गन्‍ती.
1.
इस्राएलीपुकी इजीप्‍त रे जाक्‍मा आ बर्स निक्‍शी, महिना निक्‍शी ङा ङोंइती ङा नाक्‍त परमप्रभु यावेमी सीनै ङा रागीमी बाक्‍शो ग्रुम्‍तीक ताम्‍बुमी मोसा कली लोव़ पाप्‍तु। प्रस्‍थान ४०:१७ 
मिनु मेकोमी “गे इस्राएली वोंइश मुर आन थर थर नु आन खिं खिं पा नेल्‍ल आन नें ब्रेक्‍चा माल्‍नेवे। उत्‍पत्ती ३५:२३-३६; प्रस्‍थान ३०:१२ 
इस्राएलमी २० बर्स गाप्‍शो नु मेको क्‍येङा लाक्‍शो लडाइम लने चाप्‍ब मुर नेल्‍ल आन कली गे नु हारूनमी लडाइ पचा कली खुप्‍शा वोइक्‍चा माल्‍नीसी। 
मेको नेल्‍ल आन थर रे मुर का कामी इस कली वारच पचा माल्‍नीम। मेको मुर आन खिं ङा ठेयब मुर बाक्‍चा माल्‍नीम। 
मिनु सु सुम इन कली वारच पचा माल्‍नीम देंशा हना, रूबेन आ थर रे शेदेउर आ तौ एली-सुर, 
सिमियोन आ थर रे सुरी-शदै आ तौ शेलुमीएल, 
यहूदा आ थर रे अम्‍मीनादाब आ तौ नहशोन, प्रस्‍थान ६:२३ 
इस्‍साकार आ थर रे सुआर आ तौ नेथनेल, 
जबूलून आ थर रे हेलोन आ तौ एलीआब, 
योसेफ आ तौ एफ्राइम आ थर रे अम्‍मीहुद आ तौ एली-शामा, योसेफ आ तौ मनस्‍से आ थर रे पेदा-सुर आ तौ गमलीएल, १इतिहास ७:२६; उत्‍पत्ती ४८:५ 
बेन्‍यामीन आ थर रे गिदेओनी आ तौ आबी-दान, 
दान आ थर रे अम्‍मी-शदै आ तौ अही-एजेर, 
आशेर थर रे ओक्रान आ तौ पगीएल, 
गाद आ थर रे दूएल आ तौ एली-आसाफ, 
नाप्‍ताली आ थर रे एनान आ तौ अहीरा बाक्‍नीम” दे परमप्रभु यावेमी मोसा कली देंत। 
एकोपुकी इस्राएली आन दाते रे योव़शो आन थर ङा ठेयब मुर बाक्‍नीम। 
मोसा नु हारूनमी योव़शो मुर आन कली ब्रेत्‍ताक्‍स। 
मिनु मेको निक्‍शीमी महिना निक्‍शी ङा ङोंइती ङा नाक्‍ती इस्राएली नेल्‍ल आन कली पुक्‍ताक्‍स। मिनु मुर नेल्‍लेमी आन थर नु आन खिं देंशा, ब्रेक्‍पाइक्‍तेक्‍म। मिनु २० बर्स गाप्‍शो नु मेको क्‍येङा लाक्‍शो आन नें नेल्‍ल ब्रेक्‍पाइक्‍तेक्‍म। 
मिनु परमप्रभु यावेमी अरेशो खोदेंशो पा, मोसामी सीनै ङा गोरशो रागीमी मेको आन कली खुप्‍शा वोइक्‍तीमी। 
इस्राएल आ ङोंइती जरमेशो तौ रूबेन आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो रूबेन आ थर ङा मुर ४६ हजार ५ सहे बाक्‍तेक्‍म। 
सिमियोन आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो सिमियोन आ थर ङा मुर ५९ हजार सहे सां बाक्‍तेक्‍म। 
गाद आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो गाद आ थर ङा मुर ४५ हजार ६ सहे ५० बाक्‍तेक्‍म। 
यहूदा आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो यहूदा आ थर ङा मुर ७४ हजार ६ सहे बाक्‍तेक्‍म। 
इस्‍साकार आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो इस्‍साकार आ थर ङा मुर ५४ हजार ४ सहे बाक्‍तेक्‍म। 
जबूलून आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो जबूलून आ थर ङा मुर ५७ हजार ४ सहे बाक्‍तेक्‍म। 
योसेफ आ तौ एफ्राइम आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो योसेफ आ तौ एफ्राइम आ थर ङा मुर ४० हजार ५ सहे बाक्‍तेक्‍म। 
योसेफ आ तौ मनस्‍से आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो योसेफ आ तौ मनस्‍से आ थर ङा मुर ३२ हजार सहे निक्‍शी बाक्‍तेक्‍म। 
बेन्‍यामीन आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो बेन्‍यामीन आ थर ङा मुर ३५ हजार ४ सहे बाक्‍तेक्‍म। 
दान आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो दान आ थर ङा मुर ६२ हजार ७ सहे बाक्‍तेक्‍म। 
आशेर आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो आशेर आ थर ङा मुर ४१ हजार ५ सहे बाक्‍तेक्‍म। 
नाप्‍ताली आ थर ङा आन खिं खिं ङा २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर नेल्‍ल आन नें ब्रेक्‍ताक्‍म। 
मिनु मेको लडाइ पचा कली खुप्‍शो नाप्‍ताली आ थर ङा मुर ५३ हजार ४ सहे बाक्‍तेक्‍म। 
मिनु मेको मुर नेल्‍ले लडाइ पचा कली खुप्‍ताक्‍म। मोसा, हारून नु मेको आस कली वारच पाइब इस्राएल आ १२ थर ङा ठेयब मुरपुकीमी मेको आन कली लडाइ पचा कली खुप्‍ताक्‍म। उत्‍पत्ती १७:२०; उत्‍पत्ती २५:१६ 
मिनु गिश मुर २० बर्स गाप्‍शो नु मेको क्‍येङा लाक्‍शो लडाइम लने चाप्‍ब वोंइश मुर बाक्‍शो बाक्‍तेक्‍म देंशा हना, गन्‍ती २:३२; प्रस्‍थान १२:३७ 
मेको नेल्‍ल पा ६ लाख ३ हजार ५ सहे ५० जना बाक्‍तेक्‍म। 
लेवी आ खिं ङा मुरपुकी चहिं अरु आन खोदेंशो पा महिक्‍सम। 
मिनु ङोंइती परमप्रभु यावेमी मोसा कली 
“लेवी आ थर ङा मुर आन कली चहिं लडाइ पचा कली मखुप्‍तीमी। मिनु इस्राएली आन कली खोदेंशो पा महिक्‍मी। गन्‍ती २:२३; गन्‍ती ३:१५-३९ 
तन्‍न गे लेवी आन कली आं कबल पशो सन्‍दोस वोइश्‍शो ताम्‍बु नु आ मारेइ मारेइ थोव़क कोव़चा कली वोइक्‍मी। मेकोपुकीमी ग्रुम्‍तीक ताम्‍बु नु आ मारेइ मारेइ थोव़क कुरचा माल्‍नीम। मेकोपुकीमी मेको कोव़चा माल्‍नीम। मिनु आन ताम्‍बु ग्रुम्‍तीक ताम्‍बु आ एर ओंथ कीचा माल्‍नीम। 
मिनु ग्रुम्‍तीक ताम्‍बु याक्‍तमेनु, लेवीपुकीम मेको प्राक्‍चा माल्‍नीम। मिनु ग्रुम्‍तीक ताम्‍बु कीङमेनु, मेकोपुकीमी सेल्‍चा माल्‍नीम। आन नेक्‍था जाक्‍ब अरु मुर साइक्‍चा पुंइसीनीम। गन्‍ती ३:१०,३८; गन्‍ती १७:५ 
अरु इस्राएली आन आन हुल आन दातेमी नु आन छेदर आ ख्रुक्‍तीके ङा बाक्‍तीकेम बाक्‍चा माल्‍नीम। 
लेवी आ मुर चहिं परमप्रभु यावे आ कबल पशो सन्‍दोस वोइश्‍शो ताम्‍बु आ एर ओंथ आन ताम्‍बु कीचा माल्‍नीम। इस्राएलीपुकी ग्रुम्‍तीके ताम्‍बु आ नेक्‍था लचा मदुम्‍नीम। मिनु मेको आन पर्बम परमप्रभु यावे मगाइक्‍ब। मिनु लेवीपुकीमी परमप्रभु यावे आ कबल पशो सन्‍दोस वोइश्‍शो ताम्‍बु खाल पचा माल्‍नीम” दे परमप्रभु यावेमी देंत। गन्‍ती १७:११; गन्‍ती १८:५; २सामुएल २४:१; २इतिहास १९:२; यसैया ५७:१७; यसैया ६४:४-६ 
मिनु इस्राएलीपुकीमी परमप्रभु यावेमी मोसा कली अरेशो खोदेंशो पा नेल्‍ल पाम्‍तेक्‍म।