Emos.
6.
Aleu! Ne hu thovuyeona, ghemi iya riwamina i uda Saiyon e tɨne na ghemi hu yayaku Sameriya na hu vaidi malɨlɨ. Ghemi gharɨgharɨ laghɨlaghɨye Isirel e tɨne, iya thavala ghemi gharɨgharɨ thɨ rakaraka weŋgi thalavu kaiwae. 
Hu dage weŋgi gharɨgharɨna: wo hu raka na vohu thuwe ghembana idae Kalne, na mbowo hu waova e ghembana laghɨye idae Hamat, na mbowo hu ghaova vohu nja e ghembana idae Gat ina Pilistiya e tɨne. Thare thiyeko va thɨ thovuye kivwalaŋgiya Juda na Isirel lenji ghamba mbaro? Thare lenji vanautumako le laghɨlaghɨye i kivwala gheminawe? 
Hu mwana ghaghatha mukuwo gha mbaŋa na hu mwana vatha tharɨ gha mbaŋa ne i mbaro. 
Aleu! Ne hu thovuyeona, ghemi thavala hu romataleŋarawe e ghamba yaku thovuye moli na huya ghanɨthɨgha e burumwaka na sip lenji ŋgamaŋgama ghanji tabo vondɨvondɨ. 
Nuwamina nuwaiya hu iiya wothu, ŋgoreiye Deivid va i vakatha, na hu wothuŋa weiye hap. 
Hu muna waen iya i riyevanjara ghami ndeghɨna laghɨlaghɨye na hu vaghana bunama butinji thovuthovuye e riwamina, ko iyemaeŋge e gharemina ma hu gharevɨrɨŋa vuyowoko iya ne i nja weŋgi Josep orumburumbuye. 
Iya kaiwae ghemi ne vohu mebwabwarikai vara e vanautuma regha; lemi riyemataleŋa e ghamba ghena thovuye moli na lemi ghan thɨgha kaero iko. 
Giya (Loi) Memevoroniye i tholo weya ghamberegha Giya Loi Vurɨvurɨghegheniye iŋa: “Ya botewoyathu Isirel gharɨgharɨniye lenji nemo, ya botewoyathu lenji ŋgoloŋgolo laghɨlaghɨye ne ya giya ghambanji laghɨye na bigibigiko wolaghɨye e tɨneko weŋgiya ghanji thɨghɨya.” 
Thoŋgo gharɨgharɨ theyaworo inanji e ŋgolo regha tɨne, thiye tembene thɨ mareva. 
Na thoŋgo loloko i mareko le boda i mena i woraŋgiya riwaeko, na i kula ruu weya thela mbe ina e ŋgoloko tɨne i kubaro, iŋa, “Thare lolo regha mbe inava ghena wein?” Thoŋgo iŋa, “Nandere.” Ko amba i gonjoghawe na iŋa, “U rokubaro! Ra njimbukiki na thava tembe ra unova Giya Loi idae.” 
Kaiwae Giya Loi ne iŋa na ŋgolo laghɨye ne i dobu na i rakevawowona, na ŋgolo nasiye i maŋgɨla. 
Hosɨ thare valɨkaiwanji thɨ ruku reŋa e varɨvarɨ vwatanji? Thare gharɨgharɨ thɨ vakatha uma e njighɨko tɨne? Ko iyemaeŋge hu vɨva emunjoru i tabo mamate na rumwaru gha vakatha une i wa e umbwa une maŋgamaŋga. 
Nuwamina mbema i loghe vara kaiwae menda u gaithɨ vurɨgheghe na hu wo ghembana idae Lo Deba, Na hu wovoreŋa ghamberegha huŋa, Mbe ghime e lama vurɨgheghe e tɨne wo wo ghemba Kanaim. 
Ko iyemaeŋge Giya Loi Vurɨvurɨghegheniye iŋa, “Ne ya vakatha vanautuma regha thɨ mena thɨ gaithɨ weŋga O ghemi Isirel gharɨgharɨniye ne thɨ vakatha vuyowo e ghemi iri Hamat na ve wo gunugu Araba.”