1 Rahela ie ita ia nige merumeru i labasidi Iakobo arinai ena doga i aiaromagigiriei, i ribalau Iakobo arinai i ene: “Merumeru u ledima, e besi ea mate!” 2 Iakobo i ouyalayala Rahela arinai to i ene, “Eau bena Eaubada ena aba‐toro eai ea totoro, ia ede bogam uauana i nuahi?” 3 Abo Rahela i ene, “Te, egu heaheari sinena Bilaha wa, u lau arinai merumeru i labasidi eau nuanuagu eai, abo nanatuguyao ea abidi ia arinai.” 4 Arinai ena heaheari sinena Bilaha i mosei ie abi monena, eo Iakobo ie lau arinai. 5 Abo Bilaha ie boga, eo Iakobo arinai natuna tau i labasi. 6 Abo Rahela i ene, “Eaubada i heduduraigu’o, arinagu hinage i ataieyao to natugu tau i leama.” Arinai esana ie tore Dani. 7 Rahela ena heaheari sinena Bilaha i bogauio, eo Iakobo natuna helabuina i labasi. 8 Rahela abo i ene, “Haiabi lailai arinai ea haiabi maegu doga, hinage ea saepoi ina.” Arinai esana ie tore Napatali.

9 Lea i itayao i labalaba lautom arinai ena heaheari sinena Silepa i woeai i mosei Iakobo bena i abi monena. 10 Abotai Silepa Lea ena heaheari sinena wa Iakobo natuna tau i labasi. 11 Lea i ene, “I lolo ariri!” Arinai esana ie tore Gada. 12 Lea ena heaheari sinena Silepa abo Iakobo natuna tau helabuina i labasi. 13 Abo Lea i ene, “Egu kode ina! Paana sisine abo esagu se ribaei ‘Kode’.” Arinai esana ie tore Asa.

14 Sitona masurina huiana eai Reubena ie lau to gadosisi uauadi headi i lobaidi oea eai i ledima sinana Lea arinai. Abo Rahela Lea arinai ie riba i ene, “Ea aibodaim taba natum ena gadosisi uauadi headi u ledima.” 15 Na ia wa i heuio i ene, “U ene ginauri gagirina mo monegu arigu eai u woeahesuara, eo abo natugu ana uaua u abidi hinage?” Rahela i ene, “Besi maiona ta arim eai abo i eno, natum ana uaua maisadi.” 16 Iakobo maimailahi eai oea eai i laoma Lea i pesa i hailobai, i ene, “Abo u laoma arigu eai paana ea sagenaim’o, natum ena gadosisi uauadi aridi eai maisana ea tore?” To maiona eai ne ia maena se eno. 17 Eaubada Lea i ataiei, arinai ede ie boga to Iakobo natuna hehaligigina i labasi. 18 Lea i ene, “Eaubada egu maisa i leama’o, paana egu heaheari sinena ea mosei monegu arinai.” Abo esana ie tore Isakara. 19 Abo Lea i bogauio to Iakobo natuna tau hehaligigi‐esegana i labasi. 20 Abo Lea i ene, “Eaubada egu murihoi maisana arinai i ainauaigu, abotai monegu abo i heasisiegu, paana nanatunayao tatao haligigi‐esega enana ea labasidi.” To merumeru esana ie tore Sebulona. 21 Murina eai natuna siu i labasi esana ie tore Daina. 22 Abotai abo Eaubada Rahela i nuatui, eo i ataiei to i abiabi. 23 Ia hinage ie boga eo natuna tau i labasi, to i ene, “Eaubada egu taumaeamaea i abihai.” 24 To esana ie tore Iosepa, i ene, “Taba GUIAU natugu esau mo i leama!”

25 Rahela Iosepa i labasiyao, abo Iakobo i ribalau Labana arinai, enaba, “U hetamarigu, ea uio egu aba‐mia mamohoina eai, eo egu eanua tahunuana arinai. 26 Moneguyao eo nanatuguyao, debadi eai ea heayaiyem ta u ledima, to u buigabaegu, paana egu heaheari paisoana enam abina u ata’o.” 27 Na Labana i ribalau arinai, i ene, “Besi abo ea ribaei, heiheinoi headi aridi eai ea italabaiyao, hede oa debam eai GUIAU i ainauia aririegu. 28 Em maisa saha u ribaei abo ea leawa.” 29 Iakobo ena riba i heuio i ene, “Oabom abina u ata’o, egu abiheayayem ana ao, eo em bulumakau edi laulolo eau nimagu eai. 30 Paana sora nige ea laoma wa, em gogo i gagiri ariri, na abotai i lai ariri: aitea tupo ea lau hede GUIAU i ainauiaim. Na auiana abo eaubom nanatuguyao enadi ea paisoa?” 31 Labana i ene, “Saha bena ea leawa?” Iakobo i ene, “Taba nige saha u leama: teina mo enagu u ginauri, eau abo mamoe eawoina ea itawataiuioi eo ea heaiuioi, 32 Wauta bena em suisui eawoina wa ea taudadaidi, arinai mamoe wieadi uriuridi eo mamoe nanatudi dubadubadi ea woeahaidi, eo goti hinage uriuridi eo tupona se dubaduba ea abidi hinage, temeta mo abo egu maisa? 33 Arinai egu abidudulai abo i masaraha, huiana ne u laoma egu maisa u nonoi. Goti boeadi eai aisegadi nige uriuridi, eo mamoe aisegadi nige dubadubadi ena arigu eai u lobaidi abo u ene ea aieaharidi.” 34 Labana i ene, “I lolo! Em riba ta lauwatai.” 35 Na asubenana eai ne Labana goti tamoadi gamagaridi wieadi uriuridi, eo bawesinadi gamagaridi wieadi uriuridi, eo gamagaridi se posiposi eo se dubaduba, eo mamoe nanatudiyao dubadubadi, i abihaidi i toredi nanatunayao tatao nimadi eai bena se itawataidi. 36 To i woeahesuaradi edana lohana asubena haiona lauwasina ia eo Iakobo duaduaridi eai, na eawoina hagahagana wa Labana enana, isi Iakobo i heaidi.

37 Abo Iakobo oeagi headi lagadi eo opidi tupodi i opahaidi bena posiposi i masaraha. 38 Eo oeaoeagi tupodi se opadi wa i toredi mamoe edi aba henomdi eai, arinai eawoidi se laolaoma se nomnom. Se laoma se nom, to meta nanatudiyao edi huia hetubudi, 39 arinai oeaoeagi uriuridi wa matadi eai eawoidi nanatudiyao se hetubudi, to edi huia labalaba eai nanatudiyao se labasidi wa wieadi uriuridi mo, eo headi tupodi se dubaduba. 40 Abo Iakobo mamoe nanatudiyao i torehesuaradi, uriuridi eawoidi i hesanalaedi dubadubadi gamagaridi Labana eawoina arinai: eo ia ena eawoi i torehesuaradi eo Labana ena mamoe eawoina aridi eai nige se heboridi. 41 Eawoina eai wa mamoe e goti adiadidiridi edi huia bena nanatudiyao se hetubudi Iakobo wau oeaoeagi uriuridi i toredi matadi eai edi aba nomnom eai, bena metai oeaoeagi wa matadi eai nanatudiyao se hetubudi, 42 Eawoina wa tauberuberudi oeaoeagi wa nige matadi eai i toredi arinai abo beruberudi nanatudiyao isi ede Labana enanayao, adiadidiridi mo isi wa Iakobo enanayao. 43 Arinai tau ta i hemala taumonamonaune, ena mamoe eawoidi se gamagari, eo ena heaheari sisinedi eo ena heaheari tataodi, eo ena kamela eo ena asini.