14
ब्वचा नु मब्वचा ङा श्ये
लेवी ११:-
1 मिनु मोसामी “गेपुकी परमप्रभु यावे, इन परमप्रभु आ तमी तौ ननी। बेक्शो मुर आ पर्बम इन कुशुल प्रेक्चा मदुम्ब। इन चां प्रेक्चा मदुम्ब। लेवी १९:२७-२८; येरमीया ४७:५; इजीकीएल ७:१८ 2 मारदे हना गेपुकी परमप्रभु यावे, इन परमप्रभु आ आंम मुर बाक्नीनी। मिनु परमप्रभु यावेमी जात जात ङा मुर नेल्ल आन दाते रे इन कली आ मुर सेल्चा कली योव़तु।
3 गेपुकीमी मारेइ ग्रांग्रा दिचा ङा थोव़क मजने मब्वने। 4 गेपुकीमी ब्वचा दुम्ब जन्तु तेको बाक्नीम देंशा हना, ब्यफ, क्यारश, भेडा, 5 रोकोश, किश्श, बरांट, कौरो किश्श, साबर, चितल नु थार बाक्नीम। 6 मिनु गेपुकीमी जन्तु आन दातेमी तेको नेल्ल गेंच चेश्शो नु शोकोल हेक्ब बाक्नीमी, मेको आन कली ब्वचा दुम्ब। 7 तन्न शोकोल हेक्ब नु गेंच जेश्शो आन दातेमी तेको मब्वचा देंशा हना, दलओंठ, खरायो, रोंगु ङा खरायो मब्वचा। मारदे हना मेकोपुकी शोकोल हेक्नीम हना यो, आन गेंच मजेश्शो बाक्नीम। मेको इन कली ग्रांग्रा बाक्ब। 8 मिनु पोव़ आन गेंच जेश्शो बाक्नीम हना यो, शोकोल महेक्नीम। मेको इन कली ग्रांग्रा बाक्ब। मेको आन श्ये मब्वचा, आन सिनु यो थिचा मदुम्ब।
9 ब्वाक्कुम बाक्बपुकीमी फ्रां नु कत्ला पाइश्शो ब्वचा दुम्ब। 10 तन्न फ्रां नु कत्ला मपाइश्शो मब्वने। मेको इन कली ग्रांग्रा बाक्ब। 11 गेपुकीमी ग्रांग्रा मदिचा ङा चिक्ब नेल्ल ब्वने चाप्नीनी। 12 तन्न गेपुकीमी ब्वचा मदुम्शोपुकी चहिं ककाकुली, ब्वारदे, गिद, कुही, 13 नेल्ल खाल ङा ब्वारदे, 14 खद, 15 सुतुमुर्ग, हुहुचील, हांस, नेल्ल खाल ङा बेसारा, 16 हुहुचील, कोइरालो नु बुक्स, 17 धनेस, सिनु ब्वाइब गिद हांडगील, 18 सारस, नेल्ल खाल ङा बोकुला, फाप्रे चिक्बी नु पकातिक्ती चहिं मब्वने। 19 फ्रां पाइश्शो माले फटेङग्रा नेल्ल इन कली ग्रांग्रा बाक्ब। मेकोपुकी मब्वचा। 20 तन्न ग्रांग्रा मदिचा ङा फ्रां पाइश्शो नेल्ल ब्वने चाप्नीनी।
21 गेपुकीमी परमप्रभु यावे, इन परमप्रभुम आ कली योव़शो मुर बाक्नीनी। मोपतीके आंमा बेक्शो जन्तुपुकी ब्वचा मदुम्नीनी। गे नु बाक्शो अर्को रागी ङा मुर आन कली मेको गेने चाप्नीनी। मेकोपुकीमी मेको ब्वाम्तेक्म हना यो, लेयतेक्म हना यो, ठीक दुम्ब। क्यारश आ पाठा आ ममा आ दूधम मक्येने। प्रस्थान २२:३०; प्रस्थान २३:१९
१० भाग ङा भाग का चढ़ेचा
22 गेपुकीमी गेनायो मप्रोंइचा ङा पा बर्स बर्स ङा इन रूम नु खेतम वाशा सिश्शो नेल्ल रे १० भागम भाग का तिल्शा वोइश्शा, गेचा माल्नीनी। लेवी २७:३० 23 मिनु परमप्रभु यावे, इन परमप्रभु आ योव़शो बाक्तीकेमी मेको आ ङोंइती जचा माल्नीनी। मार जचा ब्वचा माल्नीनी देंशा हना, इन १० भाग ङा भाग का अन्न, इन अङगुर शांबु, इन तेल, इन कली ङोंइती जरमेशो ब्यफ नु क्यारश भेडा जचा ब्वचा तूचा माल्नीनी। मो पाइतीनी हना, गे मबेक्नी सम्म परमप्रभु यावे, इन परमप्रभु कली मान पा हिंचा शेंसीनीनी। ब्यवस्था १२:१७-१८; ब्यवस्था १९:२३ 24 मिनु परमप्रभु यावे, इन परमप्रभु आ योव़शो बाक्तीक इन बाक्तीके रे शुश ङोन बाक्त हना, नु परमप्रभु यावे, इन परमप्रभुमी इन कली आसीक गेप्तु नु इन १० भागम भाग का मेकेर लाइक्ने मचाप्तीनी हना, 25 मेको इन तिल्शा वोइश्शो १० भागम भाग का लेयङीन। मेको रे ताक्शो क्येट लाइश्शा, परमप्रभु यावे, इन परमप्रभु आ योव़शो बाक्तीके लने। 26 मिनु इन दाक्शो खोदेंशो पा बी ब्यफ, क्यारश भेडा, अङगुर शांबु, रकसी मेको क्येटीमी ग्यापीन। मिनु गे नु इन खिं ङा मुर परमप्रभु यावे, इन परमप्रभु आ ङोंइती जशा ब्वशा ग्येरसीने। 27 इन सहरम बाक्ब लेवी आ थर ङा मुर आन कली रिम्शो पा कोव़ङीन। मारदे हना मेकोपुकी इन खोदेंशो पा शोंप मतामे। ब्यवस्था १२:१२,१९;
28 मिनु बर्स सां नोले गे इन रुप्शो ङा १० भागमी भाग का इन सहर ङा वोइक्तीकेम वोइक्चा माल्नीनी। ब्यवस्था २६:१२-१५; लेवी २७:३२-३३ 29 मिनु इन खोदेंशो पा शोंप मताइब लेवी आ थर ङा मुरपुकी, अर्को रागी ङा मुर, रोम रोइक्च नु वोंइश बेक्शो मीश मुरपुकी मेकेर जाक्शा, रूथ्री जचा ब्वचा तामेक्ल। मो पाइतीनी हना, परमप्रभु यावे, इन परमप्रभुमी इन कली इन पतीक नेल्लेमी आसीक गेब” देंत।