नेहेम्‍याह.
10.
मेको छाप थोक्‍‍शो ब्रेक्‍स आगाम सु सु आन नें ब्रेक्‍शो बाक्‍त देंशा हना: हाकाल्‍याह आ तौ हुकुम पाइब नेहेम्‍याह नु सिदकीयाह आस नें ब्रेक्‍शो बाक्‍त। 
मिनु चढ़ेबपुकी: सेरायाह, अजारयाह, येरमीया, 
पश्‍हुर, अमारयाह, माल्‍कीयाह, 
हत्‍तुश, शेबान्‍याह, माल्‍लुक 
हारीम, मेरेमोथ, ओबदिया, 
दानीएल, गिन्‍नेथोन, बारुक, 
मेशुल्‍लाम, अबीयाह, मियामीन, 
माजी‍याह, बिल्‍गाइ नु शेमायाह आन नें ब्रेक्शो बाक्‍त। 
मिनु लेवीपुकी अजन्‍याह आ तौ येशुआ, हेनादाद आ खिं ङा बिन्‍नुइ, कदमीएल 
नु मेको आन लोक्‍बपुकी शेबान्‍याह, होदीयाह, केलीता, पेलायाह, हानान, 
मीका, रेहोब, हशाब्‍याह, 
जाक्‍कुर, शेरेब्‍याह, शेबान्‍याह, 
होदीयाह, बानी नु बेनीनु आन नें ब्रेक्शो बाक्‍त। 
ठेयब मुरपुकी पारोश, पहाथ-मोआब, एलाम, जत्‍तु, बानी, 
बुन्‍नी, अज्‍गाद, बेबाइ, 
अदोनीयाह, बिग्‍वाइ, आदीन, 
आतेर, हिज्‍कीयाह, अज्‍जुर, 
होदीयाह, हाशुम, बेजाइ, 
हारीफ, अनाथोथ, नेबाइ, 
माग्‍पीअश, मेशुल्‍लाम, हेजीर 
मेशेजाबेल, सादोक, यादुअ, 
पेलात्‍याह, हानान, आनायाह, 
होशेआ हनान्‍याह, हाश्‍शुब 
हल्‍लोहेश, पिल्‍हा, शोबेक, 
रेहुम, हशाब्‍नाह, मासेयाह, 
अहीयाह, हानान, आनान, 
माल्‍लुक, हारीम नु बानाह आन नें ब्रेक्शो बाक्‍त। 
मिनु लीशो मुरपुकी: चढ़ेबपुकी, लेवीपुकी, लाप्‍चो खाल पाइबपुकी, कुम्‍सो पाइबपुकी, परमप्रभु यावे आ खिंमी गेय पाइबपुकी नु परमप्रभु आ अरेशो पचा कली अर्को रागी ङा मुरपुकी रे तिल्‍सीशो वोंइश मुर, मीश मुर, आन तमी तौपुकी सु सु रुप्‍ने चाप्‍ब बाक्‍मा, मेको नेल्‍ल बाक्‍तेक्‍म। 
मेको आन लोक्‍ब नु आन ठेयब मुरपुकी नु गारशा, परमप्रभु यावे आ वाइल मोसामी गेशो परमप्रभु आ अरेशो लोव़ टिचा कली थुं का पाम्‍तेक्‍म। आंइ परमप्रभु यावे आ शेंशो, आ पतीक लोव़ नु आ फुल्‍लुम मुशा ब्रेक्‍शो लोव़ तुइश्‍शा पचा कली कसम जाम्‍तेक्‍म। 
मिनु गोपुकीमी आंइ तमी आन कली मेको रागी ङा अर्को जात ङा मुर आन कली मगेनीक। आंइ तौ आन कली यो मेको आन तमीपुकी मचाक्‍नीकी। प्रस्‍थान ३४:१६; ब्‍‍यवस्‍था ७:३; एज्रा ९:२ 
मिनु मेको रागी ङा मुरपुकीमी नाइक्‍तीक नाक्‍त मार मार लेयतीक थोव़क नु अन्‍न लेयथ चाक्‍तेक्‍म हना, गोपुकीमी नाइक्‍तीक नाक्‍त नु परमप्रभु आ ठेयब नाक्‍तीम मेको आन के मारेइ मग्‍याप्‍नीकी। मिनु गोपुकी ६ बर्स आ नोले ङा बर्सम मारेइ मख्रुम्‍नीकी। जेर गेशो बाक्‍तक हना यो, मेको बर्समी जेर नु आ चाइक्‍ब काइ मपोक्‍थु, प्रोंइनीकी। ब्‍यवस्‍था १५:१-११; नेहेम्‍याह ५:१०; नेहेम्‍याह १३:१५-१८; येरमीया १७:२१-२७ 
मिनु गोपुकीमी बर्स बर्स कली शेकेल का के भाग सां ङा भाग का परमप्रभु यावे आ खिं ङा गेय कली गेनीकी, दे आंइ थुं फ्रेंताक्‍क। शेकेल का ११.५ ग्राम ङा क्‍येट बाक्‍ब।२इतिहास २४:६; मत्ती १७:२४ 
मार पचा कली गेनीकी देंशा हना, परमप्रभु आ ङोंइती वोइश्‍शो कोंइतीक शोब्‍ले कली अन्‍न चढ़ेतीक नु चोशा चढ़ेतीक कली, नाइक्‍तीक नाक्‍तीम चढ़ेतीक, औंसीम चढ़ेतीक, अरु चाड ङा चढ़ेतीक, नेल्‍ल इं परमप्रभु आ खिं कली माल्‍शो थोव़की, पाप क्‍याम्‍पाइक्‍चा कली चढ़ेतीक, मोदेंशो पा इस्राएली आन मरिम्‍शो पशो क्‍याम्‍चा कली नु इं परमप्रभु आ खिंमी पतीक गेय नेल्‍ल कली गेनीकी। 
मिनु गो, चढ़ेबपुकी, लेवीपुकी नु मुर नेल्‍लेमी इं परमप्रभु आ खिं कली कचेत सु सुम क्‍याक्‍चा, दे फेन्‍टे आप्‍तक। खिं खिं ङा मुरपुकी बर्स बर्समी परमप्रभु यावे आ अरेशो लोव़म ब्रेक्‍शो खोदेंशो पा परमप्रभु यावे, इं परमप्रभु आ खिंम चढ़ेचा कली शी चाक्‍चा माल्‍नीम। प्रस्‍थान २५:३० 
मिनु बर्स बर्सम नेल्‍ल क्‍येङा ङोंइती ङा आंइ रूम सिश्‍शो, मार मार रवा आन फल फुल परमप्रभु यावे आ खिंम चाक्‍नय। लेवी ६:५ 
आंइ नेल्‍ल क्‍येङा ङोंइती जरमेशो तौ नु बस्‍तु भाव आन ङोंइती जरमेशो परमप्रभु आ अरेशो खोदेंशो पा परमप्रभु आ खिंमी चाक्‍चा कली आंइ थुं फ्रेंताक्‍क। आंइ नेल्‍ल क्‍येङा ङोंइती जरमेशो बी ब्‍यफ, क्‍यारश, भेडा आंइ परमप्रभु आ खिंमी गेय पाइब चढ़ेब आन कली चाक्‍नीक, दे थुं फ्रेंताक्‍क। प्रस्‍थान १३:२ 
मिनु आंइ नि‍शो फस ङा नेल्‍ल क्‍येङा ङोंइती ङा भाग, अन्‍न चढ़ेतीके, मार मार रवा आन फल, अङगुर शांबु नु तेल चढ़ेब आन कली गेचा, दे परमप्रभु आ खिं ङा वोइक्‍तीक कोठाम चाक्‍नीकी। मोदेंशो पा लेवी नेल्‍लेम रागी ङा १० भाग ङा भाग का ताइनीम। मेको लेवीपुकीमी आंइ गेय पतीक सहर जाक्‍शा, १० भाग ङा भाग का पोक्‍चा माल्‍नीम। गन्‍ती १५:२०-२१; गन्‍ती १८:२१ 
मोदेंशो पा लेवीपुकी पोक्‍थ गाक्‍मानु, चढ़ेब हारून आ चच युइ यो लेवीपुकी नु गाक्‍चा माल्‍नीम। मिनु लेवीपुकी मेको आन पोक्‍शो रे पा १० भाग ङा भाग का परमप्रभु आ खिं ङा वोइक्‍तीक कोठामी वोइक्‍चा माल्‍नीम। गन्‍ती १८:२६,२८ 
मिनु इस्राएली नु लेवीपुकीमी मेको चाक्‍शो अन्‍न, अङगुर शांबु नु तेल मार मार वोइक्‍तीक कोठाम चाक्‍चा माल्‍नीम। मारदे हना मेको परमप्रभु आ खिं ङा बोसपुकी वोइक्‍तीके बाक्‍त। मिनु मेकेर गेय पाइब चढ़ेबपुकी, लाप्‍चोम खाल पाइबपुकी नु कुम्‍सो पाइबपुकी यो मेकेर बाक्‍नीम। मिनु गोपुकीम “परमप्रभु आ खिं श्‍येत्‍थ मवोइय्‍‍य” दे आंइ थुं फ्रेंताक्‍क।