14
रागी नेल्ल सोव़शो
1 परमप्रभु यावेमी रेउ मयिचा आ पर्बम येरमीया कली मार, लोव़ पाप्तु देंशा हना, 2 “यहूदा रोंका पाइब। मेको आ सहर ङा ठेयब लाप्चोपुकी सक्ति मपाइश्शो दुम्शो बाक्नीम। मेकोपुकी रू आ पर्बम सुर्ता पाइनीम। मिनु यरूसलेम आ वाइ ब्रेश्शो सरीङ सम्म जाक्दीश्शो बाक्ब। 3 मेकेर ङा ठेयब मुरपुकीम आन वाइल आन कली ब्वाक्कु ब्रथ सोइक्नीम। मिनु मेकोपुकी कुवाम लमानु ब्वाक्कु मथित्नीम। मिनु मेकोपुकी श्येत्थ ग्योंब कुरशा लेश्शा जाक्नीम। मिनु मेकोपुकी मुने दोक्शा मारेइ पने मचाप्ब दुम्शा, आमाइ, दे हिंशा आन पिया सुम्सीनीम। 4 रागीम रेउ मयितीके रागी नेल्ल सोव़शा जेश्शो बाक्ब। रू ङा गेय पाइबपुकी मारेइ पने मचाप्ब दुम्शा, आमाइ, दे आन कुल सुम्सीनीम। योएल १:११ 5 घांस मबाक्तीके ब्वाकी ङा किश्शेमी यो आ नक जरमेशो पाठा प्रोंइशा गाक्ब। 6 ब्वाकी ङा गधापुकी गोरशो डांडाम राप्शा सिवार खोदेंशो पा ग्रीनीम। गिगी जोतीक ठाउं मबाक्तीके मेको आन मिक्ची ब्रा ब्रा दुम्नीम।
7 मिनु आंइ मरिम्शो पशोम आंइ पर्बम सांकछी गेम्तेक्म हना, परमप्रभु यावे, गे इन नें आ पर्बम शिशी पने। मारदे हना गो इन कली प्रोंइशा, थम मरिम्शो दुम्तक। गोपुकीम इन पर्बम पाप पशो बाक्तक। दानीएल ९:४-९ 8 ए इस्राएल आ आस पतीके, श्येत जवानु मेको कली प्रोंइब, गे एको रागीम मारदे अर्को रागी ङा मुर खोदेंशो दुम्नीनी? गे मारदे नाक्दो का ला बाक्ब, लां गाक्ब मुर खोदेंशो दुम्नीनी? 9 गे मारदे इन थुं ग्येत्थ लुक्च दुम्शा बाक्शो मुर खोदेंशो दुम्नीनी? मारदे प्रोंइने मचाप्ब सक्ति मबाक्शो लडाइ पाइब खोदेंशो दुम्नीनी? परमप्रभु यावे, गे आंइ दातेम बाक्शो बाक्नीनी। गो इन नेंमी ब्रेत्चा पुंइसीशो बाक्नीकी। आंइ कली मप्रोनीन” देंनीम। येरमीया १५:१६; यसैया ४३:७
10 परमप्रभु यावेमी मेको मुर आन पर्बम “मेकोपुकी थमा पा हिरना हिरन बाक्नीम। हेंथे गाक्चा दाक्नीमी। थमा पा ठीक लां मगाक्नीम। मोपतीके परमप्रभु यावेम मेको आन कली मब्राइब। मुल मेकोमी आन मरिम्शो पशो आ पर्बम मिम्ब। मिनु मेको आन कली आन पाप आ पर्बम सजाइ गेब” देंत।
11 मिनु परमप्रभु यावेम आं कली “एको जात ङा मुर आन कली रिम्शो दुम्पाइक्चा कली मपुनो। येरमीया ११:१४; येरमीया ७:१६ 12 मेकोपुकी माइजा बाक्तेक्म हना यो, गो मेको आन पुंइशो मनेंनुङ। मेकोपुकीमी चोशा चढ़ेतीके, अन्न चढ़ेतीके चढ़ेम्तेक्म हना यो, गो मेको आन कली मब्राइनुङमी। मेको आ पा ङा गो मेको आन कली, तरवार, अन्काल नु बेक्तीक रोइम साइक्नुङमी” दे माइक्ती। यसैया ५८:३; येरमीया ६:२०
परमप्रभु आ लोव़ जोल पाइबपुकी
13 मिनु गो “परमप्रभु यावे, कोव़ङीन। इन लोव़ पाइबपुकीम दा मेको आन कली ‘गे तरवारम साइक्चा मपुंइसीनीनी। अन्काल मपाइनीनी। मिनु शुश नाक्ती सम्म एको रागीम थुं नाइश्शा बाक्चा ताइनीनी’ देंशो बाक्नीम” देंती। 14 मिनु परमप्रभु यावेम आं कली “आं लोव़ पाइबपुकीम दा आं नेंम जोल पा लोव़ पशो बाक्नीम। गो मेको आन कली मसोइक्तुमी। गो मेको आन कली लोव़ मपङ। मेकोपुकीमी इन कली जोल पा, लिंक्यु कोव़शा, फश लोव़ पाइनीम। आन थुं ङा जोल लोव़ पाइनीम। येरमीया २३:२१-२२; येरमीया २७:९,१४,१५; येरमीया २९:८-९; इजीकीएल १३:६ 15 मोपतीके परमप्रभु यावेम मेको आ लोव़ पाइब आन पर्बम, सुम आ नेंम लोव़ पाइनीमी, मेको आन कली सोइश्शो मनङ। मो हना यो मेकोपुकीम ‘तरवार नु अन्कालम एको रागी कली मताइब’ देंशो बाक्नीम। मुल तरवार नु अन्कालमीन जोल पा आं लोव़ पाइबपुकी साइक्चा पुंइसीनीम। ब्यवस्था १८:२० 16 मिनु जोल पा आं लोव़ नेंपाइक्चा पुंइसीबपुकी चहिं तरवार नु अन्कालम पतीके यरूसलेम ङा लां मेर ताइक्चा पुंइसीनीम। मेको, मेको आन मीश नु मेको आन तमी तौ आन कली थिम्ब सुइ मबाक्नीम। मारदे हना गो मेको आन तचा ङा श्येत मेको आन तारी मोइक्नुङ” दे माइक्ती। येरमीया ९:२१
17 गे मेको आन कली “आं मिक्च रे नाक्दो नाक्ती प्रेक्कु यिशा बाक्ल। मारदे हना आं मुर, ग्युंबे मपशो तमी थाम्पा श्येत जशो बाक्ब। ठेयब गार दुम्चा ङा पा मेको तुप्चा पुंइसीशो बाक्ब। येरमीया१३:१७ 18 गो मेको रागी लती हना, तरवारम साइक्चा पुंइसीशोपुकी ताइक्नुङमी। गो मेकेर ङा सहरम ओव़ती हना, मेकेर अन्काल पशो मुरपुकी ताइनुङमी। परमप्रभु यावे आ लोव़ पाइबपुकी नु चढ़ेब नेल्ल मारेइ मतुइक्थु, आन गेय पना पन बाक्नीम” दे माइक्ती।
19 मिनु गो “मार, गे यहूदा कली थमा पा प्रोंइने थुम्शो बाक्नीनी? मार, गे सियोन कली ग्रांग्रा दिश्शो बाक्नीनी? गे आंइ कली मारदे मसापाइक्चा ङा पा तुप्नी? गोपुकी थुं नाइश्शा बाक्तीक आस पाइतक, तन्न मारेइ रिम्शो मदुम। सानीकी कों दे आंस पाइतक, तन्न हिंतीक कका जाक्त। येरमीया ८:१५ 20 परमप्रभु यावे, गोपुकीम इन अरेशो लोव़ मटिशो नु आंइ किकी पिपी आन मरिम्शो पशो शोव़नीकी। गोपुकीम थमा पा इन ङोंइती पाप पशो बाक्नीकी। येरमीया ३:२५; भजन संग्रह ५१:५-७; भजन संग्रह १०६:६ 21 इन नें आ पर्बम आंइ कली शोर गाक्शो ममिम्तीन। गो इन सक्ति पाइश्शो नित्तीक कली आइक्च मसेल्पाइक्नीकी। इन पशो कबल मिम्तीन। गे मेको मक्याम्दीन। 22 रागी रागी ङा मुर आन देवी देवता आन दाते ङा तेकोइमी रेउ यिपाइक्ने चाप्नीमी ङा? मार, सरीङ आमा रेउ यिपाइक्ने चाप्बा ङा? मेको पाइब गे परमप्रभु यावे, आंइ परमप्रभु मननी ङा? मोपतीके गो इन कली आस पाइनीकी। मारदे हना गे ला एको नेल्ल पने चाप्नीनी” देंती।