Rɨghenda.
3.
Thetheghanɨko wolaghɨye e tɨnenji, iya Giya Loi va i vakathaŋgiko, mwata iye i thimba moli e kwan. I dage weya wevoma iŋa, “Emunjoru Loi mendava i dageten e ghemi na mane hu ndeghan mun umbwa regha une e umake iyake tɨne?” 
Wevoma i gonjoghawe iŋa, “Mbema wo ghanɨŋga eŋge vara iya umbwaumbwake wolaghɨye e umake tɨne uneunenji, 
ko iyemaeŋge Loi mendava iŋa, ‘Umbwako iya vara i ndeghathɨ yamoeko moli ne hu ndeghana une, o ne hu ndevɨghathɨ; ne iwaeŋge hu mare.’” 
Mwatama i dagewe iŋa, “Ma emunjoru ŋgoreiye; maane hu mare. 
Kaiwae Loi i ghareghare, mbaŋa ne hu ghana umbwako iyako une, marami ne i bowoutu na ne ŋgoramiya amalaghɨniye, ne hu ghareghare thovuye na tharɨ.” 
Mbaŋa wevoma i thuwe umbwako ghayamoyamo i thovuye moli na maraeko i loghelogheŋa uneko na valɨkaiwae ghanɨŋga na tembe i wova nuwae na i renuwaŋa nuwaiya i thimba, iya kaiwae i mbana vavana na i ghan. Te vambe i giyava vavana weya le ghɨmoru na i ghan. 
Mbaŋa kaero thɨ ghan mbe thenjighewoko vara maranji i manjamanjala na thɨ vemonjina wanaŋgi. Thɨ ŋgiya umbwa idae fig ndamwandamwa na thɨ yabo riwanjikowe. 
Vama i ghanjighɨye amba amalama na levo thɨ loŋwa Giya Loi i loŋga na laiye e umako tɨne, iwaeŋge thɨ kubaro e umbwaumbwako rɨgherɨghenji e umako tɨne. 
Ko amba Giya Loi i kula weya amalama, “Aŋga inan?” 
I gonjoghawe iŋa, “Ma loŋwa lain e umana tɨne na ya mararuŋge, kaiwae ya bukabuka.” 
Loi i dagewe iŋa, “Thela me dage e ghen na iŋa u bukabuka. Kaero mo ghana umbwama mendava ya dagetenɨma e ghen une?” 
Amalama i gonjoghawe iŋa, “Wevoma mendava u vaŋgugiyama e ghino, me giya umbwako une vavana e ghino na ya ghan.” 
Amba Giya Loi i dage weya wevoma iŋa, “Buda kaiwae mo vakatha iyake?” Wevoma i gonjoghawe iŋa, “Mwata me utuyaroŋgo na ya ghan.” 
Amba Giya Loi i dage weya mwatama iŋa, “Kaiwae mo vakatha kamwathɨke iyake, vuyowae tembene i njava e ghen: Mbwaeva na mbwanjamɨke wolaghɨye e tɨnenji mbe ghanɨmbereghana eŋge vara ne u vaidiya vuyowoke iyake. E mbaŋake vara iyake na i ghaoko, ne u li e gharen vwata na ne u ghana thelau vughauye yawalin ghambaŋa i ri rogha. 
Ne ya vakathaŋge wein wevona na hu veroghereiye wanaŋga, na tembe ŋgoreiyeva orumburumbu na elaghɨniye orumburumbuye weŋgi mbaŋa muyaiko. Nevole ghen u gharɨ orumburumbuye regha gheghe daŋavwa, ko iyemaeŋge iye i tagaviya umbalɨn.” 
Weya wevoma, i dagewe iŋa, “Ne ya valaghɨyeŋa vɨrɨ e ghen mbaŋa ne u ghamba ŋgama, na ne u ghataŋa vɨrɨ mbaŋa ne u ghambɨŋgiya gamagai. Nuwanɨna mbene inawe vara len ghɨmoru ko iyemaeŋge iye ne i mbaroŋaŋge.” 
I dage weya Adam iŋa, “Kaiwae mendava u loŋweghathɨgha len wevona ghalɨŋae, na u ghana umbwako une iya va ya dagetenɨko e ghen, va yaŋama, ‘Ne u ndeghana uneko.’ Ne ya gura thelauke na le rauko i vuyowo kaiwae len vakathako kaiwae. E mbaŋake iyake na i ghaoko tembene u rovurɨghegheva e kaiwo mbaŋake wolaghɨye ko amba hu ghanɨŋga. 
E thelauke nana na nana e lenji kinkin ne thɨ mbuthu, na ne u ghanɨŋgiya umbwathaŋarɨke uneunenji. 
Ghairo mbene i dobu eto i dobu e ghawo amba ne u ghan valawe, gheghada tene u njoghava e thelau, kaiwae iyako va hu menawe na tembene hu njogha na hu tabo na thelauva.” 
Adam i rena levo idae Ive, kaiwae elaghɨniye gharɨgharɨke wolaghɨye e yawayawalinji tɨnanji. 
Amba Giya Loi i vakatha kwama thetheghan e njimwanji na i vanjimboŋgiya Adam na levowe. 
Amba Giya Loi mbe ghambereghaeŋge i renuwaŋa na iŋa, “Kaero ya ghareghare, mbaŋake thovuye na tharɨ ghaghareghare kaero inawe ŋgoreiya ghinda. Ne iwaeŋge i vilawalawa na tembe ve wova umbwako iya yawalɨko rɨghe une na i ghan, ko amba i roghabana na maa i mare.” 
Iya kaiwae Giya Loi i variyeraŋgiya e uma Iden tɨne, i raŋgi eto na i kaiwoŋa thelauko iyava i rikowe. 
Mbaŋa i vakatha iyako na e ghereiye, amba Giya Loi i worawa buruburu nyaoniye regha idae “serupim” na ghalithɨ maraeko i ravalaŋa na i vilama vaghɨliya valɨvaŋgako iyako na i njimbukikiya umbwako iya yawalɨko rɨghe.