1 Teina riba ta Iesu i ribanonohaidio, ia maena heaheatayao abo se lau se gaeoawasi saga gagirina eai, esana Kiderona, oea esau nei eai, ia i lusora alona eai, maena heaheatayao.

2 Iudasi hinage, ia taumoruina, wau dimo wa i nuatuiyao: paana huia gamagari Iesu maena heaheatayao se uiouio nei eai. 3 Arinai Iudasi, iala bodadi esau, eo polisimani headi kohena lailaidi, eo Parisea wa aridi eai i abidi, abo se lage nei eai ma lamelamepadi, ma osiosiridi, eo ma adi nimaabia gamagaridi. 4 Iesu i nuatuiyao ginauri gamagaridi abo i hearodi, arinai ie lau i ribalau aridi eai, i ene, “Eai au eooi?” 5 Isi ia se heuio, si ene, “Iesu Nasareta.” Iesu abo i heribadi i ene, “Eau ede ia.” Iudasi hinage ia taumoruina, isi maedi se totoroesega. 6 Wau riba wa i heribadi i ene, “Eau ede ia,” arinai abo se uio muridi eai eo se guri tano eai. 7 Abo i oimuriuioidi, i ene, “Eai au eooi?” Si ene, “Iesu Nasareta.” 8 Iesu i heuioidi, i ene, “Ea heribamiuo ea ’ne, ‘Eau ede ia:’ ena au eooigu, isi ina ta se otawa, se lau:” 9 Bena riba esau se hemamohoiei, doha si ene, “Isi tatao u ledima wa nige esau i tauyamui.” 10 Simona Petero ia elepa ie abi abo i niusihai, kohena lailai ena heaheari i lauelepai, bea tutuna i sapihai. Heaheari wa esana Malako. 11 Iesu Petero i heriba i ene, “Em elepa me u sumauioi; bianomnom Tamagu i leama, abo ea nonom, e nige’e?”

12 Iala bodadi, eo edi kapena, eo Iudea polisimanidi Iesu se toai, se auaui. 13 Se woeabagunai Ana arinai; ia Kaiapa bosiana: Kaiapa wa nei borimaina eai ne ia kohena lailaina. 14 Kaiapa wa iaede lahinae Iudea tataodi i heribadio, i ene, “I lolo tau esega i mate tatao gamagaridi debadi eai.”

15 Simona Petero Iesu i hemuriwatai, eo heaheata esau hinage maena: wau heaheata wa kohena lailai ana boda esau, ia maena Iesu se lusora kohena lailai ena numa alona eai. 16 Na Petero i totoro dobila murimurina eai. Wau heaheata esau wa kohena ana boda hewarina wa, abo ie pesa, i ribalau siu dobila tauitawataina arinai, abo Petero i woeaiyama numa alona eai. 17 Siu wa dobila tauitawataina, abo Petero i heriba, i ene, “Wau tau wa oa ena heaheari esau wa, e nige’e?” I ene, “Eau nige’e.” 18 Heaheari, eo polisimani nei eai se totoro mutuari se healasi: i wa’oo ariri; to se aimoiga: Petero maedi se totoro esega, ia hinage i aimoiga.

19 Kohena lailai Iesu i oimurini ena heaheata ribadi, eo ena lauheata. 20 Iesu ia i heuio, i ene, “Tanoubu eai ta masaraha eai ea ribariba: huia gamagari sunago alodi eai ea laulauheata, eo numa uura eai hinage, Iudea tataodi edi aba oigogo; nige riba esau ea ribayamui. 21 Ue saha u oimurigu ta? Egu riba tauataiedi u oimuridi saha saha ea ribaedi; egu riba se nuatuiyao.” 22 I riba ina doha polisimani esau i totoro hasarina eai nima aloalona eai Iesu i lubilaei, i ene, “Kohena lailai arinai u heuio doha nei wa?” 23 Iesu ia i heuio i ene, “Taba ea riba baaea, baaea wa u hemasaraha: na taba ea riba lolo ie saha u lubigu ta?” 24 Na Ana Iesu i hetamariyao Kaiapa, kohena lailaina arinai.

25 Simona Petero i totoro i aiaimoiga. To ia se heriba, si ene, “Oa hinage ena heaheata esau, e nige’e?” I harere, i ene, “Eau nige’e.” 26 Kohena lailaina ena heaheari esau, tau wa beana Petero i talahai wa ehana esau, i ene, “Ea itam’o oea eai wa, oa maidana, e nige’e?” 27 Arinai abo Petero i harereuio: e abotai kamkam ie dou.

28 Kaiapa se laugabaei, abo Iesu se woeai se laei hedudurai numana eai: mara i uiari; isi nige se awasae hedudurai numana eai, ata se bii na isi pasova bena abo se ai. 29 Pilato i lulage isi aridi eai, i ene, “Teina tau ta emi hegiruna ede aisana?” 30 Se heuio ia arinai si ene, “Ena ia nige taubaaeana, taba nige ai toai ai leawa.” 31 Pilato abo i heribadi i ene, “Ia abo au laei emi laugagaeo eai wa au hedudurai.” Iudea tataodi ia se heriba si ene, “Bena tau esau ai unui, ema laugagaeo se guduguduimai:” 32 Iesu ena riba esau arinai se hemamohoiei, ia ena mate ribana ie ribanonohaiyao.

33 Pilato abo i awaseuio numa hedudurai alona eai, Iesu i eogai, i ribalau ia arinai, i ene, “Oa Iudea edi Wasawasa wa?” 34 Iesu ia i heriba i ene, “Riba ta oabom u hetubu, e headi wasagu se heribamo?” 35 Pilato ia i heriba i ene, “Eau Iudea? Em basileia tataodi eo kohena lailaidi oa se woeaim arigu eai: edoha em laulau?” 36 Iesu i heuio, i ene, “Egu basileia nige tanoubu ta ginaurina: taba egu basileia tanoubu ta ginaurina ata egu heaheari se iala. Iudea tataodi abo nige se toaigu: eau egu basileia nige doha nei.” 37 Pilato abo i ribalau ia arinai i ene, “Oa wasawasa wa?” Iesu ia i heuio, i ene, “Oa u ene eau wasawasa. Egu tubu paana ia ede ina, eo arinai ede ea laoma tanoubu eai ta riba‐mamohoina bena ea hemasaraha. Esa, esa, riba‐mamohoina enana, arinagu se ataiei.” 38 Pilato i ene, “Riba‐mamohoina ede saha?”

Ina riba ta i riba lautom, abo i lulageuio Iudea tataodi aridi eai, i ene, “Nige giruna begana ia arinai ea lobai.

39 “Taiede, emi laulau esau pasova huiana eai, tau esau abo ea eairigabaei: Iudea edi Wasawasa au ene bena ea eairigabaei wa?” 40 Arinai abo gamagaridi se eogayogauio si ene, “Meta tau me nige’e, na Baraba u eairi!” Baraba wa ia tauaiaiyahari.