१ इतिहास.
24.
मिनु योव़सीशो हारून आ तौ चच सु सु बाक्‍मा बाक्‍त देंशा हना, आ तौ नादाब, अबीहु एलाजर नु इथामार बाक्‍मा बाक्‍त। १इतिहास २३:६; १इतिहास ५:२९ 
नादाब नु अबीहु चहिं आस आफ बेक्‍चा क्‍येङा ङोंइती तौ मथिथु, बेक्‍सा बाक्‍त। मोपतीके एलाजर नु इथामार चढ़ेब दुम्‍शो बाक्‍सा बाक्‍त। 
मिनु दाऊदमी एलाजर नु आ तौ सादोक नु इथामार नु आ तौ अहीमेलेक नु मेको आन गेय पचा कली हुल सेल्‍शा गेमी बाक्‍त। 
मिनु इथामार आ खिं खिं ङा ठेयब मुर आन क्‍येङा एलाजर आ खिं खिं ङा मुर शुश बाक्‍शो बाक्‍मा बाक्‍त। मोपतीके एलाजर आ तौ आन खिं खिं ङा ठेयब मुर १६ जना आन कली हुल हुल सेल्‍मे बाक्‍त। इथामार आ तौ आन खिं खिं ङा ठेयब मुर ८ जना आन कली हुल हुल सेल्‍मे बाक्‍त। 
मिनु आन दातेम बाजी आप्‍शा, आन हुल हुल सेल्‍मे बाक्‍त। मारदे हना एलाजर नु इथामार आस तौ आस खिं खिं ङा मुर नेल्‍ल खाल का ङा ठेयब मुर बाक्‍मा बाक्‍त। मेको नेल्‍ले परमप्रभु नु आ बाक्‍तीक ङा ठेयब मुर बाक्‍मा बाक्‍त। 
नेथनेल आ तौ शेमायाह, लेवी आ थर ङा ब्रेक्‍ब का बाक्‍माक्‍त। मेकोमी पिप नु ठेयब मुरपुकी, चढ़ेब सादोक, अबीयाथार आ तौ अहीमेलेक, चढ़ेब लेवी आन खिं खिं ङा ठेयब मुर आन ङोंइती चढ़ेब आन नें ब्रेक्‍ता बाक्‍त। एलाजर आ खिं खिं ङा नु इथामार आ खिं खिं ङा गेय पतीक हुल सेल्‍मे बाक्‍त। १इतिहास १८:१६ 
मिनु ङोंइती ङा बाजी आप्‍शो येहो-यारीब आ नेंमी, मेको आ नोले ङा बाजी येदायाह आ नेंमी, 
मेको आ नोले ङा बाजी हारीम आ नेंमी, मेको आ नोले ङा बाजी सेओरीम आ नेंमी, 
मेको आ नोले ङा बाजी माल्‍कीयाह आ नेंमी, मेको आ नोले ङा बाजी मियामीन आ नेंमी, 
मेको आ नोले ङा बाजी हककोस आ नेंमी, मेको आ नोले ङा बाजी अबीयाह आ नेंमी, लूका १:५ 
मेको आ नोले ङा बाजी येशुआ आ नेंमी, मेको आ नोले ङा बाजी शेकन्‍याह आ नेंमी, 
मेको आ नोले ङा बाजी एल्‍याशीब आ नेंमी, मेको आ नोले ङा बाजी याकीम आ नेंमी, 
मेको आ नोले ङा बाजी हुप्‍पाह आ नेंमी, मेको आ नोले ङा बाजी येशेबे-आब आ नेंमी, 
मेको आ नोले ङा बाजी बिल्‍गाह आ नेंमी, मेको आ नोले ङा बाजी इम्‍मेर आ नेंमी, 
मेको आ नोले ङा बाजी हेजीर आ नेंमी, मेको आ नोले ङा बाजी हप्‍पीसेस आ नेंमी, 
मेको आ नोले ङा बाजी पेथायाह आ नेंमी, मेको आ नोले ङा बाजी येहेजकेल आ नेंमी, 
मेको आ नोले ङा बाजी याकीन आ नेंमी, मेको आ नोले ङा बाजी गामुल आ नेंमी, 
मेको आ नोले ङा बाजी देलायाह आ नेंमी नु मेको आ नेल्‍ल क्‍येङा नोले ङा बाजी माजीयाह आ नेंमी दुम्माक्‍त। नेल्‍ल पा २४ हुल बाक्‍मा बाक्‍त। 
मेको आन किकी हारूनमी गेशो पतीक लोव़ गेय बाक्‍माक्‍त। दोपा परमप्रभु यावे आ खिं लचा ब्रेक्‍शो बाक्‍त। परमप्रभु यावे, इस्राएली आन परमप्रभुमी हारून कली गेशा शेंशो लोव़ खोदेंशो बाक्‍शो बाक्‍त। हारून आ खिं खिं ङा लेवी आन गेय पचा माल्‍मा बाक्‍त। 
मिनु लीशो लेवी आ थर ङा मुर सु सु बाक्‍मा बाक्‍त देंशा हना, अम्राम आ तौ आन दाते ङा शुबाएल बाक्‍माक्‍त। शुबाएल आ तौ आ दाते ङा येहदयाह बाक्‍माक्‍त। 
रेहब्‍याह आ तौ आन दाते ङा मेको आन ठेयब मुर इस्‍शीयाह बाक्‍माक्‍त। 
इच्‍हार आ तौ आन दाते ङा शेलोमोथ बाक्‍माक्‍त। शेलोमोथ आ तौ आन दाते ङा याहाथ बाक्‍माक्‍त। 
हेब्रोन आ तौ आन दाते ङा येरीयाह मेको आन ठेयब मुर बाक्‍माक्‍त। मेको आ माइला अमारयाह बाक्‍माक्‍त। आ साइला याहासीएल बाक्‍माक्‍त। आ कान्‍छा येकामेआम बाक्‍माक्‍त। 
उज्‍जीएल आ तौ आन दाते ङा मीकाह बाक्‍माक्‍त। मीकाह आ तौ आन दाते ङा शामीर बाक्‍माक्‍त। 
मिनु मीकाह आ लोक्‍ब इस्‍शीयाह आ तौ आन दाते ङा जकरिया बाक्‍माक्‍त। 
मेरारी आ तौ आन दाते ङा माहली नु मुशी बाक्‍माक्‍त। याजीयाह आ तौ बेनो बाक्‍माक्‍त। 
मेरारी आ तौ चच आन दाते ङा याजीयाह, बेनो, शोहाम, जाक्‍कुर नु इब्री बाक्‍मा बाक्‍त। 
माहली आ तौ आन दाते ङा एलाजर बाक्‍माक्‍त। मेको के तौ मबाक्‍म। 
कीश आ तौ आन दाते ङा येराहमेल बाक्‍माक्‍त। 
मिनु मुशी आ तौ आन दाते ङा माहली, एदेर नु येरीमोथ बाक्‍मा बाक्‍त। मेको लेवी आ थर ङा खिं खिं ङा मुर बाक्‍मा बाक्‍त। 
मेकोपुकीमी पिप दाऊद, सादोक अहीमेलेक नु चढ़ेब आन खिं खिं ङा ठेयब मुरपुकी नु लेवी आ थर ङा मुर आन ङोंइती बाजी आप्‍मे बाक्‍त। खिं खिं ङा ठेयब मुर नु नेल्‍ल क्‍येङा आइक्‍च नेल्‍लेम खाल का ङा पामे बाक्‍त। मिनु गेना गेय पचा, दे यो बाजी आप्‍मे बाक्‍त। १इतिहास २५:८