1 मिनु काबु येसुमी गेनेसरेथ समुन्‍द्र आ नेक्‍था जाक्‍दीश्‍शा, मुर आन कली परमप्रभु यावे आ लोव़ शेंदीमी बाक्‍त। मुरपुकीमी येसु कली डी डा चूमे बाक्‍त। 2 मिनु समुन्‍द्र आ शुइचम डोंगा निक्‍शी तवा बाक्‍त। ङांइ रेप्‍‍बपुकी डोंगा रे तोइश्‍शा आन ग्‍याइली मुरना मुरन बाक्‍मा बाक्‍त। 3 मिनु डोंगा का ङोंइसे बाक्‍त। मेको डोंगा सिमोन के बाक्‍माक्‍त। मिनु येसुमी सिमोन कली “डोंगा इच्‍का आइक्‍ची लतो” दे मदा बाक्‍त। मिनु मोपा डोंगाम बाक्‍शा मुर आन कली शेंदीमी बाक्‍त।

4 मिनु शेंने थुम्‍शा, सिमोन कली “ब्‍वाक्‍कु आ दातेम जाक्‍दीश्‍शा, ङांइ रेत्‍चा कली ग्‍याइली आपो” देंमाक्‍त। यूहन्‍ना २१:६ 5 मिनु सिमोनमी “शेंब, नाक्‍दो रे श्‍येत पा ग्‍याइली आप्‍ना आप्‍न बाक्‍तक। ङांइ का यो मरे। मुल ‘गे आपो’ देंतीनी हना, गो आप्‍नुङ” देंमाक्‍त। 6 मिनु ग्‍याइली आबानु, शुश ङांइ रेश्‍शा, ग्‍याइल गाक्‍चा गोवा बाक्‍त। 7 मिनु ग्‍याइली गाक्‍थ्री पा ङांइ रेश्‍शो तशा, आ वारच आस कली “ए, एक जाक्‍शा, वारच पसे” दे ब्रेश्‍शा, डोंगा निम्‍फा ङांइम प्रिंदमे बाक्‍त। मिनु डोंगा हेल्‍शा, ब्‍वाक्‍कुम ग्रुम्‍चा चिक्‍ता बाक्‍त। 8 मिनु सिमोन पत्रुसमी मो दुम्‍शो तशा, येसु आ ङोंइती पोक्‍च थेक्‍शा बाप्‍शा “प्रभु, गो पापी मुर नङ। गे नु काथा बाक्‍चा मशिरनुङ” देंमाक्‍त। लूका १८:१३ 9 मारदे हना सिमोन नु मेको नु बाक्‍ब नेल्‍ले मिश ङा ङांइ रेश्‍शो तशा, छक लाक्‍मा बाक्‍त। 10 जब्‍दी आ तौ याकूब नु यूहन्‍ना यो छक लाक्‍सा बाक्‍त। मिनु येसुमी सिमोन कली “महिनो। मुल ङा मेरे मुर रेप्‍ब दुम्‍नेवे” दे मदा बाक्‍त। 11 मिनु डोंगा ग्रुंइशा, तोइश्‍शा, सिमोन, याकूब नु यूहन्‍ना सांफामी आन गेय नेल्‍ल प्रोंइशा, येसु आ नोले खोइश्‍शा, आ शेंसीब दुम्‍मा बाक्‍त।

12 मिनु काबु येसु आ शेंसीबपुकी नु सहर कामी बाक्‍मेनु, कोव़र पाइब मुर का कली ग्रुमा बाक्‍त। मिनु मेको कोव़र पाइबमी येसु कली तशा, आ ङोंइती बाप्‍शा “प्रभु, सापाइक्‍चा दाक्‍ताक्‍नी हना, आं कली सापाइक्‍ने चाप्‍नीनी” देंमाक्‍त। 13 मिनु येसुमी कोव़र पाइब कली थिशा “गो सापाइक्‍चा दाक्‍नुङ” देंमेनु, मेको कोव़र पशो मुर सा‍माक्‍त। 14 मिनु येसुमी “एको लोव़ सुइ कली मदेंचा। चढ़ेब आ ङोंइती लशा, इ साशो रां कोंइदो। मिनु मोसामी मार चढ़ेचा माल्‍ब देंशो बाक्‍मे, मेको चढ़ेशा, साती, दे तुइक्‍पतो” दे माइश्‍शा, सोइक्‍ता बाक्‍त। लेवी १४:२-३२ 15 सुइ कली मदेंचा देंशो बाक्‍त हना यो, शुश मुरुमी येसु आ पर्बम लोव़ पामे बाक्‍त। रागी नेल्‍लेम मेको लोव़ ब्रमाक्‍त। येसु आ लोव़ नेंचा कली नु रोइ रे साचा कली शुश मुर येसु आ बाक्‍तीकेम जाक्‍मा बाक्‍त। 16 तन्‍न येसु मेकोपुकी नु ब्राशा, सुइ मबाक्‍तीकेम लशा, परमप्रभु यावे कली प्रार्थना पवा बाक्‍त। मर्कूस १:३५

17 काबु येसुमी शेंना शेंन बाक्‍मेनु, गालील रागी, यहूदीया रागी, नु यरूसलेम सहर रे जाक्‍शो फरिसी नु अरेशो लोव़ शेंबपुकी देल्‍शा, येसु आ नेक्‍था निस्‍समा बाक्‍त। परमप्रभु आ सापाइक्‍तीक सक्ति येसु नु बाक्‍माक्‍त। 18 मेना मुरपुकीमी आ गुइ खोइल मदुक्‍ब मुर का कली ब्राख्‍येम कुरशा चाक्‍ग्‍मे बाक्‍त। चाक्‍बपुकीम मेको कली येसु आ ङोंइती चाक्‍दीत्‍चा, दे मिम्‍तमे बाक्‍त। 19 तन्‍न शुश मुर देल्‍तीके येसु आ नेक्‍था चाक्‍दीन्‍ने मचाप्‍मे बाक्‍त। मिनु खिं ङोइश्‍शा, साप्‍शो फुल्‍लु याक्‍शा, रोइ पाइब आ ब्राख्‍ये आ एर ओंथ डोरीम फ्रेंशा, मेको कली ओंखां पा तोक्‍शा, येसु आ ङोंइती वोदमे बाक्‍त। 20 मिनु येसुमी मेको आन थमा सुइक्‍शो तुइश्‍शा, मेको कली “आं वारच, इ पाप क्‍याम्‍शा गेतन” दे मदा बाक्‍त। 21 मिनु फरिसी नु सास्‍त्रीपुकीमी “ओदेंशो शुक्‍शी लोव़ पाइब सु बाक्‍म? परमप्रभु यावेमी ला पाप क्‍याम्‍ने चाप्‍ब” दे मिम्‍तमे बाक्‍त। फरिसी रिती थिती सेल्‍शा, रिम्‍शो पचा कली कोव़ब यो बाक्‍शो बाक्‍तेक्‍म। सास्‍त्री यहूदी आन कली परमप्रभु यावे आ अरेशो लोव़ शेंब बाक्‍शो बाक्‍तेक्‍म। लूका ७:४९; भजन संग्रह १३०:४; यसैया ४३:२५ 22 मिनु येसुमी मेको आन मिम्‍शो तुइश्‍शा, मेको आन कली “मारदे इन थुंम मोदेंशो मिम्‍तीनी? 23 इ पाप क्‍याम्‍शा गेतन देंचा देय छुल बोक्‍शा, एर ओंथ हिरशा कोंइदो देंचा तेको रिम्‍शो बाक्‍बा? 24 रागीम जरमेशोमी, पाप क्‍याम्‍चा कली अधिकार तशो बाक्‍ब, दे गेपुकीमी यो तुइक्‍तीन” दे गुइ खोइल मदुक्‍ब कली “छुल बोक्‍शा, इ ब्राख्‍ये कुरशा, इ खिं लावो” दे मदा बाक्‍त। यूहन्‍ना ५:३६ 25 मो देंमेनु, मेको मुर छुल बोक्‍शा, आ ब्राख्‍ये कुरशा, परमप्रभु यावे कली ठेयब सेल्‍ना सेल्‍न आ खिं लमाक्‍त। 26 मेको चिन्‍ड तशा, मुर नेल्‍ले छक लाक्‍शा, परमप्रभु यावे कली ठेयब सेल्‍शा, मान पा हिंशा “ङोंइती गेनायो मतशो ताइतय” देंमुमा बाक्‍त।

27 मिनु मेकेर रे लशा, येसुमी तिरो पोक्‍ब लेवी नें पाइश्‍शो मुर का आ गेय पतीकेमी बाक्‍शो तशा “आं नोले खोइय्‍यी” दे मदा बाक्‍त। 28 मिनु मेकोमी आ गेय प्रोंइशा, येसु आ नोले खोदा बाक्‍त।

29 मिनु लेवीमी येसु कली मान पा थुल्‍चा, दे जचा तूचा सेला बाक्‍त। मिनु मेको नु तिरो पोक्‍ब, आ वारच नु अरु मुर यो जथ बाक्‍मा बाक्‍त। लूका १५:१ 30 मिनु फरिसी नु सास्‍त्रीपुकीमी मेको आन कली काथा बाक्‍शो तशा, आन थुं मनुथु येसु आ शेंसीब आन कली “मारदे गे तिरो पोक्‍ब नु पापीपुकी नु काथा बाक्‍शा जाइनीनी?” देंमा बाक्‍त। 31 मिनु येसुमी मेको आन लोव़ तुइश्‍शा “रोइ मपाइब आन कली डाक्‍टर ममाल्‍नीम। तन्‍न रोइ पाइब आन कली डाक्‍टर माल्‍नीम। 32 ठीक पाइब आन कली ब्रेत्‍थ जाक्‍शो मनङ। तन्‍न पापी आन कली ‘इन थुं परमप्रभु यावे गे लेत्‍तीन’ दे ब्रेत्‍थ जाक्‍शो नङ” दे माइक्‍मी बाक्‍त।

33 मिनु मेकोपुकीमी “यूहन्‍ना आ शेंसीबपुकी नु फरिसी आन शेंसीबपुकी शुश माइजा बाक्‍शा, प्रार्थना पाइनीम। तन्‍न इन शेंसीबपुकी माइजा मबाक्‍थु, जाइनीम तूनीम” देंमा बाक्‍त। 34 मिनु येसुमी मेको आन कली “ग्‍युम्‍ले नु काथा बाक्‍मानु, जन्‍ती आन कली माइजा बाक्‍पाइक्‍ने चाप्‍नीनी ङा? 35 काबु ग्‍युम्‍ले लाइक्‍चा पुंइसीब। मेना माइजा बाक्‍नीम” दे माइक्‍मी बाक्‍त। 36 मिनु येसुमी मेको आन कली “सुइमी नक वा खाक्‍शा, माइत वाम मक्‍येप्‍नीम। मो पाम्‍तेक्‍म हना, नक वा मरिम्‍शो दुम्‍बा ममाइ? नक वा माइत वा तार क्‍येप्‍चा मगारब। 37 सुइमी माइत कुशुल के थैलोमी नक अङगुर शांबु कुर मपाइनीम। कुर पाम्‍तेक्‍म हना, नक अङगुर शांबु बोरशा थैलो बुक्‍ब। मिनु अङगुर शांबु क्‍युप्‍ब। मेको थैलो यो खतम दुम्‍ब। 38 नक शांबु नक थैलोमी कुर पचा माल्‍ब। 39 कशो शांबु तूशा बानी दुम्‍शोमी जीजी शांबु मदाक्‍नीम, मेकोमी ‘कशो ला ब्रोव़ब’ देंब” दे कथा का देंमाक्‍त।