अय्‍युब.
9.
मिनु अय्‍युबम लोव़ लेश्‍शा 
“गो एको थमा बाक्‍ब, दे तुइक्‍नुङ। तन्‍न परमप्रभु आ ङोंइती बेक्‍शा लाइब मुर दोपा ठीक बाक्‍ने चाप्‍बा ङा? अय्‍युब ४०:३-५; भजन संग्रह १४३:२ 
सुइमी मेको नु लोव़ जिपाइक्‍चा मिम्‍ताक्‍व हना, मेकोम हजार का लोव़म लोव़ का यो लेन्‍ने मचाप्‍ब। भजन संग्रह १९:१३ 
मेको जोक्‍ब तुइक्‍ब नु सक्ति पाइश्‍शो बाक्‍ब। मेको कली मटिथु, सु ग्‍येत्‍थ लने चाप्‍बा ङा? 
मेकोम डांडा आन कली आन मतुइक्‍थुन याक्‍ब। मिनु गाइश्‍शा, मेको आन कली लोक्‍ब। 
मेकोम रागी कली आ बाक्‍‍तीक रे हिक्‍ब। मिनु मेको आ थाम नेल्‍ल ख्रिंख्रि पाइनीम। 
मेकोम नां कली ‘मदपो’ दे अरेब। मिनु सोरुल आन छेङछेङ साम्‍ब। 
मेको आ कामीन सरीङ प्राक्‍शो बाक्‍ब। मेको समुन्‍द्र आ छाल तार गाक्‍ब। 
मेकोमी सप्‍तबर्सी, मिर्गसीरा नु किरकिटी सोरुल नु दक्‍खिन ङा सोरुल आन हुल सेल्‍तु। अय्‍युब ३८:३१; आमोस ५:८ 
मेकोम ठेयब नु मरुप्‍चा ङा गेय पाइब। मिनु हिक्‍ने मचाप्‍चा ङा छक लाक्‍चा ङा गेय पाइब। अय्‍युब ५:९ 
मेको आं बाक्‍‍तीक रे पा लाइब। गो मेको कली मताइनुङ। मेको आ लां खोइश्‍शा गाक्‍मेनु, गो मतुइक्‍नुङ। 
मेकोम रोइक्‍ताक्‍व हना, मेको कली सुम तेक्‍ने चाप्‍बा ङा? सुमी मेको कली ‘गे मार पनी’ दे हिल्‍लो पने चाप्‍बा ङा? 
परमप्रभुम आ गाइक्‍चा मलेप्‍ब। राहाब माइश्‍शो समुन्‍द्र ङा ठेयब जन्‍तु कली वारच पाइबपुकी मेको आ खोइलीम बाप्‍नीम। अय्‍युब २६:१२; भजन संग्रह ८९:११ 
मोदेंशो बाक्‍त हना, गो मेको कली दोपा लोव़ लेन्‍ने चाप्‍नुङा ङा? गो मार लोव़ देंनुङा ङा? 
गो दोस मतशो बाक्‍‍ती हना यो, मेको कली लोव़ लेन्‍ने मचाप्‍नुङ। आं कली दोस गेब कली गो ‘शिशी पाइय्‍यीनी’ दे पुंइने ला चाप्‍नुङ। 
गो मेको कली ब्रेत्‍तुनु, लोव़ लेत्‍ताक्‍यी हना यो, मेकोम आं लोव़ नेंतु, दे थमा मसुइक्‍नुङ। 
मारदे हना मेकोमी आं कली फश गिवारम खतम सेल्‍ब। मोशान आं गार शुश सेल्‍ब। 
मेकोम आं कली लेंशा सोक्‍त कीचा यो मगेब। श्‍येत जपाइश्‍शा आं थुं लुक्‍च लपाइक्‍ब। 
एको सक्ति पाइश्‍शो लोव़ बाक्‍त हना, मेको आं क्‍येङा बोल्‍यो बाक्‍ब। एको ठीक पतीके लोव़ बाक्‍‍त हना, मेको कली सुम सेन्‍ने चाप्‍बा ङा? अय्‍युब ९:३३ 
गो दोस मताइब बाक्‍‍ती हना यो, आं लोव़मीन आं कली दोस ताइब सेल्‍ब। गो दोस मपाइश्‍शो बाक्‍‍ती हना यो, मेकोमी ‘गे दोस ताइब बाक्‍नेवे’ दे चिन्‍ड कोंइब। 
गो दोस मताइब बाक्‍नुङ। मो हना यो गो आं पर्बम मारेइ मतुइक्‍नुङ। गो ब्रोंइचा मदाक्‍नुङ। 
लोव़ नेल्‍ल कान बाक्‍ब। मोपतीके गो मेकोम दोस मताइब नु आ अरेशो मटीब निम्‍फा आस कली खतम सेल्‍ब, देंनुङ। अय्‍युब ८:२०; उपदेसक ९:२-३ 
हिंचा ङा श्‍येतमी कालेमीन मुर कली साइक्‍ब। मेकोम दोस मताइब आन हिंचा ङा श्‍येत जशो आ पर्बम शुक्‍शी पाइब। 
रागी परमप्रभु यावे आ अरेशो मटीब आन गुइमी गेशो बाक्‍ब। मेकोम निसाफ पाइब आन मिक्‍च सिल्‍ब। मेकोम मो मपाप्‍तु हना, सुम पाइबा ङा? 
आं ब्रोंइतीक नाक्‍त दोरब आन क्‍येङा यो शुश दोरशो बाक्‍ब। मारेइ ग्‍येरतीक मत‍थु, मेको नुम्‍ना नुम्‍न लाइनीम। 
मेको बुदी मीलु के सेल्‍शो डोंगा खोदेंशो पा, रीब पा शाइश्‍शा लाइनीम। ब्‍वारदे आन सिखार तार जुक्‍शो खोदेंशो पा लाइनीम। 
गो आं श्‍येत प्रेंनुङ। गो ग्‍येरशो कुल कोंइशा रित्‍नुङ, दें‍ती हना यो, 
गो आं श्‍येत जचा माल्‍शो तशा हिंनुङ। मारदे हना गे आं कली दोस मताइब मदेंनीनी, दे तुइक्‍नुङ। 
गो दोस ताइब दुम्‍ने थुम्‍शो बाक्‍‍ती हना, मोशान मारदे श्‍येत पाइनुङा? 
गो साबुनम चिक्‍साक्‍यी हना यो, आं गुइ थम सफा पा चिक्‍साक्‍यी हना यो, येरमीया २:२२ 
गे आं कली हिलोमीन ब्‍वारनीनी। मिनु आं वाम यो आं कली ग्रांग्रा दिप्‍ब। 
मेको आं खोदेंशो बेक्‍शा लाइब मुर ममाइ। मिनु गो मेको कली लोव़ लेन्‍ने मचाप्‍नुङ। मोदेंशो दुम हना, निसाफ पाइब आन ङोंइती लोव़ पने चबु वा। उपदेसक ६:१० 
आंस दातेम गारपाइक्‍ब सुइ मबाक्‍म। आंस दातेम गुइ वोइक्‍ब सुइ मबाक्‍म। 
परमप्रभुम आ कोक्‍के आं ची रे याक्‍त हना, आं कली महिंपद हना, 
गो मेको नु महिंथु लोव़ पङ वा। तन्‍न आ मिम्‍शो दुम्‍मेनु, गो तुइक्‍‍नुङ” दे अय्‍युबमी शुआह ङा बिल्‍दाद कली देंमाक्‍त।