1 Abo ena numa tauitawataina i lauhesom i ene, “Tatao edi baeki aiai arinai u hemonaudi, bena se monau komakomani, eo hinage tatao gamagaridi edi moni abo u toredi edi baeki awadi eai, 2 Abo egu bia, bia silver lolo aririna tau murita ena baeki awana eai u tore, eo sitona monina hinage.” Eo ia Iosepa ena riba i lauwatai. 3 Mara i uiari tatao wa se hetamaridi edi asini maediyao. 4 Eanua edi huia pesagabaena, na sora nige se sigilau, Iosepa i ribalau ena numa tanuagana arinai i ene, “U toro, u torohai, tatao wa u hemuriwataidi, eo ena u lagetawaidi abo u ribalau aridi eai doha ina, ‘Paana saha lolo au hemaisa baaea arinai? Paana saha egu bia silver au aiyahari? 5 Ina ta ede agu tanuaga ena aba nomnom saesaena eo arinai hinage maraitom asubena saha ena bena i tubu abo arinai i nuatulobai. Mamohoi baaea lailai au ginauri!’ ”

6 To numa tanuaga wa i lagetawaidi, abo ina riba ta i heribadi. 7 Abo si ene, “Paana saha egu guiau ina riba ta i ribaedi? Taba nige em heaheari tataodi doha ina se ginauri, nige ariariri. 8 U ita, moni wa ai lobaidi ema baeki awadi eai Kanana tanona eai ai uioidima, edohana abo em guiau ena numa eai ginauri silver eo gold ai aiyaharidi? 9 Ena em heaheari tauna esau arinai se lobai, i lolo abo i mate, na ai headi abo ai hemala egu guiau ena tatao auaudi.” 10 Abo i ene, “I lolo emi riba ta lauwataidi, ia arinai bia wa se lobai abo egu heaheari tauna, na omi headi nige ami gilu.” 11 Tatao gamagaridi edi baeki se toredobei heuraidi tano eai eo esau to esau ena baeki ie soe. 12 Abo ie eo’o taubaguna arinai i hetubu ie dobi e taumurita arinai, to bia wa se lobai Beniamina ena baeki eai. 13 To adi lulu se purisidi, eo tatao gamagaridi se aiusauio esau esau edi asini potadi eai, abo se uio eanua eai.

14 Abo Iuda maena tataoyao se laoma Iosepa ena numa eai na ia sora nei eai, to se gurisalaoba tano eai ia matana eai. 15 To Iosepa i ribalau aridi eai i ene, “Ina saha au ginauri? Nige abina au ata esau doha eau abo ginauri eamueamuidi ea nuatulobaidi?” 16 Abo Iuda i ene, “Edohana abo ai ribalau egu guiau arim eai? Abo saha ai ribaei? Edohana abo ai hedudulaiuioimai oa matam eai? Ina em heaheari tataomai Eaubada ema baaea i hemasarahadi. U itamai, egu guiau ena heaheari tataomai, ai, eo hinage ia wa ena baeki wa alona eai bia se lobai?” 17 Abo i ene, “Taba nige ariariri doha meta, na tau wa ia nimana eai bia ta se lobai, ia abo egu heaheari tauna, na omi ma nua tarumiu abo au uio tamamiu arinai.”

18 Abo Iuda i hanahanau ia arinai, i ene, “O egu guiau e, em heaheari tauna i aiboda bena riba esau ea ribaei egu guiau beana eai, eo tabu nuam i alasi em heaheari tauna arinai; paana oa gonogonoana doha Parao. 19 Egu guiau i hesiolaoma ena heaheari tataodi aridi eai, i ene, ‘Tamamiu e nige’e? Emi tau e nige’e?’ 20 Abo egu guiau ai heriba ai ene, ‘Mamohoi ai tamamai, i tautaubada, eo ema taumurita ena huia tautaubada eai natuna gagirina. Ena tau hinage ie mate, na iabom ie mia sinana wa enana, eo tamana i gadosisie’. 21 Abo em heaheari tataodi u heribadi, ‘Au dobeyama arigu eai bena abo matagu eai ea ita.’ 22 To egu guiau ai heriba, ‘Gama wa taba nige tamana i laugabaei, paana ena tamana i laugabaei abo tamana i mate.’ 23 Abo oa em heaheari tataodi u heribadi, ‘Ena ami taumurita nige maemiu au dobima taba nige matagu au itauioi.’ 24 Huiana wa aie lage em heaheari tauna tamamai arinai, egu guiau ena riba ai heribayao. 25 Abo tamamai i ene, ‘Au dobiuio aiai ada begana au uneune.’ 26 To ai ene, ‘Taba nige ai dobi. Ena ama taumurita maemai abo ai dobi, paana taba nige tau wa ana ao ai ita ena ama taumurita nige maemai.’ 27 Abo tamamai em heaheari tauna, i ribalaoma arinai eai i ene, ‘Abina au ata’o, monegu nanatuguyao labui i labasidi enaguyao; 28 esau i laugabaegu, to ea’ne nuana se purisigorigoriyao, eo nige ea itauioi. 29 Ena ina natugu ta hinage au abihai arigu eai eo baaea i hearo, abo ma hougu, eo ma dougu, au woeadobegu mate dimona eai.’ 30 Arinai taba nige ea lage tamamai, em heaheari tauna, arinai ena gama wa nige maemai, paana ia ena mauri, eo gama wa ena mauri se auesegaidi. 31 Abo i tubu doha ina, ena i ita gama wa nige maemai abo i mate, eo ai, em heaheari tataomai abo tamamai, em heaheari tauna, ma houna eo ma douna abo ai woeadobei mate dimona eai. 32 Paana eau, em heaheari tauna, gama porohena ea bahei tamagu arinai, ea heriba ea’ne, ‘Ena nige ea woeauioiyama arim eai abo giruna ea bahei tamagu matana eai i lau e nige mosina.’ 33 Arinai ea awanorilaowa bena em heaheari tauna i bawa gama wa helaudamaina bena egu guiau ena tauauau. Hewari ta ena tataoyao abo i hemuriwataidi. 34 Paana edohana abo ea uio tamagu arinai ena gama wa nige maegu? Ata matagu eai ina iwala ta tamagu i hearo.”