1 Asubena haligigi‐esega sora pasova abo se abi, Iesu Betania eai ie lage, Lasaro wa ie mateo, eo mate eai Iesu i hetorouioi wa, ena aba mia. 2 Nei eai maimailahi eai aiaigogo ia enana se ginauri; Mareta ia adi tau soi: Lasaro isi maedi se bawasega hatahata eai. 3 Maria nado pauna esega ie abi, maisana i lai ariri, Iesu aena arinai i heyausidi, aena hinage uruna maiawana arinai i saudi: nado panena numa i laugirihai. 4 Ena heaheata esau Iuda Isakariota, Simona natuna, ia abo taumoruina ede, i ene. 5 “Ina nado ta ie saha nige se uneunei, denari handere haiona se abidi, abo si mosei gogogesagesa aridi eai?” 6 Gogogesagesa wa nige i nuatuidi; ina riba ta ie ribaei paana ia tauaiaiyahari, eo edi tobo tauabina, eo ginauri tobo alona eai tauitawataina. 7 Iesu abo i ene, “Sine me i otawa: edi huia toregu asubenana i nuatunonohai. 8 Gogogesagesa wa huia gamagari arimiu eai se mia: eau nige ea miamiadaoi maidamiu.”

9 Iudea tataodi gamagaridi abo se nuatui Iesu nei eai ie mia: nige se laoma Iesu mo debana eai, na bena hinage Lasaro se ita, iaede Iesu mate eai i hetorouioi wa. 10 Kohena lailaidi se oioiriba bena Lasaro hinage se unui. 11 Paana ede ia debana eai Iudea gamagaridi se lausuara, eo Iesu se awamamohoiei hinage.

12 Mara‐ie‐tom tatao gamagaridi mataasi hesabana se laolaoma, wasa se ataiei Iesu abo i laoma Ierusalema eai. 13 Bagadi se worahaidi, se abidi ia se laubagibagini, se eogayoga, si ene, “Hosana! Isaraela edi wasawasa i lolo ariri, Guiau esana eai i loama.” 14 Iesu asini natuna i lobai, abo i bawasae potana eai, doha se uriyao, si ene. 15 “Siona natuna siu e, tabu u matausi: em Wasawasa i laoma, i bawasae asini natuna potana eai.” 16 Teina ginauri ta ena heaheatayao huia ne nige se nuatukomakomani: sora Iesu se hedebasae, abo nuadi se sae teina ginauri ta nabada wa se urinonohaidio, ia ede se ginauridi ia arinai hinage. 17 Tatao wa, ia maenayao lahinae Lasaro bousa eai i eogahai, eo mate eai i hetorouioi wa, isi ede ribana se wasaduaiei. 18 Arinai abo tatao ia se laubagibagini paana se ataiei teina heiheinoi gigiborina i ginauri wa. 19 Arinai Parisea tataodi isibom se ribariba si ene, “Au ita au ribariba awa mo? tanoubu ia abo se laugogoi.”

20 Heleni tataodi headi se laoma, bena mataasi eai ne se tabaohu. 21 Se laoma Pilipo arinai, ia Betesaida tauna, Galilaia tehana eai, edi gadosisi si ene, “Taubada e, ai henua bena Iesu ai ita.” 22 Pilipo i lau Anederea i heriba: eo Anederea maena Pilipo Iesu abo se heriba. 23 Iesu i heuioidi i ene, “Huiana i lagemao, Tau Natuna abo se hedebasaei. 24 Mamohoi, mamohoi ea heribamiu ta ea ’ne, Sitona uauana ena nige i beu tano boeana eai, eo i mate, iabom mo i ota: ena i mate, abo aiaina gamagaridi i toredi. 25 Ia maurina i gadosisiei ia maurina abo i tauyamui: ia tanoubu eai ta maurina i nuagabaei, mauri abo i abi i lau e nige nosina. 26 Taba tau esau i heaeaiegu, ia abo i hemuriwataigu: eau haedi egu aba mia, egu heaheari wa nei eai abo i mia hinage: taba tau esau i heaeaiegu Tamagu ia abo i hedebasaei.

27 “Abo ina mo ea nuadubu ariri; abo ea ’ne aisana? ‘Tamagu e, ina awa eai ta u hemaurigu?’ na nige’e, hesabana ede teina awa ta ea hearo. 28 Tamagu e, esam u hedebasaei.” Arina esau galewa eai i dobima i ene, “Ea hedebasaeyao, eo abo hinage ea hedebasaeuioi.” 29 Tatao wa, isi nei eai se totoro, se ataiei si ene parere ie oi: headi si ene “Aneru esau i ribalau ia arinai.” 30 Iesu i ribalau isi aridi eai i ene, “Wau arina wa eau nige agu riba, na omi debamiu eai i laoma. 31 Abo ina mo tanoubu ta se hekiraino: tanoubu ta wasawasana hinage abo se aiduiei. 32 Eau, tanoubu eai taba se abiisinigu, tatao gamagaridi abo ea niurigogoidima arigu eai.” 33 Ie riba ina doha, ia matena i hemasaraha. 34 Tatao se ribalau ia arinai si ene, “Laugagaeo eai ai ataieyao si ene, Keriso i mia mo i lau e, nige nosina: u ene edoha Tau Natuna abo se abiisini? Tau Natuna ne eai?” 35 Iesu abo i heribadi i ene, “Huia kuukuu mo marana i ota arimiu eai. Marana ma otana arimiu eai au laulau ata masigiri i hearomiu: paana ede ia masigiri boeana eai i laulau ena aba lau nige i nuatui. 36 Mara ma otana arimiu eai wa, marana au awamamohoiei, arinai abo doha mara nanatunayao au laulau.”

Teina riba ta Iesu i ribaedi, abo i laugabaedi, i tauyamui. 37 Ia heiheinoi gigibori gamagaridi i ginauridi isi matadi eai, taiede ia nige se awamamohoiei. 38 Arinai abo riba wa Isaia peroveta i ribaei se hemamohoiei, i ene, “Guiau e, ema wasa eai i awamamohoiei? eo eai arinai Guiau nimana se hemasaraha?” 39 Arinai sunumana nige abina se ata, paana Isaia i ribauio, i ene: 40 “Matadi i hegibudi, eo nuadi hinage i heoiuradi; arinai matadi eai taba nige se ita, eo nuadi eai taba nige se nuatulobai, ata nuadi se buidi, eo ea hemauridi.” 41 Teina riba ta Isaia i ribaedi, ena hedebasae i itayao eo ia ede i ribaribaei. 42 Babada udodoi mo peledi boeadi eai se gamagari ia se awamamohoiei; taiede nige se wasawasaei paana ede Parisea tataodi, ata sunago eai se aiduiedi: 43 isi tatao mo edi ribatausae se gadosisiei: Eaubada ena ribatausae nige se gadosisiei doha.

44 Iesu abo i eoga i ene, “Ia i awamamohoiegu, eau nige i awamamohoiegu, na tauhetamariguma i awamamohoiei. 45 Eo ia i itagu, tauhetamariguma ie ita hinage. 46 Ea laoma ta tanoubu tautuihemarana ede, arinai ena esa esa i awamamohoiegu taba nige i miahai masigiri eai. 47 Ena tau esau egu riba i ataiedi, hinage nige i awamamohoiedi, ia nige ea hegiru: nige ea laoma tanoubu hegiruna hesabana, ea laoma tanoubu bena ea hemauri. 48 Ia i otaotaegu, eo egu riba hinage nige i abidi, esau ia abo i hegiru: riba ea ribaei wa asubena murimuritana eai ia abo i hegiru. 49 Paana ede eaubom egu riba nige ea ribaei; Tamana tauhetamariguma laugagaeo i leama i ene, u ene ina doha, u riba doha nei. 50 Ea nuatuiyao ena laugagaeo ta mauri nige nosina: arinai ede saha saha ea ribaedi, doha Tamana i heribagu, doha ede ea ribaei.”