5
1 Grandomri na sma di kmopo na mindri fu libisma èn di poti fu go gi den na fesi Gado fu tyari presenti nanga offer gi den sondu fu libisma. 2 A kan abi pasensi nanga den sma di no e ferstan a bribi èn di lasi pasi, fu di en srefi abi swakisei. 3 Dat' meki a abi fu tyari offer gi den sondu fu a pipel, ma owktu gi en eigi sondu. * Lev 9:7 4 Èn no wan sma man tron grandomri fu di en srefi wani. Ma na Gado mus kari en soleki fa A ben kari Aaron. * Ex 28:1
5 So owktu Kristus no suku a grani gi Ensrefi fu tron grandomri. Ma Gado ben taigi En taki:
Yu na Mi Manpikin,
tide Mi meki Yu kisi libi. * Ps 2:7
6 Na wan tra presi A ben taki:
Yu na priester fu têgo
na a fasi fu Melkisedek. * Ps 110:4
7 Di A ben de na grontapu, A begi Gado di ben kan yepi En fu A no dede. A bari èn A krei di A ben e begi, èn Gado yepi En fu di A ben abi dipi lespeki gi Gado. * Mat 26:36-46; Mrk 14:32-42; Luk 22:39-46 8 Awinsi A ben de a Manpikin fu Gado, A leri fu du san Gado wani ini a pina di A ben mus nyan. 9 Dan di A kon de leki fa a mus de, A tron a Wan di o ferlusu ala sma fu têgo di du En wani, 10 èn Gado kari En grandomri na a fasi fu Melkisedek.
Wi no mus drai go baka na a sondu libi
11 Wi abi furu fu taki fu a sani disi, ma a tranga fu brokobroko en gi unu fu di un no e ferstan sani es'esi moro. 12 Now un ben mus de leriman kba. Ma a de fanowdu baka fu sma leri unu den fos'fosi sani fu a boskopu fu Gado. Na merki un abi fanowdu prefu nyanyan. * 1Kor 3:2 13 Wan sma di e dringi merki, na wan nyunyun pikin di no sabi san na bun noso ogri. 14 Ma nyanyan srefi na fu bigisma di kon leri sabi san na bun noso ogri.