12
ङोंइतीन पचा माल्ब देंशो
1 इ ठिटा बाक्ना बाक्न इ कली सेल्ब कली मिम्तो। श्येत जतीक नाक्ती नु इ खूशो दुम्तीक बर्स जाक्मेनु “गो मेको नाक्त मदाक्नुङ” देंचा क्येङा ङोंइती मिम्तो। 2 नां नु नाक्त ङा छेङछेङ कली छिङछिङमी सुम्चा क्येङा ङोंइती, तास्ला नु सोरुल ब्राब्रा दुम्चा क्येङा ङोंइती नु गोस्सुम रेउ यिपाइश्शा लेत्चा क्येङा ङोंइती 3 खिं खाल पाइबपुकी ख्रिंख्रि पाइनीम। बोल्यो मुरपुकी खूशो दुम्नीम। यात हिल्ब मीश मुर शुश मबाक्तीके, आन गेय नाइक्नीम। मिनु झेल रे कोव़ब आन मिक्च ब्राब्रा दुम्ब। 4 मेना लां ङा लाप्चो चोक्सीब। यात हिल्शो सेंदा आइक्च दुम्ना दुम्न लाइब। मुरपुकी चिक्ब आन ग्रीशो नेंशा बोक्नीम। मीश आल आन कुम्सो नेल्ल आइक्च सेंदा पा नेंसीब। 5 मुरपुकी लाइश्शो खिं ङोइक्चा नु लांम श्येत दुम्बा कों, दे हिंनीमी। बदाम बोइश्शा सिप्ब। घांस ब्वाइब माले आ कोव़जमी ग्रेशा गाक्ब। मारेइ ममाल्ब दुम्चा क्येङा ङोंइती इ कली सेल्ब परमप्रभु कली मिम्तो। मारदे हना मुर नेल्ल बेक्नीम। मिनु रोंका पाइब लांम गाक्नीम। 6 चांदी के तार ब्रोइक्चा क्येङा ङोंइती नु सुन के कचौरा ब्रोल्चा क्येङा ङोंइती, खप के गर ब्वाक्कु बुक्तीकेम प्रोल्चा क्येङा ङोंइती नु इनार ङा गुगील जिक्चा क्येङा ङोंइती 7 खप रे बोक्शो फुरक खपीमीन लेत्चा क्येङा ङोंइती नु सोक्त गेब परमप्रभु आ बाक्तीकेम सोक्त लेत्चा क्येङा ङोंइती परमप्रभु कली मिम्तो। उपदेसक ३:२०; उत्पत्ती ३:१९ 8 शेंबमी “जाम्शा लाइब! जाम्शा लाइब! नेल्ल जाम्शा लाइब बाक्नीम” देंब।
परमप्रभु कली मान पा हिनीन
9 मेको शेंब जोक्ब तुइक्ब मुर ला ममाइ, मेकोमी मुर आन कली जोक्ब तुइक्ब सेल्तु। मेकोमी कोव़शा नाक्शा, दोदेंशो लोव़ बाक्बा, दोपा शुश देंतीक ब्रेक्चा माल्बा, मेको शेंताक्व। 10 मिनु शेंबमी ठीक लोव़ माल्शा ग्रुंइताक्व। मिनु मेकोम मार ब्रेक्ता, मेको ठीक नु थमा बाक्नीम।
11 जोक्ब तुइक्ब आन लोव़ गोठला आन कोक्के खोदेंशो बाक्ब। मिनु मेको आन खुप्शो लोव़पुकी बोल्यो पा थोक्शो कांटी खोदेंशो बाक्ब। मेको नेल्ल गोठला का रे पान दुम्शो बाक्ब। यसैया २२:२३ 12 ए आं तौ, मेकेर तेम्शो लोव़ रे होस पा बाक्को। शुश किताब ब्रेक्तीक गेय गेनायो मनुप्ब। मिनु शुश पढेशोनु रां कली दपाइक्ब। 13 नेनो, नेल्ल क्येङा नोले ङा लोव़ मार बाक्ब देंशा हना, परमप्रभु कली मान पा हिनो। मिनु मेको आ शेंशो टिवो। मारदे हना मुर नेल्ल आन पचा माल्शो एकोन बाक्ब। ब्यवस्था ६:२ 14 मारदे हना परमप्रभुमी इं पशो रिम्शो नु मरिम्शो गेय नेल्ल नु ख्रुइश्शा पशो नेल्ल निसाफ पाइब। रोमी २:१६; २कोरिन्थी ५:१०