हितोपदेस.
31.
पिप लेमुएल आ लोव़। मिनु पिप आ ममामी एको लोव़ पिप कली शेंशो बाक्‍त। हितोपदेस ३०:१ 
मेकोमी “आं तौ, गो इ कली मार देंनुङा ङा? गो इ पर्बम परमप्रभु यावे कली पुंइता। 
इ बोल मीश मुर आन कली मगेवो। मेको हेंथे गाक्‍बपुकीमी पिप आन कली खतम सेल्‍नीम। ब्‍यवस्‍था १७:१७; १राजा ११:१,४ 
लेमुएल, पिप कली अङगुर शांबु तूचा मशिरब। मिनु सासन पाइबमी रकसी काइ तूचा मदुम्‍ब। हितोपदेस २०:१ 
ठेयब मुरपुकी तूशा दुक्‍तेक्‍म हना, अरेशो लोव़ प्रेंनीम। मिनु श्‍येत जाइब आन कली निसाफ पतीकेमी दूली पाइनीम। मेको काइ मदुम्‍ब। 
खतम दुम्‍चा चिक्‍शो मुर आन कली रकसी तूचा गेवो। मिनु अङगुर शांबु थुं लुक्‍च लशो आन कली गेवो। 
मोपा तूशा, मेकोपुकीमी आन प्रुङग दुम्‍तीके प्रेंनीम। मिनु आन श्‍येत ममिम्‍नीम। 
ब्‍वाक्‍ने मचाप्‍ब नु मग्‍येरसीशो नेल्‍ल आन पर्बम ठीक निसाफ पावो। अय्‍युब २४:१२ 
श्‍येत जशो नु प्रुङग आन कली ठीक निसाफ पशा वारच पावो” देंमाक्‍त। 
रिम्‍शो गेय पाइब मीश आल सुम थिन्‍ने चाप्‍बा ङा? मेको हीरा मोती क्‍येङा शुश क्येट लाइब बाक्‍ब। हितोपदेस १८:२२ 
मेको आ वोंइशेमी मेको कली रिम्‍शो पा थमा सुइक्‍ने चाप्‍ब। मिनु आस माल्‍शो मारेइ मारेइ गा‍प्‍ब। 
मेको ब्रोंइम सम्‍म आ वोंइश कली रिम्‍शो पाइब। मरिम्‍शो गेनायो मपाइब। 
मेकोमी ऊन नु रुवा खुप्‍शा, पांइशा शुश गेय पाइब। 
शुश लेयतीक मारेइ मारेइमी ब्रीशो जहाज खोदेंशो पा मेकोमी खिंमी जचा थोव़क चाक्‍ब। 
मेको सुनी कना बोक्‍शा मार मार जचा तूचा क्‍येपाइक्‍ब। आ वाइलीम आन कली मार गेय प‍चा माल्‍बा, नेल्‍ल अरेब। 
शुश मिम्‍शा नोले मेकोमी रू का ग्‍याप्‍ब। मिनु मेकेर आंमा चेम्‍शो क्‍येटीमी अङगुर ख्रुम्‍ब। 
मेको आ रिम्‍शो गेय पतीके आ गुइ बोल्‍यो बाक्‍नीम। 
मेकोमी आ लेयतीक थोव़क रिम्‍शो पा लेयसीशो ताइब। नाक्‍दो आ बत्ती मकाप्‍ब। 
मेकोमी प्‍यूरी लाइश्‍शा, पांइतो पांइब। आ वा आंमा प्रोव़ब। 
मेकोमी प्रुङग आन कली वारच पाइब। मिनु श्‍येत जाइब आन कली आन माल्‍शो गेब। 
मेको ग्‍यू पची ना महिंब। मारदे हना आ मुर नेल्‍लेमी होशो वा फेक्‍शो बाक्‍नीमी। 
मेकोमी आ ब्रतीक रिम्‍शो पा सेल्‍ब। मेको आ फेक्‍तीक प्‍याजी रङ ङा रिम्‍शो पा किरशो सुती वा के बाक्‍नीम। 
मेको आ वोंइश ठेयब मुर दुम्‍शा, सहर ङा ठेयब लाप्‍चोमी बाक्‍मेनु, रागी ङा खाल्‍पा आन दातेमी बाक्‍ब। 
मेकोमी सुती के फेक्‍तीक वा सेल्‍शा लेयब। किप्‍शुर यो ग्‍याप्‍ब लेयब आन कली लेयब। 
मेको नु सक्ति नु मान त‍तीके बाक्‍ब। मेकोमी दीसा मार दुम्‍बा, दे रिश्‍शा सुर्ता मपाइब। 
मेकोमी लोव़ पवानु, जोक्‍ब तुइक्‍ब लोव़ ला पाइब। मिनु मुर आन कली शिशी पचा कली शेंब। 
मेकोमी आ खिं ङा मुर आन कली रिम्‍शो पा कोव़ब। गेय मपथु, हेंथे पा मजाइब। 
मेको आ आलपुकीमी “आंइ आम ग्‍येरसीशो बाक्‍ब” देंनीम। आ वोंइशेमी यो मेको कली मान पाइब। 
मेकोमी “शुश मीश मुरपुकीमी रिम्‍शो पाइनीम। मेको आन क्‍येङा गे रिम्‍शो पाइब बाक्‍नेवे” देंब। 
मुर आन दारस जोल बाक्‍ब। मेको दारस जाम्‍शा लाइब। तन्‍न परमप्रभु यावे कली मान पा हिंब मीश मुर मान पाइक्‍चा पुंइसीब। हितोपदेस ११:२२ 
मेको मीश मुर कली आ गेय पा चेम्‍शो गेवो। सहर ङा ठेयब लाप्‍चोमी मुर नेल्‍लेमी मेको कली मान पामेक्‍ल।