भजन संग्रह.
115.
भजन संग्रह १३५:१५-२० परमप्रभु यावे, आंइ कली ममाइ, इन नें ठेयब सेल्‍चा गेने। इन गेना हना यो दाक्‍तीके नु दाक्‍शा मप्रोंइतीके आ पर्बम इन नें ठेयब सेल्‍चा माल्‍शो बाक्‍ब। 
रागी रागी ङा मुरपुकीमी “मेको आन परमप्रभु ते बाक्‍म?” दे मारदे हिल्‍लो पाइनीमी? भजन संग्रह ४२:४ 
आंइ परमप्रभु स्‍वर्गम बाक्‍ब। मेकोमी मार दाक्‍ता, मेको पाइब। 
मेको आन मूर्तिपुकी मुर आन गुइम सेल्‍शो सुन नु चांदी के बाक्‍नीम। ब्‍यवस्‍था ४:२८; यसैया ४४:९-२० 
मिनु मेको आन के शोव़ बाक्‍नीम, तन्‍न ब्‍वाक्‍ने मचाप्‍नीम। मिक्‍च बाक्‍नीम, तन्‍न तने मचाप्‍नीम। 
मिनु मेको आन के नोफा बाक्‍नीम। तन्‍न नेंने मचाप्‍नीम। नें बाक्‍नीम, तन्‍न नाम्‍ने मचाप्‍नीम। 
मेको आन के गुइ बाक्‍नीम, तन्‍न सुल्‍ने मचाप्‍नीम। खोइल बाक्‍नीम, तन्‍न गाक्‍ने मचाप्‍नीम। मेकोपुकीमी आन शोव़ रे मारेइ सेंदा ग्रुंइने मचाप्‍नीम। 
मेको आन कली सेल्‍ब यो मोदेंशोन बाक्‍नीम। मिनु मेको आन कली थमा सुइक्‍ब यो मोदेंशोन दुम्‍नीम। 
गे इस्राएलीपुकी, परमप्रभु यावे कली थमा सुतीन। मेको इन कली वारच पाइब नु तेक्‍तीक बाक्‍ब। 
हारून आ खिं ङा मुरपुकी, परमप्रभु यावे कली थमा सुतीन। मेको इन कली वारच पाइब नु तेक्‍तीक बाक्‍ब। 
सु सुम परमप्रभु यावे कली मान पा हिंशा, थमा सुइक्‍नीमी, मेको आन कली वारच पाइब नु तेक्‍तीक बाक्‍ब। 
परमप्रभु यावेमी आंइ कली मिम्‍ब। मिनु आसीक गेब। मेकोमी इस्राएल ङा मुर आन कली आसीक गेब। मेकोमी हारून आ खिं ङा मुर आन कली आसीक गेब। 
मेकोमी परमप्रभु यावे कली मान पा हिंब आइक्‍च ठेयब नेल्‍ल आन कली आसीक गेब। 
परमप्रभु यावेमी इन कली नु इन आल आन कली सोशा बोशा दुम्‍पदल। 
सरीङ नु रागी सेल्‍ब परमप्रभु यावेमी इन कली आसीक गेवल। भजन संग्रह १३४:३ 
स्‍वर्ग परमप्रभु यावे केन बाक्‍ब। तन्‍न रागी चहिं मुर आन कली गेशो बाक्‍ब। 
बेक्‍शो मुर नु बेक्‍शो मुर आन बाक्‍तीकेम लाइबपुकीमी परमप्रभु यावे कली ठेयब मसेल्‍नीम। यसैया ३८:१८ 
तन्‍न गो दा मुल रे गेना हना यो परमप्रभु यावे कली ठेयब सेल्‍नीकी। परमप्रभु यावे कली ठेयब सेलीन।