भजन संग्रह.
102.
श्‍येत जाइबमी परमप्रभु यावे आ ङोंइती पुंइ‍शो। परमप्रभु यावे आं पुंइशो नेनीन। आं ङाक्‍शा पुंइशो इन बाक्‍तीकेम जाक्‍‍ल। 
गो श्‍येत जङा नाक्‍ती इन कुल मख्रुइक्‍तीन। गो ब्रेङङा नाक्‍ती आं लोव़ फ्रा लेत्‍तीनी। 
मारदे हना आं नाक्‍त कुन बुद पा जाम्‍नीम। मिनु आं रुश नेल्‍ल ठेयब मीम नाप्‍शो खोदेंशो पा चोशो बाक्‍नीम। 
आं थुं घांस खोदेंशो पा बेक्‍ब। मोपतीके गो आं शोब्‍ले यो जने मचबु। 
हुक‍यी पा आं कुशुल नेल्‍ल रुशेम क्‍येप्‍शो बाक्‍नीम। 
गो गोरशो रागी ङा हुहुचील खोदेंशो दुम्‍शो बाक्‍नुङ। गो ब्रेश्‍शो खिं आन दातेम बाक्‍ब बुक्‍स खोदेंशो दुम्‍शो बाक्‍नुङ। 
गो इप्‍‍ने मचाप्‍थु, खिं तार आ का ला बाक्‍शो चिक्‍ब खोदेंशो दुम्‍शो बाक्‍नुङ। 
नेल्‍ल नाक्‍त आं जोरी सत्रुमी आं कली शुक्‍शी पा बाक्‍नीम। आं कली शुक्‍शी पाइबपुकीमी आं नें थिशा साराप पाइनीम। 
मारदे हना गो शोब्‍ले खोदेंशो पा पुलु जाइनुङ। मिनु प्रेक्‍कु ब्‍वाइश्‍शो ब्‍वाक्‍कु तूनुङ। 
एको नेल्‍ल इन गाइक्‍तीकेमी दुम्‍शो बाक्‍ब। मारदे हना गे आं कली क्‍युक्‍शा, ताइक्‍ताक्‍यीनी। 
आं ब्रोंइतीक नाक्‍त पेरचा चिक्‍शो नां खोदेंशो बाक्‍ब। मिनु गो घांस खोदेंशो पा बेक्‍शो बाक्‍नुङ। भजन संग्रह ९०:५-६ 
परमप्रभु यावे, गे गेना हना यो पिप बाक्‍नीनी। मिनु गे नेल्‍ल पाला सम्‍म बाक्‍नीनी। भजन संग्रह १३५:१३ 
गे बोक्‍शा, सियोन कली थमा पा शिशी पाइनीनी। मेको कली शिशी पतीक नाक्‍त जाक्‍शो बाक्‍ब। 
मारदे हना इन गेय पाइबपुकीमी मेकेर ङा फुल्‍लु यो दाक्‍नीम। मिनु मेकेर ङा फुरक कली यो शिशी पाइनीम। 
रागी रागी ङा मुरपुकी परमप्रभु यावे आ नें नेंशा हिंनीम। रागी ङा पिप नेल्‍ले मेको आ सक्ति तशा हिंनीम। 
मारदे हना परमप्रभु यावेमी सियोन कली लेंशा सेल्‍ब। मिनु आ छेङछेङमी ग्रूब। 
मेकोमी श्‍येत जाइब आन पुंइशो नेंब। मिनु आन पुंइशो गेब। 
एको लोव़ मुल जाक्‍ब पाला आन कली ब्रेक्‍चा माल्‍ब। मिनु नोले जरमेबपुकीमी परमप्रभु यावे कली ठेयब सेल्‍नीम। 
मारदे हना परमप्रभु यावेमी इर आ बाक्‍तीक रे कोव़शो बाक्‍ब। परमप्रभु यावेमी स्‍वर्ग रे कोव़शो बाक्‍ब। भजन संग्रह १४:२ 
मेकोमी ग्‍याइश्‍शा चोक्‍चा पुंइसीशो आन हुक‍यी पशो नेंब। मिनु साइक्‍चा पुंइसीब आन कली प्रोंइब। 
मोपा “परमप्रभु यावे ठेयब बाक्‍ब” दे सियोन ङा मुर आन कली शेंदमेक्‍ल। मिनु यरूसलेम ङा मुरपुकीम मेको कली ठेयब सेल्‍मेक्‍ल। 
मिनु जात जात नु राज्‍य राज्‍य ङा मुर बुक्‍शा, परमप्रभु यावे कली ठेयब सेल्‍नीम। भजन संग्रह ८७:४; येरमीया ६०:३-१०; लूका १३:२९-३० 
गो ठिटा बाक्‍ना बाक्‍न, परमप्रभुमी आं सक्ति क्‍‍युम्‍ताक्‍यी, आं ब्रोंइतीक नाक्‍त क्‍युम्‍ताक्‍यी। 
मिनु गो “आं परमप्रभु, आं कली बेक्‍ची मजाक्‍थु, मलाइय्‍यीनी। इन नाक्‍त नेल्‍ल पाला सम्‍म लीनीम” देंती। भजन संग्रह ५५:२४ 
साइ ङोंइती गे रागी आ जग सेल्‍शो बाक्‍तीनी। मिनु सरीङ इन गुइ ङा गेय बाक्‍ब। हिब्रू १:१०-१२ 
मेको नेल्‍ल जाम्‍शा लाइनीम। तन्‍न गे गेना हना यो बाक्‍नीनी। मेको रागी नु सरीङ वा खोदेंशो पा माइत दुम्‍शा जेक्‍नीम। गे फेक्‍तीके वा फाइश्‍शो खोदेंशो पा, मेको आन कली फाइक्‍नीनी। मिनु मेकोपुकी जाम्‍शा लाइनीम। २पत्रुस ३:१० 
तन्‍न गे गेना हना यो खाल का ङा बाक्‍नीनी। मिनु इन नाक्‍त गेनायो मनुप्‍नीम। 
इन गेय पाइब आन चच युइ रिम्‍शो पा बाक्‍चा माल्‍‍नीम। मिनु आन चच युइ इन ङोंइती बोल्‍यो दुम्‍शा बाक्‍नीम।