भजन संग्रह.
94.
परमप्रभुमी क्‍येक्‍क लेप्‍ब। परमप्रभु यावे, परमप्रभु, इन छेङछेङ कोंइदीन। ब्‍यवस्‍था ३२:३५ 
रागी कली निसाफ पाइब, बोक्‍कीन। मिनु ठेयब लेश्‍शो आन कली आन पशो ङा क्‍येक्‍क लेत्‍तीन। उत्‍पत्ती १८:२५ 
परमप्रभु यावे, इन अरेशो मटीबपुकी गेना सम्‍म ठेयब लेत्‍नीमी? 
मेकोपुकीम ठेयब लेश्‍शो लोव़ ला पाइनीम। मरिम्‍शो पाइब नेल्‍लेम आन नें बोरपाइक्‍नीम। 
परमप्रभु यावे, मेकोपुकीमी इन मुर आन कली दिम्‍शा ताइश्‍शा पशो बाक्‍नीम। इन योव़शो रागी खतम पोक्‍शो बाक्‍नीम। 
मेकोपुकीमी आन वोंइश बेक्‍शो मीश मुर नु अर्को रागी ङा मुर आन कली साइश्‍शो बाक्‍नीम। मिनु रोम रोइक्‍च आन कली यो साइश्‍शो बाक्‍नीम। 
मिनु मेकोपुकीमी “परमप्रभु यावेमी मताइब। याकूब आ परमप्रभुमी मतुइक्‍ब” देंनीम। भजन संग्रह १०:११ 
गे, निप्‍स मपाइश्‍शो मुरपुकी रुपीन। गे, मूर्खपुकी गेना जोक्‍ब तुइक्‍ब दुम्‍नीनी? 
इन नोफा सेल्‍बमी मनेंबा ङा? मिक्‍च सेल्‍बमी मताइबा ङा? प्रस्‍थान ४:११ 
रागी रागी ङा मुर आन कली सजाइ गेबमी इन कली सजाइ मगेबा ङा? मेकोमी मुर आन कली मारेइ मारेइ तुइक्‍पाइक्‍ब। 
परमप्रभु यावेमी मुर आन मिम्‍शो तुइक्‍ब। मेकोमी इं मिम्‍शो नेल्‍ल जाम्‍शा लाइब, दे यो तुइक्‍ब। १कोरिन्‍थी १:२० 
परमप्रभु यावे, गे सु सु कली सजाइ गेशा, शेंदीनी, मेको ग्‍येरसीशो मुर दुम्‍नीम। मारदे हना मेको आन कली इन अरेशो लोव़ शेंनीनी। अय्‍युब ५:१७ 
इन अरेशो मटीब मबेक्‍मा सम्‍म, गे मेको इन शेंशो आन कली श्‍येत रे नाइक्‍चा गेनीनी। 
मारदे हना परमप्रभु यावेमी आ मुर आन कली मप्रोंइब। मिनु आ योव़शो रागी यो मप्रोंइब। यसैया ३७:३३-३५ 
ठीक मुर लेंशा ठीक पतीके ताइनीम। ब्रेम्‍शो थुं पाइश्‍शो मुर ठीक लां खोइक्‍नीम। 
परमप्रभु आ अरेशो लोव़ मटीब आन पर्बम सु पोन बोक्‍बा? मरिम्‍शो पाइब आन पर्बम सु पोन बोक्‍बा? भजन संग्रह ११५:१७ 
परमप्रभु यावेम आं कली वारच मपाइश्‍शो हना, गो बेक्‍शो मुर आन बाक्‍तीके जाक्‍दीङ वा। 
गो “आं खोइल ग्रेक्‍त” देंती। मिनु परमप्रभु यावे, इन गेना हना यो दाक्‍तीकेमी तिक्‍तीनी। 
गो आं थुंमी थाम्‍पा सुर्ता पाता। इन लेम्‍शोमी आं थुं नांइसाक्‍व। २कोरिन्‍थी १:४-५ 
मार, इन अरेशो मटीब हुकुम पाइबपुकी गे नु गारनीमी ङा? मेकोपुकीमी इन फुल्‍लुम मुशा ब्रेक्‍शो लोव़ दूली सेल्‍शो बाक्‍नीमी। 
मेकोपुकीमी ठीक पाइब आन पर्बम दोपा मरिम्‍शो पचा, दे लोव़ गारपाइक्‍नीम। मिनु दोस मताइब आन कली साइक्‍नीम। 
तन्‍न परमप्रभु यावे आं बोल्‍यो दरवार नु आं ख्रुइक्‍तीक सेरथे फुल्‍लु बाक्‍ब। 
मेकोमी मेको आन मरिम्‍शो पशो आन पिया तार मोइक्‍ब। मिनु मेको आन अरेशो मटितीके मेको आन कली साइक्‍ब। परमप्रभु यावे, आंइ परमप्रभुमी मेको आन कली खतम पोक्‍ब।