भजन संग्रह.
33.
ठीक पाइबपुकी परमप्रभु यावे कली मिम्‍शा ग्‍येरसीने। रिम्‍शो थुं पाइश्‍शोपुकीमी परमप्रभु यावे कली ठेयब सेल्‍तीक कुम्‍सो पचा शिरनीम। 
बीना ताप्‍शा, परमप्रभु यावे कली ठेयब सेलीन। १० ओटा तार पाइश्‍शो ठेयब ताप्‍तीक ताप्‍शा, मेको कली कुम्‍सो पने। 
मेको कली नक कुम्‍सो का पने। रिम्‍शो पा ताप्‍शा, ग्‍येरसीने। भजन संग्रह ४०:४; भजन संग्रह ९६:१; भजन संग्रह ९८:३; भजन संग्रह १४४:९; भजन संग्रह १४९:१; यसैया ४२:१०; प्रकाश ५:९ 
मारदे हना परमप्रभु यावे आ लोव़ थमा बाक्‍ब। मिनु मेको आ गेय नेल्‍ल आ दाक्‍शा मप्रोंइतीकेमी पाइब। 
मेकोमी ठीक पतीके नु ठीक निसाफ दाक्‍ब। रागी नेल्‍ल परमप्रभु यावे आ गेना हना यो दाक्‍तीकेमी ब्रीशो बाक्‍ब। 
परमप्रभु यावेमी लोव़ पशा, सरीङ सेल्‍तु। आ मुइश्‍शोमी सोरुल नेल्‍ल दुम्‍तेक्‍म। उत्‍पत्ती १:६,१४ 
मेकोमी समुन्‍द्र ङा ब्‍वाक्‍कु कली गारो खोदेंशो पा राप्‍पाइश्‍शो बाक्‍त। मिनु मेको कली वोइक्‍तीकेमी वोइश्‍शो बाक्‍त। भजन संग्रह १०४:९ 
रागी नु मेकेर बाक्‍ब मुर नेल्‍ले परमप्रभु यावे कली मान पा हिंमल। 
मारदे हना परमप्रभुमी लोव़ पा मारेइ मारेइ दुम्‍शो बाक्‍त। मेकोमी अरेवानु, दुम्‍शो बाक्‍तेक्‍म। भजन संग्रह १४८:५ 
परमप्रभु यावेमी रागी रागी ङा मुर आन मिम्‍शा पशो खतम सेल्‍ब। मेकोमी जात जात ङा मुर आन मिम्‍शो गेय शोर गाक्‍शो सेल्‍ब। 
परमप्रभु यावे आ मिम्‍शो गेना हना यो लीब। आ थुंम मिम्‍शो नेल्‍ल पाला सम्‍म लीब। 
तेको रागीम परमप्रभु, आं परमप्रभु यावे बाक्‍बा, मेको ग्‍येरसीशो रागी बाक्‍ब। मारदे हना मेको योव़सीशो रागी बाक्‍ब। ब्‍यवस्‍था ३३:२९ 
परमप्रभु यावेमी स्‍वर्ग रे कोव़शा, मुर नेल्‍ल आन कली ताइब। 
मेकोमी आ बाक्‍तीक रे रागीम बाक्‍ब मुर नेल्‍ल आन कली कोव़ब। 
मेकोमी मुर नेल्‍ल आन थुं ङा मिम्‍तीके सेल्‍ब। मुर नेल्‍ल आन पशो यो कोव़ब। हितोपदेस २१:१ 
मिनु सुइ पिप लडाइ पाइब आन पतीकेमी ब्रोंइने मचाप्‍नीम। लडाइ पाइब मुर आन ठेयब बोलम ब्रोंइने मचाप्‍नीम। १सामुएल १७:- 
मिनु “लडाइम शुश शारा बाक्‍तीके ब्रोंइनीकी” देंचा जोल बाक्‍ब। मेको आन ठेयब सक्तिम यो प्रोंइने मचाप्‍ब। भजन संग्रह २०:८ 
परमप्रभु यावेमी आ कली मान पा हिंब नु आ गेना हना यो दाक्‍तीक कली रिम्‍ब आन कली कोव़ब। 
मिनु मेको आन कली बेक्‍चा रे प्रोंइब। मिनु अन्‍काल दुम्‍मेनु, ब्रोंइपाइक्‍ब। 
गोपुकी परमप्रभु यावे आ लां कोव़शो बाक्‍नीक। मेको आंइ कली वारच पाइब नु तेक्‍तीके बाक्‍ब। 
मिनु परमप्रभु आ पर्बम आंइ थुं ग्‍येरब। मारदे हना गोपुकी मेको आ नेंमी जिम्‍मा गेसाक्‍क। 
परमप्रभु यावे, गो दोपा इन लां कोव़का, मोपा इन गेना हना यो दाक्‍तीके गोपुकी नु बाक्‍ल।