhöimakze. Yaŋön Anutugö mötkutukutuŋi qainŋi kun indeli mörakzin. Kraistnöŋ sohopnini memba keunini jim teköi solaniba maljin aka tök kutum neŋgiiga sarakŋi akzin. 
Buŋa Kimbinöŋ keu kewö ohoget ahöza, “Kunŋan sileŋi memba öŋgömawi, yaŋön mönö Kembu möt waŋgizawaŋgöra aka sileŋi mem öŋgöma.” Keu miaŋgö dop ahinga dop kölma. Mewö.