9
Wule falafe
Alatala xa masenyi
1 «Xa a sa li n mixi nde sɔtɔ naxee na biyaasi kui,
n kafuma nee nan ma, n na n ma ɲama rabɛɲin.
N wama n makuyafe nɛ e ra,
barima yɛnɛlae nun yanfantee nan e ra.
2 E dɛ wule falama alɔ sɔɔri naxan tanbɛ wolima.
Wule sɛnbɛ gbo e ya ma, e mu nɔndi kolon.
E luma yunubi raba ra, e mu n kolon.»
Alatala xa masenyi nan na ki.
3 «Wo naxa la wo boore ra,
wo naxa la wo ngaxakerenyi ra,
barima birin luma nɛ e boore madaxu ra,
e birin bira tɔɔɲɛgɛ fɔxɔ ra.
4 Kankan wule falama e boore bɛ,
yanfanteya gbo e ya ma.
E dɛ bara wule matinkan,
e luma na yunubi kira nan xɔn ma.
5 Yanfantee nan e ra,
e mu wama n tan kolonfe.»
Alatala xa masenyi nan na ki.
6 Mangɛ Alatala bara a masen,
«N fama nɛ e matode,
alɔ xabui naxan wure raxunuma alako a gbi xa ba.
N fama nɛ fe nde rabade e xa ɲaaxuɲa xa fe ra.
7 Wule falɛ nan e ra, yanfanteya rafan e ma.
E fe fanyi falama e boore bɛ e dɛ nan kui,
kɔnɔ yanfanteya na e bɔɲɛ ma.
8 A mu lanma n xa e ɲaxankata na fe ma?
A mu lanma xɛ e sare xa fi?»
Alatala xa masenyi nan na ki.
9 «N ya ye raminima geyae nun gbengberenyie xa fe ra.
Na birin ganxi, mixi mu na, xuruse mu na.
10 N gɛmɛe malanma nɛ yire Darisalamu nu na dɛnnaxɛ,
mɛnni xa findi wulai baree xɔnyi ra.
N Yudaya taae findima nɛ gbaloe yire ra, mixi yo mu lu naa.»
Isirayila xa masenyi
11 «Adamadi mundun nɔma na fe fahaamude?
Xa Ala bara na tagi raba mixi nde bɛ, a xa a masen muxu bɛ.
Be bɔxi findixi gbaloe bɔxi nan na,
a birin ganxi, mixi mu na.»
Alatala xa masenyi
12 Alatala bara a masen, «Na gbaloe e lixi nɛ barima e bara n ma sɛriyɛ rabolo n naxan fixi e ma. E mu e tuli matixi n ma masenyi ra, e mu n ma yaamarie rabatuxi. 13 E bara bira e yɛtɛ waxɔnfe fɔxɔ ra, e nu Bali kuyee batu e babae naxee masenxi e bɛ. 14 Na nan a ra n tan Isirayila Marigi Alatala bara natɛ tongo yi ɲama xa pɔsɔnɛ gerun. 15 N e rayensenma nɛ ɲamanɛ ma, e tan nun e babae mu dɛnnaxɛ kolon, n e sɔntɔma nɛ santidɛgɛma ra.»
Alatala xa masenyi
16 Mangɛ Alatala xa masenyi nan ya:
«Wo wo tuli mati.
Wo mixie xili naxee fata wade,
e xa e wa xui ramini.
17 E xa e xulun e wa xui raminide.
Won tan fan xa wa,
ya ye xa mini.»
Isirayila xa masenyi
18 Wa xui minima Siyon taa kui:
«Won bara gbaloe sɔtɔ,
won bara lu yaagi kui.
Won bara keli won ma bɔxi ma,
won ma banxie bara kana.»
Annabi Yeremi xa masenyi
19 «Wo tan ginɛe, wo wo tuli mati Alatala xa masenyi ra,
wo wo tuli mati a xa wɔyɛnyi ra.
Wo wo xa die nun wo booree matinkan wa ra,
20 barima faxɛ bara so won xɔnyi.
Won ma die bara faxa kira ra,
won ma fonikee bara faxa taa kui.»
Alatala xa masenyi
21 Alatala xa masenyi nan ya:
«A fala ɲama bɛ mixie na faxafe,
e luxi bɔxi ma alɔ maale xiri naxee xabaxi,
kɔnɔ mixi mu na naxan e malanma.»
22 Alatala xa masenyi nan ya:
«Lɔnnila naxa a yɛtɛ matɔxɔ a xa lɔnni xa fe ra.
Sɛnbɛma naxa a yɛtɛ matɔxɔ a sɛnbɛ xa fe ra.
Banna mixi naxa a yɛtɛ matɔxɔ a xa bannaya xa fe ra.
23 Xa mixi wama a yɛtɛ matɔxɔfe fe nde ma,
a xa a yɛtɛ matɔxɔ a xa danxaniya nan ma fe ra.
Alatala nan n na,
hinnɛnte naxan tinxinyi nun sɛriyɛ rawalima duniɲa ma.
Na fe mɔɔli rafan n ma.»
Alatala xa masenyi nan na ki.
24 Alatala xa masenyi nan ya:
«Lɔxɔɛ fama fade, n mixi halakima nɛ,
naxan sunnaxi kɔnɔ a bɔɲɛ mu sɛniyɛn,
25 alɔ Misirakae, Yudayakae, Edonkae,
Amonikae, Mowabakae,
naxee birin e xunsɛxɛ maxabama
naxan na e xunyi sɛɛtie ma.
Yi si birin naxee na gbengberenyi ma,
e sunnaxi, kɔnɔ e mu sunna wali rabama.
Hali Isirayilakae mu sunna wali rabama,
e bɔɲɛ mu sɛniyɛn.»