हितोपदेस.
6.
आं तौ, इ नेक्‍था ङा मुर आ जमानी दुम्‍ते हना, सल्‍ला पने थुम्‍शो बाक्‍ते हना, हितोपदेस ११:१५; हितोपदेस २०:१६; हितोपदेस २२:२६ 
गे इ लोव़मी फ्रेंसीशो बाक्‍ते हना, गे ग्रुम्‍चशो बाक्‍नेवे। 
मुल मार पचा माल्‍नेवे देंशा हना, गे आंम कली प्रोनो। मारदे हना गे इ नेक्‍था ङा मुर आ गुइमी बाक्‍नेवे। मेको कली नमो सिमो पा आ ङोंइती बाप्‍पो। 
इप्‍शा मबाक्‍को। काइ निन्‍द्रा मपावो। 
किश्‍श सिखारी आ गुइ रे ब्रोंइशो नु चिक्‍ब ग्‍याइक्‍ब आ गुइ रे बेरशो खोदेंशो पा, गे यो आंम कली प्रोनो। 
गे अल्‍से, रकमिक्‍च आन कली कोव़ङो। आन पशो कोव़ङो। मिनु जोक्‍ब तुइक्‍ब दुमो। हितोपदेस १०:४; हितोपदेस २०:४ 
मेको आन कली अरेब, सासन पाइब नु हुकुम पाइब मबाक्‍तेक्‍म हना यो, 
मेकोपुकीमी जचा थोव़क खेक्‍चा कली खुप्‍ची ना खुप्‍नीम। 
गे अल्‍से, गेना सम्‍म इप्‍शा बाक्‍नेवे? गेना निन्‍द्रा रे सेंसीशा बोक्‍नेवे? 
याम का ङा निन्‍द्रा पतीके, याम का ङा मुकु जिशा बाक्‍तीके नु याम का कुचुमी गुइ वोइश्‍शा, नाइश्‍शा बाक्‍तीकेमी, हितोपदेस २४:३३-३४ 
प्रुङग दुम्‍तीके खुइ खोदेंशो पा जाक्‍ब। इन मार मार माल्‍तीके या कुरशो लडाइ पाइब खोदेंशो पा जाक्‍ब। 
हिंचा ङा मरिम्‍शो पाइब नु शोर गाक्‍शो मुर हेंथे लोव़ पा गाक्‍नीम। हितोपदेस १०:३१-३२ 
मिक्‍च रिक्‍शा, खोइलीमी चाल पा, ब्रेप्‍चोमी यो चाल पाइनीम। हितोपदेस १०:१० 
मेको आन दूली थुंमी मरिम्‍शो मिम्‍नीम। मेकोपुकीमी गेना हना यो मुर आन कली जि‍पा‍इक्‍नीम। 
मोपतीके मेको आन मतुइक्‍चा ङा पा मेको आन तार श्‍येत जाक्‍ब। मिनु मारेइ पचा मतथु, खतम दुम्‍नीम। 
परमप्रभु यावेमी ६ ओटा थोव़क काइ मदाक्‍ब। ७ ओटा थोव़क पशो तशा ग्रांग्रा दी‍ब। 
मेको मार बाक्‍नीम देंशा हना, ठेयब लेत्‍तीके, जोल पतीके, दोस मताइब मुर आन कली हुश ख्राक्‍श पोक्‍तीके, 
मरिम्‍शो पचा कली मिम्‍ब थुं, मरिम्‍शो पचा चुइक्‍तीके, 
जोल पाइब सांकछी बाक्‍तीके नु वोबु आन दातेम जिचा पोक्‍ब काइ मदाक्‍ब। मेको ७ ओटा थोव़क बाक्‍नीम। 
आं तौ, इ आफ आ अरेशो टिवो, इम्‍मा आ शेंशो लोव़ मप्रोनो। हितोपदेस १:८ 
मेको गेना हना यो इ थुंम वोतो। मेको कली माला खोदेंशो पा रेल्‍सो। 
मिनु गे ते लते हना यो, मेकोमी इ कली लां कोंइनीस। गे इप्‍ते हना, मेकोमी इ कली खाल पाइनीस। गे सेंसेनु, गे नु लोव़ पाइनीस। भजन संग्रह ११९:१७२ 
मारदे हना मेको अरेशो बत्ती नु शेंशो छेङछेङ बाक्‍नीस। ठीक पचा कली हुइक्‍तीके ब्रोंइचा गेब लां बाक्‍ब। 
मेकोमी हेंथे गाक्‍ब मीश मुर रे ङोन बाक्‍पाइक्‍नीम। मिनु हेंथे गाक्‍ब ग्‍युंबे पशो मीश मुर आन ग्रेन्‍देल लोव़ रे ङोन बाक्‍पाइक्‍नीम। हितोपदेस २:१६ 
मेको आ दारशो कुल तशा इ थुंमी मवलो। मेको आ कोव़शोमी इ कली हेंथे मगाक्‍पदल। 
तेल्‍लेम आ गाल्‍च शोब्‍ले का ङा ला बाक्‍ब। तन्‍न ग्‍युंबे पशो मीश मुर नु बाक्‍चा वोंइश मुर आ ब्रोंइतीक नेल्‍ल रोइक्‍ब। 
मुरुमी आ कुचुमी मी वोइक्‍तु हना, आ वा मदुप्‍बा ङा? 
मुर ब्रशो कोइला तार गाक्‍त हना, मेको आ खोइली मचोइबा ङा? 
अरु मुर आ मीश नु इप्‍ब मुर मोदेंशो दुम्‍शा, सु मेको मीश मुर कली थीबा, मेको सजाइ मतथु, मब्रोंइब। हितोपदेस ५:८-१४ 
खुइमी शोव़लु बेक्‍शा, जचा थोव़क खुइ पाप्‍तु हना, मेको मुने मदोक्‍ब। 
तन्‍न मेको ग्‍याइक्‍चा पुंइसाक्‍व हना, आ खुइ पशो ७ खेयप तेम्‍शा थाप्‍चा माल्‍ब। मेकोमी आ खिं आ शोंप नेल्‍ल थाप्‍चा माल्‍ब। प्रस्‍थान २१:३७ 
मोपा मुर आन मीश नु इप्‍ब, निप्‍स मपाइश्‍शो मूर्ख बाक्‍ब। मोदेंशो पाइबमी आंम कली खतम सेल्‍ब। 
मेको तुप्‍चा नु मुने तोक्‍चा पुंइसी‍ब। मेको आ मुने गेनायो मक्‍याम्‍सीब। 
मिनु मेको मीश मुर आ वोंइश शुश गाइक्‍ब। मिनु मेकोमी क्‍येक्‍क लेत्‍ची नाक्‍ती मेको कली मारेइ शिशी मपाइब। 
मेको कली गिश क्‍येट गेप्‍तीवी हना यो, मेकोमी मताक्‍ब।