SALAMO.
43.
Egu laulau dudurai u hemasaraha, Eaubada e, eo enagu u toro ganamuri tataodi matadi eai; ao borabora eo laulau gewagewa tataodi nimadi eai u lebohaigu! 
Paana oa Eaubada egu aba ailogulogu ede; paana saha u gabahesuaragu? Paana saha ea nuadubu waiunu ena hebahebaaea debana eai? 
Em mara eo em riba mamohoina bena u hetamaridima bena abo se woeaigu, abo se woeaigu em oea tupi tabuna eo em abamia arinai! 
Murina eai abo ea lau Eaubada ena aitalasam hatahatana arinai, Eaubada egu abanuawoiwoina; eo abo ea aihelahuim huelele arinai, Eaubada e, egu Eaubada. 
Earuagu e, paana saha u nuadobidobi paana saha nuaboeagu eai u heunaboisaha? Eaubada u sunumaei, paana ia abo ea hedebasaeuioi, ia agu sagu ede eo egu Eaubada.