Ala xa Masenyi Annabi Esidirasi bɛ
Masenyi nde yi Kitaabui xa fe ra
Isirayila xa taruxui findixi masenyi belebele nan na Ala xa mixie bɛ. Alatala to Isirayila sugandi a xa ɲama ra, e ɲɛrɛ ki a nun Ala e mɛɛni ki naxɛ, na misaali xungbe masenma. Isirayila nu luxi nɛ alɔ di lɔɛxi naxan gbilenma a baba xa kira singe ma ɲaxankatɛ saabui ra.
Isirayila bɔnsɔɛ fu nun firin to e Marigi xa kira bɛɲin, Ala naxa a niya si gbɛtɛ xa nɔ Isirayila ra, e e keri e xa bɔxi ma, e e findi konyie ra. Na naxa raba Isirayila sɛɛti ra naxan nu na kɔɔla ma, a man naxa raba Isirayila sɛɛti ra naxan nu na yirefanyi ma. Namiɲɔnmɛ nu na birin kolonma nɛ, e fa a fala kɛnɛ ma, beenun a xa raba. E xa masenyi kui, e nu a falama a Alatala na a niyama e xa xanin konyiya kui e xa yunubie xa fe ra, e man nu a falama a Alatala e ragbilenma nɛ e xa bɔxi ma ɲɛ tongo solofere dangi xanbi.
Annabi Esidirasi xa waxati, na ɲɛ tongo solofere nu bara kamali. Alatala naxa a niya Perise mangɛ Sirusi xa natɛ tongo Isirayila konyie ragbilenfe e xɔnyi Darisalamu, alako e xa Ala xa hɔrɔmɔbanxi ti. Sirusi nu wama a xɔn e xa sɛrɛxɛe ba a bɛ, kɔnɔ Ala nu na birin nabama nɛ alako a xa a xa laayidi rakamali. A nu na mɛɛnife a xa ɲama ma.
Isirayila bɔnsɔɛe to gbilen e xɔnyi, e yaxuie naxa fe birin naba alako e naxa Ala xa hɔrɔmɔbanxi ti. E naxa kalamui sa Perise mangɛe bɛ Isirayila xa fe ra, kɔnɔ a raɲɔnyi Isirayila naxa nɔ wali rabade. Ala xa namiɲɔnmɛ Hagi nun Sakari naxa e ralimaniya na wali kui. Na limaniya luma Ala xa mixie yi ra han to. Xa mixi luma Ala sɛɛti ma, e fama tɔɔrɛ sɔtɔde Ala yaxuie saabui ra, kɔnɔ a raɲɔnyi e xa fe sɔɔnɛyama nɛ Alatala fɔrɔmɛ ra. Ala xa won mali lufe a xa sɔɔnɛya kira xɔn. Amina.
Ala xa Masenyi Annabi Esidirasi bɛ
1
Isirayilakae gbilenfe Darisalamu
1 Perise mangɛ Sirusi xa mangɛya fɔlɔ ɲɛ naxan na, Alatala naxa wa fe rakamalife a naxan masen Annabi Yeremi bɛ. Alatala naxa a sa Sirusi bɔɲɛ ma, a xa yi masenyi fala, a man xa a sɛbɛ mixie bɛ naxee na a xa yaamari bun ma. Na masenyi nan yi ki: 2 «N tan Perise mangɛ Sirusi xui nan ya. Marigi Alatala naxan na koore ma naxan duniɲa mangɛya birin fixi n ma, a bara n yaamari, n xa hɔrɔmɔbanxi ti a bɛ Darisalamu, Yudaya bɔxi ma. 3 Naxee birin findixi Ala xa ɲama ra wo ya ma, e birin xa gbilen Darisalamu, Yudaya bɔxi ma, alako e xa hɔrɔmɔbanxi ti Isirayila Marigi Alatala bɛ, naxan na Ala ra Darisalamu. 4 Perisekae xa e dɔxɔboore Isirayila mixie ki gbeti, xɛɛma, se fanyie, nun xurusee ra naxee bama sɛrɛxɛ ɲanigexie ra Ala xa hɔrɔmɔbanxi kui Darisalamu.»
5 Yuda nun Bunyamin bɔnsɔɛ kuntigie, Lewi bɔnsɔɛ mixie nun sɛrɛxɛdubɛ naxee nu na e ya ma, a nun Ala naxee birin bɔɲɛ rate sigafe ra, e birin naxa siga Ala xa hɔrɔmɔbanxi tide Darisalamu. 6 E dɔxɔbooree naxa e ki gbeti, xɛɛma, se fanyie, xurusee, nun harige ra, a nun sɛrɛxɛ ɲanigexie. 7 Mangɛ Nebukadansari nu bara se gbegbe ramini Darisalamu hɔrɔmɔbanxi kui a xa waxati, a fa e raso a xa ala xa banxi kui. Perise mangɛ Sirusi naxa na birin namini, 8 a e taxu kɔbiri ragatama Miteredati ra, a xa a rasanba Yudaya mangɛ Sɛsɛbasari ma.
9 Na see kɔnti nan yi ki: paani xɛɛma daaxi tongo saxan, paani gbeti daaxi wulu keren, finɛ mɔxɔɲɛn nun solomanaani, 10 pileti xɛɛma daaxi tongo saxan, pileti gbeti daaxi kɛmɛ naani, pileti fu, a nun yirabase gbɛtɛ wulu keren. 11 Na se xɛɛma daaxi nun gbeti daaxi birin kɔnti naxa lan yirabase wulu suuli kɛmɛ naani ma. Isirayila geelimanie to keli Babilɔn gbilenfe ra Darisalamu, Sɛsɛbasari naxa na naafuli birin xanin a xun ma.