यहोसु.
21.
मिनु लेवी थर ङा ठेयब मुरपुकी, चढ़ेब एलाजर, नून आ तौ यहोसु नु इस्राएल थर थर ङा ठेयब मुर आन ङोंइती बुक्‍तेक्‍म। यहोसु १४:१; गन्‍ती ३५:२-८ 
मेको कनान रागी ङा शिलोम बुक्‍शा, मेको आन कली “परमप्रभु यावेमी मोसा कली अरेशो खोदेंशो पा, गे आंइ कली बाक्‍चा कली सहरपुकी नु आंइ बी ब्‍यफ आन कली योव़तीक रूपुकी गेचा माल्‍नीनी” देंतेक्‍म। 
मिनु परमप्रभु यावेमी अरेशो खोदेंशो पा इस्राएलीपुकीमी लेवी आन कली आंम आंम रागी रे पा सहर नु बी ब्‍यफ, क्‍यारश भेडा योव़तीक रूपुकी गेम्‍तेक्‍म। 
मिनु योव़ङमेनु, कोहाथ आ मुर आन खिं खिं ङा ग्रूतेक्‍म। मेकोपुकी लेवी आ थर चढ़ेब हारून आ चच युइ बाक्‍तेक्‍म। मेकोपुकीमी यहूदा आ थर, सिमियोन आ थर नु बेन्‍यामीन आ थर रे पा १३ ओटा सहर ताम्‍तेक्‍म। गन्‍ती ३:१७-३९ 
लीशो खिं खिं ङा कोहाथ आ चच युइमी एफ्राइम आ थर, दान आ थर नु मनस्‍से आ उइक्‍थ थर रे पा १० ओटा सहर ताम्‍तेक्‍म। 
मिनु गेरशोन आ खिं खिं ङा मुर आन चच युइमी इस्‍साकार आ थर, आशेर आ थर, नाप्‍ताली आ थर नु बाशानमी बाक्‍ब मनस्‍से आ उइक्‍थ थर रे पा १३ सहर ताम्‍तेक्‍म। 
मिनु मेरारी आ चच युइ आन खिं खिं ङा मुरुमी रूबेन आ थर, गाद आ थर नु जबूलून आ थर रे पा १२ ओटा सहर ताम्‍तेक्‍म। 
मिनु परमप्रभु यावेमी मोसा कली अरेशो खोदेंशो पा इस्राएलीपुकीमी लेवी थर ङा मुर आन कली मेको सहरपुकी नु बी ब्‍यफ, क्‍यारश भेडा योव़तीक रू गेम्‍तेक्‍म। 
मेकोपुकीमी यहूदा आ थर ङा खिं खिं ङा मुर नु सिमियोन आ थर ङा खिं खिं ङा मुरपुकीमी तेको तेको सहर ताम्‍तेक्‍म देंशा हना, 
लेवी आ थर ङा हारून आ चच युइ, कोहाथ आ खिं खिं ङा मुरपुकीमी ताम्‍तेक्‍म। मारदे हना नेल्‍ल क्‍येङा ङोंइती योव़ङमेनु, मेको आन नें ग्रूत। 
मिनु मेकोपुकीमी मेको आन कली यहूदा आ पहाड रागीमी किरयथ-अरबा नु आ नेक्‍था ङा योव़तीक रूपुकी गेम्‍तेक्‍म। किरयथ-अरबा कली हेब्रोन यो देंनीम। मेको अरबा अनाक आ आफ बाक्‍त। यहोसु २०:७ 
तन्‍न मेकोपुकीमी मेको सहर ङा रूपुकी नु मेकेर ङा गाउंपुकी चहिं यपुन्‍ने आ तौ कालेब कली गेशो बाक्‍तेक्‍म। यहोसु १४:३४; यहोसु १५:१३ 
मिनु चढ़ेब हारून आ चच युइ आन खिं खिं ङा मुरपुकीमी मुर साइक्‍ब मुर प्रोक्‍शा लशा बाक्‍तीक सहर हेब्रोन, लिब्‍ना, 
यत्तीर, एश्‍तेमोआ, 
होलोन, देबीर, 
ऐन, युत्ता नु बेथ-शेमेश नु आन बी ब्‍यफ, क्‍यारश भेडा योव़तीक रू नेल्‍ल पा मेको निक्‍शी थर रे ९ ओटा सहर ताम्‍‍तेक्‍म। १सामुएल ६:१२,१५ 
मिनु बेन्‍यामीन आ थर रे पा गिबोन नु गेवा, 
अनाथोथ, अल्‍मोन नु आन बी ब्‍यफ, क्‍यारश भेडा योव़तीक रू नेल्‍ल पा ४ सहर ताम्‍तेक्‍म। येरमीया १:१ 
चढ़ेब हारून आ चच युइ आन खिं खिं ङा मुर आन के नेल्‍ल पा १३ ओटा सहर नु आन बी ब्‍यफ, क्‍यारश भेडा योव़तीके दुम्‍त। 
लेवी आ थर ङा कोहाथ आ खिं खिं ङा लीशो मुर आन कली योव़ङमेनु, एफ्राइम आ थर आ रागी रे पा तेको तेको सहरपुकी ताम्‍तेक्‍म देंशा हना, यहोसु २०:७ 
एफ्राइम आ पहाड रागीमी मुर साइक्‍ब मुर बाक्‍तीक सहर शेकेम नु गेजेर, 
किब्‍साइम नु बेथ-होरोन, नेल्‍ल पा ४ ओटा सहर नु आन बी ब्‍यफ, क्‍यारश भेडा योव़तीक रू ताम्‍तेक्‍म। 
दान आ थर रे एल-तेके, गिब्‍बेथोन, 
आइयालोन, गाथ-रिम्‍मोन, नेल्‍ल पा ४ ओटा सहर नु आन बी ब्‍यफ, क्‍यारश भेडा योव़तीक रू ताम्‍तेक्‍म। 
मनस्‍से आ उइक्‍थ थर रे पा तानाक नु गाथ-रिम्‍मोन सहर निक्‍शी नु आन बी ब्‍यफ, क्‍यारश भेडा योव़तीक रू ताम्‍तेक्‍म। 
कोहाथ आ खिं खिं ङा लीशो मुर आन कली १० ओटा सहर नु आन बी ब्‍यफ, क्‍यारश भेडा योव़तीक रू गेम्‍तेक्‍म। 
मेकोपुकीमी लेवी थर ङा गेरशोन आ खिं खिं ङा मुर आन कली मनस्‍से आ उइक्‍थ थर रे पा बाशानमी मुर साइक्‍ब मुर प्रोक्‍शा लशा बाक्‍तीक सेल्‍शो गोलान नु बेयश्‍तेराह, सहर निक्‍शी नु आन बी ब्‍यफ, क्‍यारश भेडा योव़तीक रू गेम्‍तेक्‍म। यहोसु २०:८ 
मिनु इस्‍साकार आ थर रे पा किश्‍योन, दावेराथ, 
यरमुथ नु एन-गन्‍नीम, नेल्‍ल पा ४ ओटा सहर नु आन बी ब्‍यफ, क्‍यारश भेडा योव़तीक रू गेम्‍तेक्‍म। 
मिनु आशेर आ थर रे पा मिशाल नु अब्‍दोन, 
हेल्‍काथ नु रेहोब, नेल्‍ल पा ४ ओटा सहर नु आन बी ब्‍यफ, क्‍यारश भेडा योव़तीक रू गेम्‍तेक्‍म। 
मिनु नाप्‍ताली आ थर रे पा गालील रागीमी मुर साइक्‍ब मुर प्रोक्‍शा लशा बाक्‍तीक सहर केदेश, हम्‍मोथ-डोर नु कारतान, नेल्‍ल पा सहर सां नु आन बी ब्‍यफ, क्‍यारश भेडा योव़तीक रू गेम्‍तेक्‍म। यहोसु २०:७ 
मेको गेरशोनी आ सहर नेल्‍ल पा १३ ओटा सहर नु आन बी ब्‍यफ, क्‍यारश भेडा योव़तीक रू गेम्‍तेक्‍म। 
मिनु लेवी आ थर ङा लीशो मेरारी आ खिं खिं ङा मुर आन कली जबूलून आ थर रे पा योकनाम, कारताह, 
दीम्‍नाह नु नहालाल, नेल्‍ल पा ४ ओटा सहर नु आन बी ब्‍यफ, क्‍यारश भेडा योव़तीक रू गेम्‍तेक्‍म। 
मिनु रूबेन आ थर ङा बेसेर नु याहास, यहोसु २०:८ 
केदेमोथ नु मेफा-आथ, नेल्‍ल पा ४ ओटा सहर नु आन बी ब्‍यफ, क्‍यारश भेडा योव़तीक रू गेम्‍तेक्‍म। 
मिनु गाद आ थर ङा मुर साइक्‍ब मुर प्रोक्‍शा लशा बाक्‍तीक गिलाद रागी ङा रामोथ, महा-नाइम, यहोसु २०:८ 
हेश्‍बोन नु याजेर, नेल्‍ल पा ४ ओटा सहर नु आन बी ब्‍यफ, क्‍यारश भेडा योव़तीक रू गेम्‍तेक्‍म। 
मिनु लेवी आ लीशो मेरारी आ खिं खिं ङा मुर आन कली योव़शा १२ ओटा सहर गेम्‍तेक्‍म। 
मिनु इस्राएली आन रागी आन दातेमी लेवी आन के ४८ ओटा सहर नु आन बी ब्‍यफ, क्‍यारश भेडा योव़तीक रू दुम्‍तेक्‍म। 
एको सहर नेल्‍ल आन एर ओंथ बी ब्‍यफ, क्‍यारश भेडा योव़तीक रू बाक्‍तेक्‍म। 
मोपा परमप्रभु यावेमी इस्राएली आन कली “गेनुङ” दे मेको आन किकी पिपी आन कली जशो कसम खाप्‍तु। मिनु इस्राएलीपुकीमी मेको रागी कली आंम के सेल्‍शा बाक्‍तेक्‍म। उत्‍पत्ती १२:७ 
मिनु परमप्रभु यावेमी इस्राएली आन किकी पिपी आन कली कसम जशो खोदेंशो पा नेल्‍ल रे पा नाइक्‍चा गेप्‍तु। मेको आन जोरी सत्रु नेल्‍ल मेको नु ब्रुम्‍तेक्‍म। परमप्रभु यावेमी मेको आन जोरी सत्रु इस्राएली नेल्‍ल आन गुइमी गेप्‍तु। ब्‍यवस्‍था १२:९-१० 
मिनु परमप्रभु यावेमी पशो रिम्‍शो लोव़ का सम्‍म यो मली, नेल्‍ल खाप्‍तु। यहोसु २३:१४; १राजा ८:५६