भजन संग्रह.
107.
गे परमप्रभु यावे कली “गे रिम्‍शो पाइब बाक्‍नीनी” दे कुम्‍सो पने। मारदे हना मेको आ दाक्‍तीके गेना हना यो लीब। भजन संग्रह १०६:१ 
परमप्रभु यावेमी श्‍येत रे प्रोंइचा पुंइसीशोपुकीमी मोपा कुम्‍सो पचा माल्‍नीम। 
मेको आन कली रागी रागी रे खुप्‍ताक्‍मी। पूर्ब, पच्‍छिम, उत्तर, दक्‍खिन नु ब्‍वाक्‍कु बुक्‍तीके रे नु ब्‍वाक्‍कु शाइक्‍तीक रे खुप्‍ताक्‍मी। 
का निक्‍शी गोरशो रागी मेर हिर‍शा, मुर बाक्‍तीक सहर मथिदेम। 
मेकोपुकी जचा तूचा मतथु बेक्‍चा चिक्‍ताक्‍मे। 
मोपा श्‍येत जशा, परमप्रभु यावे कली पुंइतेक्‍म। मिनु मेकोमी मेको आन कली आन श्‍येत रे प्रोंइतु। 
मेकोमी मेको आन कली पित्‍थ लांम खुल्‍तीमी। मिनु मुर बाक्‍तीक सहरम चाक्‍दीत्‍ती‍मी। 
मेकोपुकीमी परमप्रभु यावे कली “गे रिम्‍शो पाइब बाक्‍नीनी” देंचा माल्‍नीम। मारदे हना मेकोमी मुर आन कली गेना हना यो दाक्‍शा, मेको आन कली वारच पा, छक लाक्‍चा ङा गेय पाइब। 
मेकोमी तूतू दाक्‍ब आन कली तूपाइक्‍ब। मिनु शोव़लु बेक्‍शो आन कली ब्रोव़शो जचा थोव़कमी रूपाइक्‍ब। लूका १:५३ 
का निक्‍शी श्‍येत जशा छिङछिङम बाक्‍तेक्‍म। चोक्‍चा पुंइसीशोपुकी साङलोम पाइक्‍चा पुंइसीशा, श्‍येत जशो बाक्‍तेक्‍म। 
मारदे हना मेकोपुकीमी परमप्रभु आ लोव़ मटिशो बाक्‍तेक्‍म। नेल्‍ल क्‍येङा ठेयब आ अर्ती मनेनेम। 
मोपतीके मेकोपुकीमी शुश गेय पचा माल्‍तेक्‍म। मेकोपुकी गोल्‍तेक्‍म। तन्‍न मेको आन कली वारच पाइब सुइ मबाक्‍म। 
मोपा श्‍येत जशा, परमप्रभु यावे कली पुंइतेक्‍म। मिनु मेकोमी मेको आन कली आन श्‍येत रे प्रोंइतु। 
मेकोमी मेको आन कली आन श्‍येत नु छिङछिङ रे ग्रुंइताक्‍मी। मिनु मेको आन साङलो प्रोइक्‍तु। 
मेकोपुकीमी परमप्रभु यावे कली “गे रिम्‍शो पाइब बाक्‍नीनी” देंचा माल्‍नीम। मारदे हना मेकोमी मुर आन कली गेना हना यो दाक्‍शा, मेको आन कली वारच पा, छक लाक्‍चा ङा गेय पाइब। 
मेकोमी कांसा के लाप्‍चोपुकी प्रोल्‍ब। मिनु फलाम के बार जिक्‍ब। 
का निक्‍शी मूर्ख दुम्‍शा, आंम आन मरिम्‍शो पतीकेमी श्‍येत जाम्‍तेक्‍म। 
मेकोपुकीमी जचा थोव़क ग्रांग्रा दिशा, मारेइ जत मदाक्‍म। मिनु बेक्‍चा चिक्‍ताक्‍म। 
मोपा श्‍येत जशा, परमप्रभु यावे कली पुंइतेक्‍म। मिनु मेकोमी मेको आन कली आन श्‍येत रे प्रोंइतु। 
मेकोमी आ लोव़ सोइश्‍शा, मेको आन कली सापाइक्‍तु। मेको आन कली बेक्‍चा रे प्रोंइतु। 
मेकोपुकीमी परमप्रभु यावे कली “गे रिम्‍शो पाइब बाक्‍नीनी” देंचा माल्‍नीम। मारदे हना मेकोमी मुर आन कली गेना हना यो दाक्‍शा, मेको आन कली वारच पा, छक लाक्‍चा ङा गेय पाइब। 
मेकोपुकीमी “गे रिम्‍शो पाइब बाक्‍नीनी” दे चढ़ेमेक्‍ल। मिनु परमप्रभु आ पशो नेल्‍ल ग्‍येरशा कुम्‍सो पा शेंदमेक्‍ल। 
का निक्‍शी जहाज ङोइश्‍शा, समुन्‍द्रम लाम्‍तेक्‍म। मेकोपुकी ग्‍याप्‍ब लेयब दुम्‍शा, ठेयब समुन्‍द्रम गाक्‍तेक्‍म। 
परमप्रभु यावेमी ठेयब समुन्‍द्रम मार मार छक लाक्‍चा ङा गेय पवा, मेको ताम्‍तेक्‍म। 
मिनु मेकोमी अरेशा, ठेयब फश गिवार पपाइक्‍तु। मिनु ठेयब समुन्‍द्र आ छाल पोक्‍तु। 
मेकोपुकी सरीङ सम्‍म जाक्‍दीत्‍तेक्‍म। मिनु लेंशा ठेयब समुन्‍द्रमी दोक्‍तेक्‍म। मिनु मेकोपुकी शुश हिंशा वाम ग्‍याम दुम्‍तेक्‍म। 
मिनु मेकोपुकी दुक्‍शो मुर खोदेंशो पा गोल्‍चा चिक्‍शा गाक्‍तेक्‍म। मिनु मारेइ पने मचाप्‍ब दुम्‍तेक्‍म। 
मोपा श्‍येत जशा, परमप्रभु यावे कली पुंइतेक्‍म। मिनु मेकोमी मेको आन कली आन श्‍येत रे प्रोंइतु। 
मेकोमी फश गिवार दिक्‍पाइक्‍तु। मिनु ठेयब समुन्‍द्र आ छाल दिक्‍तेक्‍म। 
मिनु फश गिवार दिक्‍मेनु, मेकोपुकी ग्‍येरसाक्‍म। मिनु मेकोमी मेको आन कली आन जहाज नाइक्‍तीकेम चाक्‍दीत्‍तु। 
मेकोपुकीमी परमप्रभु यावे कली “गे रिम्‍शो पाइब बाक्‍नीनी” देंचा माल्‍नीम। मारदे हना मेकोमी मुर आन कली गेना हना यो दाक्‍शा, मेको आन कली वारच पा, छक लाक्‍चा ङा गेय पाइब। 
मेकोपुकीमी मुर आन ग्रुम्‍तीकेमी परमप्रभु कली ठेयब सेल्‍मेक्‍ल। खाल्‍पा आन दातेमी “परमप्रभु ठेयब बाक्‍ब” देंमल। 
मेकोमी खोला आन कली गोरशो रागी सेल्‍ब। ब्‍वाक्‍कु बुक्‍तीके आन कली सोव़शो रागी दुम्‍पाइक्‍ब। 
मेकोमी ग्रेल्‍ब रू कली हिक्‍सी रू सेल्‍ब। मारदे हना मेकेर बाक्‍ब मुर आ अरेशो मटीब बाक्‍नीम। उत्‍पत्ती १९:२४-२५ 
मेकोमी गोरशो रागी कली दोम्‍ली बाक्‍शो रागी सेल्‍ब। मिनु थाम्‍पा सोव़शो रागीम शुश ब्‍वाक्‍कु बुक्‍पाइक्‍ब। 
मेकेर शोव़लु बेक्‍शो मुर आन कली बाक्‍चा गेब। मिनु मेकोपुकीमी मेकेर बाक्‍तीक सहर सेल्‍नीम। 
मेकोपुकीमी रूमी वांचेर शोक्‍नीम। अङगुर ख्रुम्‍नीम। मिनु मेको नेल्‍ल शुश ग्रेल्‍नीम। 
मेकोपुकी परमप्रभु आ आसीक तशा, सोशा बोशा दुम्‍‍नीम। मिनु आन बी ब्‍यफ आन कली यो शुश दुम्‍पाइक्‍ब। 
मिनु मेकोपुकी दिप्‍चा पुंइसीतीके नु श्‍येत जतीके शुश मलीशो बाक्‍तेक्‍म। 
मिनु परमप्रभुमी मेकेर ङा हुकुम पाइब आन कली लां मबाक्‍शो गोरशो रागीम गाक्‍पाइक्‍तीमी। अय्‍युब १२:२१ 
तन्‍न मेकोमी श्‍येत जाइब आन कली श्‍येत रे प्रोंइब। मिनु मेको आन खिं ङा मुर आन कली भेडा आन हुल खोदेंशो पा शुश सेल्‍ब। 
मिनु रिम्‍शो थुं पाइश्‍शो मुरपुकी मेको तशा, ग्‍येरसीनीम। मिनु परमप्रभु आ अरेशो मटीब कोव़स ङा कोव़स दुम्‍शा ब्‍वाक्‍ने मचाप्‍नीम। अय्‍युब २२:१९-२० 
सु जोक्‍ब तुइक्‍ब बाक्‍मे, मेकोमी एको लोव़ रुबल। मिनु परमप्रभु यावे आ गेना हना यो दाक्‍तीके आ पर्बम मिम्‍तल।