Ala xa masenyi Annabi Abadiyasi bɛ
Masenyi nde yi Kitaabui xa fe ra
Yi kitaabui kui, Annabi Abadiyasi a Ala xa kalamui masenma Edon bɔnsɔɛ xa fe ra. A nɔndi naxan fala a findi nɔndi hagigɛ nan na ibunadama birin bɛ. A masenyi fanyi tima ngaxakerenya xa fe ra. A lanma won xa won tuli mati na sɛriyɛ ra.
Edon benba singe findixi Esayu nan na, Isiyaga xa di singe Rebeka naxan barixi a bɛ. A guli boore findixi Yaxuba nan na. Na di firinyie to nu na e nga tɛɛgɛ, Ala naxa a masen Rebeka bɛ a e findima si firin nan na naxee fama e bore gerede (Fe Fɔlɔ Fɔlɛ 25:23). A naxɛ na di singe luma a xanbiratoe xa nɔɛ bun ma. Na kui Ala naxa barakɛ sa Isiyaga xa di Yaxuba ma, a findi benba ra a xa ɲama Isirayila bɛ. Esayu tan findi Edonkae benba singe nan na. E xa bɔxi nu na Isirayila nun Yudaya bɔxi nan fuge ra.
Ɲɛ wuyaxi dangi xanbi, Isirayila nun Yudaya naxa e kobe raso Alatala ra, a fa e xanin konyiya kui Babilɔn bɔxi ma. Ala xa ɲama nu na na tɔɔrɛ kui tɛmui naxɛ, e ngaxakerenyi naxee findixi Edonkae ra, e mu tin e malide fefe ma, e ɲan naxa nde sa e xa tɔɔrɛ xun. Hali Ala to nu wama Yudaya ɲaxankatafe e xa yunubie xa fe ra, na maraɲaaxui xa fe ra Edonkae naxan naminixi Ala xa ɲama ma, na mu a kɛnɛn. Ngaxakerenya fanyi mu nu na na ra.
Yi masenyi xɔrɔxɔɛ Esayu bɔnsɔɛ bɛ a fatanxi na yunubi mɔɔli nan na. Ala xa won mali ngaxakerenya binyade alɔ Ala wama a xɔn ma ki naxɛ. Amina.
Ala xa masenyi Annabi Abadiyasi bɛ
1
Alatala xa masenyi Edon ɲama bɛ
1 Annabi Abadiyasi xa laamatunyi nan ya.
Marigi Alatala xa masenyi Edon ɲama xa fe ra.
Muxu bara xibaaru nde mɛ kelife Alatala ma.
Mixi nde xɛɛxi ɲamanɛe ma yi yaamari ra:
«Wo keli! Won xa siga Edon gerede!»
2 «N i magoroma nɛ sie tagi, i fa lu yaagi kui.
3 I xa yɛtɛ igboya bara i madaxu,
i tan naxan sabatixi fɔnmɛe ra geyae kɔn na.
I a falama, ‹Nde nɔma n nagorode lanbanyi?›
4 Hali i te koore ma alɔ sɛgɛ,
i sa i tɛɛ sa tunbuie ya ma,
n tan i ragoroma nɛ han bɔxi.»
Alatala xa masenyi nan na ki.
5 «Xa muɲɛtie soma i xɔnyi kɔɛ ra,
e mu e waxɔnse tongoma xɛ e hayi na naxan ma?
Xa sansi xabɛe fama i xɔnyi,
e mu tɔnsɔɛ ndee luma xɛ naa?
6 Kɔnɔ Esayu bɔnsɔɛ tan, e harige birin bama nɛ e yi,
e xa naafuli nɔxunxi tongoma nɛ.
7 Wo saata tongo booree wo kerima nɛ wo xa bɔxi ma.
Wo mali booree wo yanfama nɛ,
wo nun naxee nu wo dɛgema lenge keren kui,
nee gantanyi tema nɛ wo ya ra.»
8 Alatala xa masenyi nan ya:
«N lɔnnilae sɔntɔma nɛ Edon bɔxi ma na lɔxɔɛ,
n xaxilimae faxama nɛ Edon benba Esayu xa geyae fari.
9 E benba Teman xa sɔɔrie gaaxuma nɛ,
e birin fa sɔntɔ Esayu xa geya longori.
10 Wo na gbaloe sɔtɔma nɛ wo xa fe ɲaaxi ma
wo naxan nabaxi wo ngaxakerenyi Yaxuba bɔnsɔɛ ra.
Yaagi dusuma nɛ wo xun na, wo fa ɲɔn abadan.
11 Na lɔxɔɛ e yaxuie to e xa bannaya xanin,
e na raba nɛ wo ya xɔri.
E to so e xa taa kui, e xa Darisalamu findi e gbe ra,
wo nu saxi e yaxuie dɛ ra.
12 Wo mu lan wo xa ɲɛlɛxin wo ngaxakerenyie xa tɔɔrɛ ra.
Wo mu lan wo xa sɛɛwa Yuda bɔnsɔɛ xa gbaloe ra.
Wo mu lan wo xa wo yɛtɛ igbo e xa tɔɔrɛ kui.
13 Wo mu lan wo xa so n ma ɲama xa taa kui a kasarɛ lɔxɔɛ.
Wo mu lan wo xa yo e ma e kasarɛ lɔxɔɛ.
Wo mu lan wo xa e harige ba e yi e kasarɛ lɔxɔɛ.
14 Wo mu lan wo xa wo nɔxun kira dɛ ra e xa mixie faxafe ra
naxee e gixi gere ma.
Wo mu lan wo xa e sa e yaxuie sagoe e xa kasarɛ lɔxɔɛ.»
15 «Alatala xa kiiti lɔxɔɛ na fafe si birin bɛ.
I naxan naba, na nan nabama i fan na.
I xa wali sare gbilenma nɛ i ma.
16 Wo n ma xɔnɛ naxan sɔtɔxi n ma geya sɛniyɛnxi fari,
sie fan fama nɛ na mɔɔli sɔtɔde han e bɔnsɔɛ ɲɔn.
17 Kɔnɔ mixi fama kisi sɔtɔde Siyoni geya fari.
Mɛnni findima yire sɛniyɛnxi nan na.
Yaxuba bɔnsɔɛ fama nɛ a kɛ masɔtɔde.
18 Yaxuba bɔnsɔɛ nun Yusufu bɔnsɔɛ luma nɛ alɔ tɛ,
naxan Esayu bɔnsɔɛ ganma alɔ sɛxɛ.
Mixi yo mu kisima Esayu bɔnsɔɛ ya ma.»
Alatala xa masenyi nan na ki.
19 «Negewikae Esayu xa geyae suxuma nɛ,
Sefelakae Filisitakae xa bɔxi tongoma nɛ,
a nun Efirami nun Samari bɔxie.
Bunyamin bɔnsɔɛ fan Galadi bɔxi sɔtɔma nɛ.
20 Yi Isirayilaka naxee gbilen e fama nɛ nɔde Kanaan bɔxi ra han Sarepeta.
Darisalamukae naxee gbilen Sefarada,
nee fama nɛ Negewi taae suxude.
21 Mixi naxee geenima nu fama nɛ tede Siyoni geya fari,
e xa Esayu xa geyae yamari.
Mangɛya luma Alatala nan bɛ.»