हितोपदेस.
23.
सासन पाइब नु जथ बाक्‍ङेनु, इ ङोंइती मार बाक्‍मे, मेको रिम्‍शो पा कोव़ङो। 
गे शुश जचा ब्‍वचा दाक्‍ताक्‍वी हना, इ लाकचामी छूरी वोतो। 
मेको आ ब्रोव़शो जचा थोव़क तशा मवलो। मारदे हना मेकोम इ कली खल्‍बल सेल्‍‍ब। 
क्‍येट थीब मुर खोदेंशो दुम्‍चा कली मिम्‍शा बोल मपावो। जोक्‍ब तुइक्‍ब दुम्‍शा मोदेंशो मिम्‍चा प्रोनो। हितोपदेस २८:२२ 
मेको याम का तशा नोले, चिक्‍ब खोदेंशो पा बेरशा लाइब। मेको ककाकुली खोदेंशो पा सरीङ गे बेरशा लाइब। 
शिंम आ खिंमी भोज जथ मलावो। मेको आन ब्रोव़शो जचा थोव़क तशा मवलो। 
मारदे हना मेकोम इ लाकचामी चांम खोदेंशो पा कार‍ब। मेकोमी इ कली जने तूङीने देंत हना यो, मेको आ थुं गे नु मबाक्‍ब। 
इ इच्‍का जशो नेल्‍ल मेचा कुइ‍ब। मेको कली इ ठेयब सेल्‍शा देंशो लोव़ नेल्‍ल मोशीन लाइब। 
मूर्ख आ ङोंइती लोव़ मपावो। मारदे हना इ जोक्‍ब तुइक्‍ब लोव़ नेंशा, शुक्‍शी ला पाइब। 
गे साइ ङोंइती वोइश्‍शो सांद ङा फुल्‍लु मयाक्‍तो। मिनु रोम रोइक्‍च आन रू मचाइक्‍‍तो। हितोपदेस २२:२८ 
मारदे हना मेको आन कली श्‍येत रे प्रोंइब बोल्‍यो बाक्‍ब। मेकोमी मेको आन पर्बम इ कली श्‍येत गेब। 
रिम्‍शो शेंतीक नेनो। जोक्‍‍तीक लोव़ नेंचा कली इ नोफा दाइक्‍तो। 
इ आल आन कली रिम्‍शो पा शेंचा मप्रोनो। मेको आन कली सजाइ गेशा तुप्‍तीवी हना, मेको मबेक्‍नीम। हितोपदेस २२:१५ 
गे मेको कली इच्‍का तुप्‍तीवी हना, मेको आन कली बेक्‍शो मुर आन बा‍क्‍तीक लतीक लां रे प्रोंइनेवे। 
आं तौ, गे जोक्‍ब तुइक्‍ब दुम्‍ते हना, आं थुं यो ग्‍येरसीब। 
गे ठीक लोव़ पवीनु, गो आं थुं रेन साप्‍पा ग्‍येरसीनुङ। 
पापी आन कली गेहे मपावो। तन्‍न नाक्‍त किंत किंत परमप्रभु यावे कली मान पा हिनो। 
मो पाप्‍तीवी हना, इ ब्रोंइतीक नु इ मिम्‍शो नेल्‍ल जाक्‍दीप्‍ब। 
आं तौ, आं लोव़ नेनो। जोक्‍ब तुइक्‍ब दुमो। मिनु इ थुं कली ठीक लांमी ग्‍येत्‍थ गाक्‍पतो। 
शांबु तूब नु शुश श्‍ये ब्‍वाइबपुकी नु मबाक्‍को। 
मारदे हना दुक्‍ब नु शुश जाइब ब्‍वाइब मुरपुकी प्रुङग दुम्‍नीम। शुश दुक्‍शा बाक्‍तीकेमी जेक्‍शो वा फेक्‍पाइक्‍ब। हितोपदेस २१:१७ 
इ आफ आ लोव़ नेनो। इ आ‍म खाल्‍पी दुम्‍मेनु, मेको कली आइक्‍च मसेलो। हितोपदेस १:८ 
थमा पतीक कली ग्यापो। मेको कली गेनायो मलेयङो। तुइक्‍तीक, शेंतीक नु रुप्‍तीक ग्यापो। 
ठीक पाइब तौ तशा, आ आफ ग्‍येरसीब। जोक्‍ब तुइक्‍ब थुं पाइश्‍शो तौ तशा आ आफ शुश ग्‍येरसीब। हितोपदेस १०:१ 
इ आम आफ ग्‍येरसीसल। इ कली थीब गेना हना यो ग्‍येरशा बाक्‍ल। 
आं तौ, इ थुं आं कली गेयी। आं पशो कोव़ङो। 
तेल्‍लेम मीश मुर ठेयब खाल्‍टा खोदेंशो बाक्‍ब। ग्‍युंबे पा यो हेंथे पाइब मीश मुर लुक्‍च लशो इनार खोदेंशो बाक्‍ब। हितोपदेस २२:१४; हितोपदेस ७:१०-१४ 
मेको खुइ खोदेंशो पा लांमी बाप्‍शा बाक्‍ब। मिनु हेंथे गाक्‍ब वोंइश मुर शुश सेल्‍ब। 
सु श्‍येत जाइबा? सु सुर्ता पाइबा? सुम राम्‍शी पोक्‍बा? सुम गाली पाइबा? सु बित्‍‍चीम गार दुम्‍बा? सु का आ मिक्‍च लल जिशो बाक्‍बा? हितोपदेस २०:१; यसैया ५६:१२ 
मेको नाक्‍दो सम्‍म शुश अङगुर शांबु तूब बाक्‍नीम। ब्‍वाइश्‍शो अङगुर शांबु तूब बाक्‍नीम। 
गे लल अङगुर शांबु कोव़स ङा कोव़स मबाक्‍को। गिश दारशो बाक्‍मे, दे मकोव़ङो। मेको रिम्‍शो पा कोव़जम लाइब। 
मिनु मेकोमी नोले बुस्‍सुमी खोदेंशो पा कोक्‍ब। मेको बीस पाइश्‍शो कोक्‍ब बुस्‍स खोदेंशो बाक्‍ब। 
मिनु इ मिक्‍चीमी मार मार ताइनेवे। मिनु दूली लोव़ पाइनेवे। 
मिनु गे समुन्‍द्र आ दातेमी इप्‍शो खोदेंशो दुम्‍नेवे। पला आ ङल तारी इप्‍शो खोदेंशो दुम्‍नेवे। 
मिनु गे मार देंनेवे, देंशा हना “आं कली तुप्‍तीमी, तन्‍न मखाइक्‍ङ। तुप्‍तीमी तन्‍न मतुइक्‍तु। मुल गेना सेंसीशा, लेंशा तूनुङा?” देंनेवे।