Ala xa Masenyi Annabi Yosuwe bɛ
Masenyi nde yi Kitaabui xa fe ra
Isirayilakae xa taruxui sɛbɛxi kitaabui gbegbe nan kui. A fɔlɔma Tawureta Munsa nan ma. Isirayila kuntigie, Annabi Iburahima, Annabi Isiyaga, Annabi Yaxuba, nun a xa di fu nun firinyie, e birin xa taruxui toma Tawureta Munsa kitaabui singe nan kui, naxan xili «Fe Fɔlɔ Fɔlɛ.» Na kitaabui raɲɔnyi a masenma won bɛ Isirayilakae Misira bɔxi li ki naxɛ.
Tawureta Munsa kitaabui firin nde, naxan xili «Isirayilakae xa yɛtɛ sɔtɔɛ,» a fɔlɔma Annabi Munsa xa taruxui nan ma. Ala naxa a ragiri a xa bari Misira bɔxi ma, alako a xa Isirayila ɲama ramini konyiya kui.
Isirayilakae to Xulunyumi Baa igiri Ala xa kaabanakoe saabui ra, e naxa so gbengberenyi ma. Ala nu wama e xaninfe Kanaan bɔxi nan ma, a dɛnnaxɛ laayidi fife ra Isirayilakae ma. Tawureta Munsa kitaabui saxan nde, a naani nde, nun a suuli nde na biyaasi xa fe masenma. Isirayila ɲama naxa bu gbengberenyi ma ɲɛ tongo naani beenun e xa Kanaan bɔxi li. E bu naa e xa danxaniyatareɲa nan ma fe ra.
E to keli Yurudɛn xure igiride, e xa so Kanaan bɔxi ma, Alatala naxa a masen Isirayilakae bɛ a Yosuwe xa findi e xa yarerati ra Annabi Munsa ɲɔxɔɛ ra. Annabi Yosuwe naxa e ragiri Yurudɛn xure ra Ala xa kaabanakoe ra, alɔ Annabi Munsa e ragiri xulunyumi Baa ra ki naxɛ.
Na dangi xanbi, Yosuwe naxa e xun ti Kanaan bɔxi ra, e xa gere so alako e xa na bɔxi sɔtɔ. Ala nu wama na fife e ma a xa xanunteya nun a xa saatɛ nan ma fe ra. Na kui, a naxa e mali na geree kui, han Kanaankae birin naxa gaaxu e ya ra. Isirayila bɔnsɔɛ fu nun firinyi birin naxa e gbe bɔxi sɔtɔ Ala naxan fi e ma e kɛ ra.
Na taruxui birin sɛbɛxi yi kitaabui kui, kelife ɲama Yurudɛn igiri tɛmui naxɛ, han e naxa nɔ Kanaan bɔxi birin na. Na kui won Ala sɛnbɛ toma nɛ a fanyi ra. A xa ɲama rafan a ma. A laayidi yo tongo e bɛ, a na rakamalima nɛ sɛnbɛ nun xanunteya ra. Na birin findima misaali fanyi nan na won bɛ. Xa won fan findi Ala xa mixie ra, a won malima won ma duniɲɛigiri kui a sɛnbɛ ra, alɔ a a laayidi won bɛ ki naxɛ.
Ala xa won mali alako won xa na masenyi fahaamu, won man xa la a ra. Amina.
Ala xa Masenyi Annabi Yosuwe bɛ
1
Isirayila yarerati Yosuwe
1 Annabi Munsa, Alatala xa konyi to laaxira, Alatala naxa a masen Nunu xa di xɛmɛ Yosuwe bɛ, Annabi Munsa malima, 2 «N ma konyi Munsa bara laaxira. Yakɔsi, keli i xa Yurudɛn igiri nun yi ɲama birin na. Wo xa siga bɔxi ma n dɛnnaxɛ sofe Isirayilakae yi ra. 3 Wo na wo sanyi ti dɛnnaxɛ birin ma, n naa fima nɛ wo ma, alɔ n a masen Annabi Munsa bɛ ki naxɛ. 4 Wo xa naaninyie kelima gbengberen yire nɛ, a sa dɔxɔ Liban geyae ra, han Efirati xure belebele ra, Xitikae xa bɔxi birin sa dɔxɔ Baa Xungbe ra sogegorode. 5 Mixi yo mu nɔma i ra i xa simaya kui. Won birin na a ra, alɔ muxu nun Munsa nu a ra ki naxɛ. N mu i rabɛɲinma, n mu i raboloma.»
6 «I i sɛnbɛ so, i xa limaniya, barima i tan nan findima saabui ra yi ɲama bɛ, e xa nɔ kɛ tongode, n nan n kali bɔxi naxan xa fe ra e babae bɛ fife ra e ma. 7 I lan nɛ i xa i sɛnbɛ so, limaniya xa lu i bɛ ki fanyi ra. I xa i ɲɛngi sa yi sɛriyɛ birin xɔn ma, i xa a rabatu alɔ n ma konyi Annabi Munsa i yamarixi a ra ki naxɛ. I naxa binya yirefanyi ma, i naxa binya kɔɔla ma, alako i xa xutu sɔtɔ yire ma i na siga dɛnnaxɛ. 8 Yi sɛriyɛ kitaabui falɛ mu lan a xa makuya i dɛ ra. I xa i ɲɛngi sa a xɔn ma kɔɛ nun yanyi, alako i xa a birin nabatu. Naxan birin sɛbɛxi i xa a rawali, barima na nan a niyama i na so fe naxan birin ya ma, i xutu sɔtɔma a ma, i findima a ra na ki nɛ. 9 N naxan falaxi i bɛ, i naxa nɛɛmu. I i sɛnbɛ so, i xa limaniya. I naxa gaaxu, i naxa hanmɛ, barima i na siga dɛdɛ, i nun n tan i Marigi Alatala birin na a ra.»
10 Yosuwe naxa yi yaamari so ɲama xunyie yi ra: 11 «Wo wo ɲɛrɛ ɲama tagi, wo e yaamari yi ra, ‹Wo wo xa donsee xunlan, barima won fama Yurudɛn igiride beenun xi saxan, alako wo xa bɔxi masɔtɔ won Marigi Alatala naxan sofe wo yi.›»
12 Yosuwe naxa a fala Ruben bɔnsɔɛ, Gadi bɔnsɔɛ, nun Manasi bɔnsɔɛ sɛɛti bɛ, 13 «Wo ratu Alatala xa konyi Munsa xa yaamari ma. A to a fala, ‹Wo Marigi Alatala bara malabui fi wo ma. A bara yi bɔxi so wo yi.› 14 Wo xa ginɛe, wo xa die, nun wo xa xurusee nɔma lude bɔxi ma Annabi Munsa naxan soxi wo yi ra Yurudɛn kiri ma. Kɔnɔ wo tan tima a gereso ki nan ma wo ngaxakerenyie ya ra. Wo xa e mali, 15 han beenun Alatala malabui fima e ma tɛmui naxɛ alɔ wo tan, han e fan xa bɔxi masɔtɔ wo Marigi Alatala naxan fife e ma. Na xanbi, wo man fa gbilen wo xa bɔxi ma, Alatala xa konyi Munsa naxan fixi wo ma Yurudɛn kiri ma, sogetede biri.»
16 E naxa Yosuwe yaabi, «I muxu yamarixi fe naxan birin na, muxu a rabama nɛ. I na muxu xɛɛ dɛnnaxɛ fan, muxu sigama nɛ. 17 Muxu i xui rabatuma nɛ fe birin ma, alɔ muxu Annabi Munsa xui rabatu ki naxɛ. I Marigi Alatala xa bira i fɔxɔ ra alɔ e nun Munsa nu a ra ki naxɛ. 18 Mixi yo kalabante i xui ma, a mu bira i wɔyɛn xui fɔxɔ ra, i fe naxan birin falama a bɛ, a mu na mɛ, na kanyi faxama nɛ. I xa i sɛnbɛ so, i man xa limaniya.»