भजन संग्रह.
18.
कुम्‍सो पपाइक्‍ब कली परमप्रभु यावे आ गेय पाइब दाऊद आ कुम्‍सो। परमप्रभु यावेमी दाऊद कली आ जोरी सत्रु नु सावल आ गुइ रे प्रोना नोले दाऊद आ पशो कुम्‍सो। परमप्रभु यावे, गे आं सक्ति बाक्‍नीनी। गो इन कली दाक्‍नुङ। 
परमप्रभु यावे आं सेरथे फुल्‍लु, आं बोल्‍यो दरवार नु आं जोरी सत्रु रे प्रोंइब बाक्‍ब। आं परमप्रभु, गे आं ख्रुइक्‍तीके सेरथे फुल्‍लु बाक्‍नीनी। परमप्रभु आं तेक्‍तीके नु आं कली ग्‍येरपाइक्‍ब, आं कली प्रोंइब नु आ बोल्‍यो दरवार बाक्‍ब। ब्‍यवस्‍था ३२:१८ 
गो परमप्रभु यावे नु लोव़ पाइनुङ। मेको ठेयब सेल्‍चा पुंइसीब बाक्‍ब। मेकोम आं कली आं जोरी सत्रु रे प्रोंइब। 
गो साइक्‍चा पुंइसीचशो दुम्‍शा, हेरा बेक्‍ती। आं कली साइक्‍ब ब्‍वाक्‍कु आ छाल खोदेंशो पा जाक्‍शा, हिंपाइक्‍ती। भजन संग्रह ११६:३ 
थमा पा साइक्‍चा पुंइसीब दुम्‍ती। साइक्‍बमी आं कली ब्‍वारदम खोदेंशो पा रुक्‍ताक्‍यी। 
गो श्‍येत जङानु, परमप्रभु यावे कली “वारच पने” दे आं परमप्रभु कली ठेयब सेंदा पा पुंइता। मिनु परमप्रभु आ बाक्‍तीकेम बाक्‍शा, आं सेंदा नेंतु। आं पुंइशो लोव़ रुप्‍तु। 
रागी हिम्‍शा, ख्रिनु कुत। मिनु डांडा नेल्‍ल हिम्‍साक्‍म। मारदे हिम्‍साक्‍म देंशा हना, परमप्रभु आ गाइक्‍तीकेम हिम्‍साक्‍म। 
आ नें रे कुन कुत। आ शोव़ रे ठेयब मी ग्रूशा, ब्रशो कोइला हुरुर पा बेरतेक्‍म। प्रस्‍थान १९:१८ 
मिनु परमप्रभु सरीङ रे यित। आ खोइल आगामी क्‍येर गोस्‍स के छिङछिङ बाक्‍त। भजन संग्रह १४४:५-७ 
मेको करूब का ङोइश्‍शा, फशेम बेरत। भजन संग्रह ९९:१ 
छिङछिङमी ख्रुइश्‍शा, आ एर ओंथ नेल्‍ल ब्‍वाक्‍कु कुरशो क्‍येर गोस्‍स बाक्‍तेक्‍म। 
परमप्रभु आ छेङछेङ रे मुप्‍स, मी ब्रशो कोइला नु चिला खोदेंशो पा गोस्‍स ग्रूतेक्‍म। 
परमप्रभु यावेमी सरीङ रे बुंबु पशो खोदेंशो पा आ सेंदा नेंपाइश्‍शो बाक्‍त। 
मिनु मेकोमी आ ब्रा आबानु, आं जोरी सत्रु ब्रपाइक्‍तीमी। ठेयब चिला पपाइश्‍शा, प्रोक्‍पाइक्‍तीमी। 
परमप्रभु यावे इन हुइक्‍तीकेमी नु इन नें रे ग्रूशो सोक्‍तमी समुन्‍द्र नु रागी आ जग ग्रूत। 
परमप्रभुमी इर रे आं गुइ ग्‍याइश्‍शा, ठेयब ब्‍वाक्‍कु रे कीशा ग्रुंइताक्‍यी। 
मिनु आं कली मदाक्‍बपुकी नु आं क्‍येङा बोल्‍यो जोरी सत्रु रे प्रोंइती। 
श्‍येत जङा नाक्‍त आं जोरी सत्रुम पुम्‍ताक्‍यीमी, तन्‍न परमप्रभु यावेमी वारच पाइक्‍ती। 
मिनु आं कली प्रोंइशा, रिम्‍शो ब्रोंइशा बाक्‍तीकेम चाक्‍ती। मारदे हना आं कली दाक्‍शो बाक्‍त। 
गो दोदेंशो पा ठीक पङा, मोदेंशो पा परमप्रभु यावेमी आं कली पाप रे ङोन बाक्‍शो तशा, आं कली रिम्‍शो पाइक्‍ती। 
मिनु गो परमप्रभु यावे आ लां गाक्‍शा, आ अरेशो टिशा, आं परमप्रभु रे नोले मशोंइसीङ। 
आ पतीके लोव़ नेल्‍ल आं ङोंइती बाक्‍तेक्‍म। गो मेको आ फुल्‍लुम मुशा ब्रेक्‍शो लोव़ का यो मप्रोनु। 
मिनु मेको आ ङोंइती गो दोस मताइब बाक्‍ती। मिनु गो ठीक मपतीके रे ङोन बाक्‍ती। 
गो दोदेंशो पा ठीक पङा, मोदेंशो पा परमप्रभु यावेमी आं कली आ ङोंइती पाप रे ङोन बाक्‍शो तशा, रिम्‍शो पाइक्‍ती। 
गे जमान खाप्‍ब आन कली जमान खाप्‍ब बाक्‍नीनी। गे ठीक पाइब आन कली इन ठीक पतीके कोंइनीनी। 
गे पाप रे ङोन बाक्‍ब आन कली इन पाप रे ङोन बाक्‍तीके कोंइनीनी। तन्‍न गे दूली पाइबपुकी नु काइ मगारनीनी। 
गे दिप्‍चा पुंइसीशो मुर आन कली श्‍येत रे प्रोंइनीनी। मिनु ठेयब लेश्‍शो मुर आन कली आइक्‍च सेल्‍नीनी। अय्‍युब २२:२९ 
गे आं बत्ती ब्रपाइक्‍नीनी। परमप्रभु यावे, आं परमप्रभु, गे आं छिङछिङ कली छेङछेङ सेल्‍नीनी। 
इन वारच पाइक्‍तीके गो शुश जोरी सत्रु नु ग्रानुङ। इन वारच पाइक्‍तीके गो ठेयब गारो प्रेक्‍शा ख्राक्‍ने चाप्‍नुङ। 
परमप्रभु आ लां ठीक बाक्‍ब। परमप्रभु यावे आ लोव़ क्‍येख सुन खोदेंशो बाक्‍ब। सु सु मेको कली जिम्‍मा गेंसीनीमी, मेको आन कली तेक्‍तीक बाक्‍ब। 
परमप्रभु यावे क्‍येङा अर्को सु परमप्रभु बाक्‍बा ङा? आंइ परमप्रभु क्‍येङा अर्को तेको सेरथे फुल्‍लु बाक्‍बा ङा? 
परमप्रभुमी आं कली शुश सक्ति पाइश्‍शो सेल्‍ती। मेकोमी आं लां ठीक सेल्‍ब। 
मेकोमी आं खोइली किश्‍श आ खोइली खोदेंशो सेल्‍शा, लाइश्‍शो इर ङा बाक्‍तीकेमी राप्‍पाइक्‍ती। 
मेकोमी आं कली लडाइ पचा नु आं गुइ कली कांसा के लिब्रा खुक्‍चा शेंब। 
गे ब्रोंइतीके ङा इन तेक्‍तीक आं कली गेतीनी। इन ग्‍युरा गुइमी आं कली वारच पाइश्‍शा, ठेयब सेल्‍तीनी। 
आं लां ठेयब सेल्‍तीनी। मोपतीके आं खोइली मग्रेक्‍थु, गाक्‍ने चाप्‍नुङ। 
गो आं जोरी सत्रु आन कली खेदा पा थित्‍तामी। मेको आन कली साइक्‍ने मथुमु सम्‍म गो मलेङङ। 
गो मेको आन कली बोक्‍ने मचाप्‍चा ङा पा तुप्‍तामी। मेकोपुकी आं खोइलीम गोल्‍तेक्‍म। 
मारदे हना गे आं कली लडाइ पचा कली शुश सक्ति गेतीनी। आं जोरी सत्रु आन कली आं खोइलीम बाप्‍पाइक्‍तीनी। 
गे आं जोरी सत्रु आन कली प्रोक्‍‍पाइक्‍तीनी। मिनु गो आं कली काइ मदाक्‍ब आन कली साइक्‍ता‍मी। 
मेकोपुकीमी “वारच पाइक्‍की” दे ग्रीमानु, मेको आन कली प्रोंइब सुइ मबा। परमप्रभु यावे कली पुंइतेक्‍म हना यो, मेकोमी मेको आन कली लोव़ मलेत्‍त। हितोपदेस १:२८ 
मिनु गो मेको आन कली फशेम बेरपाइश्‍शो फुरक खोदेंशो पा फस सेल्‍तामी। गो मेको आन कली लां ङा ग्रांग्रा खोदेंशो पा ताइक्‍‍ताक्‍ङमी। 
गे मुर आन साइक्‍तीक रे आं कली प्रोंइतीनी। रागी रागी कली सासन पाइब सेल्‍तीनी। आं मतुइश्‍शो जात ङा मुरपुकी आं गेय पाइब दुम्‍तेक्‍म। 
आं अरेशो नेन्‍मेनु, मेकोपुकीम टिम्‍तेक्‍म। अर्को रागी ङा मुरपुकी आं ङोंइती बाप्‍तेक्‍म। 
अर्को रागी ङा मुरपुकी ख्रिंख्रि पा हिंशा आन बोल्‍यो दरवार रे ग्रूतेक्‍म। 
परमप्रभु यावे ब्रोंइशा बाक्‍ब आं सेरथे फुल्‍लु ठेयब दुम्‍ल। आं कली प्रोंइब परमप्रभु मान ताइब बाक्‍ल। 
परमप्रभुमी आं कली क्‍येक्‍क लेत्‍तीक सक्ति गेशा, जात जात ङा मुर आन कली आं सासनम बाक्‍ब सेल्‍तु। 
मेकोमी आं जोरी सत्रु रे प्रोंइती। मेको आन क्‍येङा आं कली ठेयब सेल्‍ती। मिनु आं कली दिप्‍शा हुश ख्राक्‍श पोक्‍ब आन क्‍येङा प्रोंइती। 
मोपतीके परमप्रभु यावे, रागी रागी ङा मुर आन दातेमी गो इन नें ठेयब सेल्‍शा, इन कली कुम्‍सो पाइनुङ। रोमी १५:९ 
परमप्रभुमी आ पिप कली शुश ग्राब सेल्‍तु। आ तेल लुक्‍शो पिप दाऊद नु आ चच युइ आन कली गेना हना यो दाक्‍ब। २सामुएल ७:१२-१६