Rɨghenda.
16.
Serai, Eibram levo, mava valɨkaiwae i ghambɨ gamagai le ghɨmoruko kaiwae. Ko iyemaeŋge le rakakaiwo eunda, tɨnan Ijipt, idae Heiga, 
iwaeŋge i dagewe le ghɨmoru Eibram iŋa, “Giya Loi i vakathaŋgo ma valɨkaiwaŋgu ya ghambɨ. Wo u ghena wein lo rakakaiwoko, mbwata ne i ghambɨ gamagai ghino kaiwaŋgu.” Eibram i varaeŋna levo Serai le renuwaŋako na i vakatha ŋgoreiye. 
Lenji yakuyaku Kenan e tɨne vama i wo theghathegha hoyaworo, iwaeŋge Serai i vaŋgugiya le rakakaiwoma tɨnan Ijipt, Heiga, weya le ghɨmoru Eibram na levo eunda. 
Mbaŋa Eibram i ghenethaiya Heiga kaero i vaidiya ŋgama. Mbaŋa i ghareghare kaero e tete i vakatha i wovoreŋa ghamberegha na maa i yavwatatawana tanuwagae Serai. 
Amba Serai i dage weya le ghɨmoru Eibram iŋa, “Vuyowoke iya i voroke e ghino rɨghethora ghen. Mbaŋa mendava ya vaŋgugiya lo rakakaiwoko e ghen, na mbaŋake i ghareghare kaero e tete, i vakatha i wo vorevoreŋa na maa i yavwatata wanaŋgo. Giya Loi ghamberegha tembe i tuthi thela le tharɨ yake.” 
Amba Eibram i dage weya Serai iŋa, “Wo u thuwe, ghen u mbaroŋa iya len rakakaiwo wevona iyena. The renuwaŋa nuwaniya u vakathawe, ko u vakathawe.” Serai ghathanavu i tharɨwe moli, iya kaiwae Heiga i voitete. 
Giya Loi le nyao thovuye i vaidiya Heiga e mbwarowou regha ghadidiye ina e vuruvuru vwatavwata. Mbwarowouke iyake ina e kamwathɨ i wa Sur. 
Nyaoma thovuye i dagewe iŋa, “Heiga, Serai le rakakaiwo ghen, ko aŋga mo ri na ghamwan aŋga i yere?” I gonjoghawe iŋa, “Nuwaŋguiya ya voiteta tanuwagaŋguko.” 
Amba Giya Loi le nyao thovuye i dagewe iŋa, “U njogha weya tanuwaga Serai, na u ghambugha le mbarona.” 
Nyaoma thovuye mbowo i dageweva iŋa, “Giya Loi nevole i vakathaŋge na orumburumbu lemoyo moli na mane valɨkaiwae lolo regha i vaonaŋgi.” 
Giya Loi le nyao thovuye tembe i dageweva iŋa, “Ŋgamana iya e ŋgamoinɨna ŋgama ghɨmoru. Mbaŋa ne i virɨ ne u rena idae Ismel, kaiwae Giya Loi kaero i loŋwe iya len gharevɨrɨna. 
Ko iyemaeŋge iya naruna iyena nevole le yakuyaku ŋgoreiya mbwanjam na maa valɨkaiwae ra thɨnɨra murumuru e ghamwa. Nevole thɨ vegaithɨ wanaŋgi weiyaŋgiya gharɨgharɨke wolaghɨye, i meghaghathɨ weŋgiya le bodaboda.” 
Heiga i unogiya Giya Loi iya me utuma weiye idae iŋa, “Ghen Loi u thuwathuwa e ghino,” iya kaiwae iŋa, “Kaero ma thuwe iya loloke i thuwathuwake e ghino.” 
Iya kaiwae mbwarowouko iyako idae Beya Lahai Roi, gharumwaru mbwarowouke iyake tanawagaya lolo e yawayawaliye i thuwathuwa e ghino. Ina Kades na Bered e ghanjilughawoghawo. 
Heiga i ghamba ŋgama ghɨmoru na Eibram i rena idae Ismel. 
E mbaŋako iyako Eibram ghatheghathegha vama i wo hwewona.