12
Maria kanti switismeri-oli na tapu Yesus futu
1 Siksi dei fosi a Paskafesa, Yesus doro na Betania pe Lasarus ben e tan, di A ben meki kon na libi baka. 2 Drape den hori wan fesa gi Yesus. Marta ben e yepi nanga nyansani èn Lasarus ben de wan fu den sma di ben de na tafra nanga En. 3 Dan Maria teki wan afu liter diri switismeri-oli san ben meki fu nardus rutu. A kanti a oli na Yesus futu dan a drei den nanga en edewiwiri. A switi smeri fu a oli panya ini a heri oso. * Luk 7:37-38
4 Ne Yudas Iskariot, a man fu Yesus di bo seri En bakaten, taki: 5 “Fu sanede un no seri a oli disi gi dri hondro solfrumoni, dan un prati a moni gi pôtisma?” 6 A no taki disi fu di a ben prakseri den pôtisma, ma fu di a ben de wan fufuruman. Na en ben hori a moni, èn a ben gwenti fu teki gi ensrefi.
7 Dan Yesus taki: “Un libi en. A ben kibri a oli disi fu meki Mi klari fu Mi beri. 8 Pôtisma de ala ten nanga unu, ma Mi no o de ala ten nanga unu.” * Deut 15:11
9 Wan bigi grupu Dyusma ben kon yere tak' Yesus de na Betania. So den go drape, ma a no fu Yesus wawan. Den ben wani si Lasarus tu, di A ben meki kon na libi baka. 10 Dan den prenspari domri meki mofo fu kiri Lasarus tu, 11 bika fu en ede furu fu den Dyu ben libi den, dan den bribi ini Yesus.
Fa Yesus doro na Yerusalem
12 A tra dei fu en a bigi grupu sma di ben kon na a fesa yere tak' Yesus e kon na Yerusalem. 13 So den koti palmtaki, dan den waka go miti En. Den ben e bari taki: * Ps 118:25-26
Hosana!
Blesi de tapu a Wan
di e kon ini a nen fu Masra!
Blesi fu a Kownu fu Israel!
14 Yesus si wan yongu buriki, dan A go sidon na en tapu. A psa leki fa a skrifi taki:
15 Sma fu Yerusalem, no frede!
Luku, yu Kownu e kon.
A e sidon tapu wan yongu buriki. * Zach 9:9
16 Di den sani disi psa, den man fu Yesus no ben ferstan ete san den ben wani taki. Ma baka di Yesus opo go na heimel, dan fosi den memre tak' den sani disi ben skrifi fu En, èn tak' den du den sani disi nanga En.
17 Di Yesus kari Lasarus kmoto fu a grebi meki a kon na libi baka, wan bigi grupu sma ben drape. Den sma dati ben e ferteri trawan fu a sani disi. 18 Fu dat'ede furu sma waka go miti En, bika den ben yere fu a marki san A ben meki den sma si. 19 Ne den Fariseiman taigi makandra taki: “Un e si tak' noti san un du e yepi. Luku, heri grontapu e waka na En baka!”
Yesus e taki tak' A mus dede
20 Na mindri den sma di ben go fu anbegi Gado na a Paskafesa, yu ben abi wantu Grikisma. 21 Den man disi go na Filipus, di ben kmoto fu Betsaida ini Galilea, dan den aksi en taki: “Masra, un wani si Yesus.”
22 Dan Filipus go taigi Andreas, dan den ala tu go taigi Yesus. 23 Yesus piki den taki: “A yuru doro tak' a Manpikin fu Libisma mus kisi grani. 24 Fu tru Mi e taigi un taki: Efu wan ai padi no fadon na gron dan a dede, a e tan wan ai padi. Ma efu a dede, dan a e gi furu nyanyan. 25 A sma di lobi en libi, o lasi en. Ma a sma di no lobi en libi dya na grontapu, e kibri en fu a libi fu têgo. * Mat 10:39; 16:25; Mrk 8:35; Luk 9:24; 17:33 26 Efu wan sma e dini Mi, a mus waka na Mi baka. Dan pe Mi de, drape Mi knekti sa de tu. Efu wan sma e dini Mi, dan Mi P'pa sa gi en bigi nen.
27 Now Mi e sari. Mi no sabi san Mi mus taki. Mi kan aksi Mi P'pa fu puru Mi ini den sani di de fu kon, ma Mi kon fu psa den sani disi.” 28 Dan Yesus taki: “P'pa, meki Yu nen kisi grani!”
Ne wan sten taki kmoto fu heimel: “Mi gi en grani kba, èn Mi sa gi en grani baka.”
29 A bigi grupu sma di ben tnapu drape yere a sani. Sonwan fu den taki: “Na dondru bari.” Ma trawan fu den taki: “Na wan engel taki nanga En.”
30 Dan Yesus taigi den taki: “A sten disi no taki fu Mi ede, ma a ben taki gi unu. 31 Now a ten doro fu krutu grontapu. Now den o yagi a wan gwe di e basi a grontapu disi. 32 Ma te den opo Mi go na loktu, dan Mi sa hari ala sma kon na Mi.” 33 Yesus taki a sani disi fu sori den sma fa A o dede.
34 Ala den sma piki En taki: “A wèt e leri unu tak' a Mesias o tan fu têgo. Dan fa Yu kan taigi unu tak' den mus opo a Manpikin fu Libisma? Suma na a Manpikin fu Libisma dan?” * Ps 89:37; Ezec 37:25; Dan 7:14
35 Yesus piki den taki: “A faya de wan syatu pisten na un mindri ete. Un waka solanga un abi faya, fu a dungru no tapu un na pasi. A sma di e waka ini a dungru no sabi pe a e go. 36 Un mus fertrow a faya solanga a de nanga unu, fu un kan de pikin fu a faya.”
Di Yesus kba taki den sani disi, A gwe go kibri gi den.
Den fesiman no wani bribi
37 Aladi Yesus meki den sma si someni marki, toku den no ben wani bribi ini En. 38 Na so a sani san a profeiti Yesaya ben skrifi kon tru. A ben skrifi:
Masra, no wan sma bribi
a boskopu fu unu,
èn no wan sma ferstan
tak' a ben de Yu krakti. * Jes 53:1
39 Den sma no ben man bribi, bika Yesaya ben skrifi wan tra presi taki:
40 A tapu den ai,
èn A tranga den ati.
Noso den bo si nanga den ai
èn den bo ferstan nanga den ati
tak' den mus drai den libi
fu Mi kan dresi den. * Jes 6:10
41 Yesaya ben taki a sani disi bika a ben si a glori fu Yesus èn a ben taki fu En.
42 Toku furu fu den edeman srefi ben e bribi ini Yesus. Ma den no ben wani meki sma sabi, fu di den ben frede tak' den Fariseiman bo yagi den puru fu a Dyukerki. 43 Bika den ben lobi te libisma e gi den grani, moro leki te Gado ben e gi den grani.
44 Dan Yesus bari taki: “A sma di e bribi ini Mi, no e bribi ini Mi wawan, ma a e bribi tu ini a Wan di seni Mi kon. 45 A sma di e si Mi, e si a Wan di seni Mi kon. 46 Mi kon na grontapu leki wan faya, fu meki tak' den sma di e bribi ini Mi no tan ini a dungru. 47 Efu wan sma arki san Mi e leri, ma a no e du san Mi taki, Mi no o krutu en. Bika Mi no kon fu krutu grontapu, ma fu ferlusu grontapu. 48 Ma a sma di no wani Mi, èn di no e teki san Mi taki, abi wan sani di o krutu en. A wortu san Mi taki o krutu en tapu a laste dei. 49 Bika Mi no taki fu Misrefi, ma a P'pa di seni Mi kon, taigi Mi san Mi mus taki èn san Mi mus leri den sma. 50 Mi sabi tak' san Mi P'pa taki, e gi a libi fu têgo. Fu dat'ede Mi e taki leki fa a P'pa taigi Mi fu taki.”