SALAMO.
80.
Isaraela taumiataunina e, u ataatai, oa Iosepa u woeai doha mamoe eawoina! Oa ue bawa serubim potadi eai, maram u hesinalaei 
Eparanaime, Beniamina eo Manase eai! Em gigibori u healabalebalelem eo u laoma u hemaurimai! 
Eaubada e, u hetorouioimai; matam u hesina potamai eai arinai abo ai mauri! 
Tauiala moutuana edi GUIAU Eaubadana e, i lau e aitea huia abo u ouyalayala em tataoyao edi uura aridi eai? 
Matasulu mo u mosei adi aiai, matasulu hinage u henom aririedi. 
U hetoromai helemai taumia edi aba alaliuliuwa; ema waiunu hinage isibom se marumaruhiemai. 
Tauiala moutuana Eaubadana e, u hetorouioimai; matam u hesina potamai eai arinai abo ai mauri! 
Aigupito eai vine esau oa u abiyama; eanua tataodi u aihenauidi, eo vine wa u umai. 
Tano enana u hea’a, lamna ie dobi, eo eanua maudoina i hemonau. 
Loguloguna oea tupidi i heoputawaidi, eo maruwai lailaidi lagadi aridi eai hinage; 
lagadi i loloidi gabogabo eai, ini’inidi hinage se tulaedi Saga eai. 
Paana saha ganana u oiheguri, to taubaeawa gamagaridi uauana se losi? 
Sarai nuura i hebaaea eo oea suisuidi gamagaridi arinai se aibai. 
Tauiala moutuana Eaubadana e, u sinibuiuioma! Galewa eai u itadobima, eo u ita; vine ta oa u itawatai, 
lie wa oa nimatutum eai u umai wa. 
Se gabuyao oeagi alaalasina arinai, se oiheguriyao; i lolo am ao u hebaaea aridi eai, abo arinai se mate! 
Na bena oa nimam u torelaei nimatutum tauna wa potana eai; tau natuna oa u headidiri bena oabom enam! 
Abotai taba nige ai sinibui ai lausuaraem; Mauri u leama, abo oa esam eai ai aiaiboda! 
Bena u hetorouioimai, tauiala moutuana edi GUIAU Eaubadana e! matam u hesina potamai eai arinai abo ai mauri!