1 «Bunyaminkae, wo wo gi, wo keli Darisalamu.

Sara fe Tekowa, gere tɔnxuma rate Beti Hakeremi,

barima ɲaxankatɛ na fafe kelife kɔɔla ma,

a gbe mu luxi gbaloe xa wo li.

2 Siyon, taa tofanyi, n wo xun nakanama nɛ.

3 Xuruse dɛmadonyie fama nɛ e xa kiri banxie tide yire,

wo xa taa nu na dɛnnaxɛ,

e fa e xa xurusee makanta mɛnni.»

4 «Siyon yaxuie, wo keli, wo gere so na taa xili ma.

Wo xa siga yanyi ra.

Soge na goro, wo naxa kɔntɔfili,

5 wo man xa siga kɔɛ ra,

banxi makantaxie kanade.»

6 Mangɛ Alatala bara a masen Siyon yaxuie bɛ,

«Wo sa wuri bilie xaba,

wo te se yailan alako wo xa so Darisalamu tɛtɛ kui.

Taa na a ra naxan lanxi a xa ratɔn,

barima e luma e boore tɔɔrɔ ra tɛmui birin.

7 Fe ɲaaxi minima yi taa kui tɛmui birin,

alɔ ye minima kɔlɔnyi kui ki naxɛ.

Kobiɲa nun fe ɲaaxi gbansan nan na e tagi.

Na birin luxi nɛ alɔ fure n naxan toma tɛmui birin.»

8 «Darisalamu, i xa i tuli mati n ma marasi ra,

alako n naxa n makuya i ra,

i fa lu alɔ gbengberenyi, mixi mu sabatixi dɛnnaxɛ.»

9 Mangɛ Alatala bara a masen,

«Isirayilaka naxee luxi,

e birin bama nɛ bɔxi ma,

alɔ sansi bogi gbilenma ba ra ki naxɛ.»

10 «Nde n ma masenyi ramɛma?

Nde findima na seede ra?

Wo tuli xɔrɔxɔ, wo mu fe mɛma.

Wo yoma Alatala xa masenyi ma,

wo mu wama a xa marasi xɔn.

11 Alatala xa xɔnɛ gbo n bɔɲɛ kui,

n xa na fala wo bɛ.»

«Ala xa xɔnɛ Isirayilakae birin lima nɛ,

dimɛdi naxee berema kira ra,

fonike naxee malanma,

xɛmɛ nun ginɛ naxee mɔxi a fanyi ra.

12 N nan n bɛlɛxɛ tima e ma tɛmui naxɛ,

mixi gbɛtɛe fama nɛ e xa banxie tongode,

e xa xɛe, a nun e xa ginɛe.»

Alatala xa masenyi nan na ki.

13 «Kelife dimɛdi ma, dɔxɔfe xɛmɔxi ra,

e birin na e yɛtɛ xa geeni nan fenfe.

Namiɲɔnmɛ nun sɛrɛxɛdubɛ fan na mixi madaxufe.

14 E mu fe gbegbe rabama n ma ɲama malife ra.

E a falama, ‹Wo naxa kɔntɔfili, wo bɔɲɛ xa sa.›

Kɔnɔ bɔɲɛsa yo mu na.

15 A lanma e xa yaagi e xa fe kobie ra,

kɔnɔ e mu yaagima.

Yaagitare nan lanxi e ma.

Na nan a ra, n fama e rabirade kiiti waxati.»

Alatala xa masenyi nan na ki.

16 Alatala bara a masen,

«Wo xa kira fanyi fen,

wo xa a kolon kira forie nu na ki naxɛ.

Kira tinxinxi na minden?

Wo xa lu na kira fari alako wo xa bɔɲɛsa sɔtɔ.»

Kɔnɔ ɲama bara a yaabi,

«Muxu mu wama lufe na kira xɔn ma.»

17 Ala bara a masen, «N bara wo xa sɔɔrie ti wo xa tɛtɛ fari,

naxee mɛɛnima wo ma.

Wo xa e xui ramɛ.»

Kɔnɔ ɲama bara a yaabi,

«Muxu mu wama e xui ramɛfe.»

18 Ala bara a masen, «Ɲamanɛ birin, wo wo tuli mati,

wo xa a mato naxan fama rabade be.

19 Duniɲa birin, wo wo tuli mati.

N tan nan fama yi ɲama ɲaxankatade,

n tan nan fama e maɲɔxunyi sare ragbilende e ma,

barima e mu tin e tuli matide n ma masenyi ra,

e bara yo n ma sɛriyɛ ma.

20 N hayi na e xa surayi sɛrɛxɛ ma, naxan kelixi Seeba?

N hayi na e xa labundɛ sɛrɛxɛ ma,

naxan kelixi yire makuye?

Wo xa sɛrɛxɛ gan daaxie mu rafan n ma,

n mu tinma wo xa sɛrɛxɛ sese rasuxude.

21 Na nan a ra Alatala bara a masen,

N fama nɛ gɛmɛ dɔxɔde yi ɲama ya ra,

e fama e sanyi radinde naxan na.

Babae nun e xa die,

dɔxɔbooree nun dɛfanbooree,

e birin sɔntɔma nɛ.»

22 Alatala bara a masen,

«Ɲama nde na fafe kelife kɔɔla ma,

ɲama gbegbe naxan na duniɲa yire birin.

23 Xali nun tanbɛ na e yi ra.

E ɲaaxu, e mu kinikini kolon.

E xui gbo alɔ mɔrɔnyi.

Soe kanyie nan e ra.

E birin malanxi alako e xa Siyon gere.»

24 Isirayila na wɔyɛnfe e bore tagi, «Won bara e xibaaru mɛ,

limaniya bara ba won yi ra,

kɔntɔfili bara won suxu.

Won na tɔɔrɔfe alɔ ginɛ naxan na di barife.

25 Wo naxa mini daaxa de,

wo naxa ɲɛrɛ kira xɔn ma,

barima won yaxuie won nabilinxi,

santidɛgɛma na e yi ra.»

26 N bara e yaabi, «N ma ɲama, wo sunnun donma ragoro wo ma,

wo xa sunnun alɔ mixi naxan xa di kerenyi bara faxa.

Wo xa sunnunyi xa gbo,

barima won yaxuie na fafe keren na.»

27 Alatala bara a masen n bɛ, «N i findixi mixi nan na

naxan n ma ɲama matoma.

I xa e mato alako i xa a kolon xa e ɲɛrɛ ki fan.

I luxi nɛ alɔ mixi naxan wure nun gbeti raxunuma, a e gbi ba.

28 E birin findixi matandilae nan na naxee yoma Ala ma.

E luxi alɔ wure nun yɔxui, naxan gbi mu baxi.

E mu fan.

29 Xabui tɛ radɛxɛma a fanyi ra

alako a xa wure nun yɔxui raxunu, e gbi xa ba.

Kɔnɔ fe ɲaaxi mu ɲɔnma n ma ɲama tagi.

E luxi nɛ alɔ sunbui naxan mu bama wure kui.

30 E xili falama ‹gbeti kanaxi›,

barima Alatala bara e rabɛɲin.»