1 عِسِرَيِلَكَيٍ مَن نَشَ قٍ كٌبِ رَبَ عَلَتَلَ يَ عِ نَشَن مُ رَقَن عَ مَ. عَ نَشَ عٍ سَ مَدِيَنكَيٍ شَ نْي بُن مَ هَن حّ سٌلٌقٍرٍ. 2 مَدِيَنكَيٍ نَشَ قٍ شْرْشْييٍ دْشْ عِسِرَيِلَ مَ. نَ نَن عَ تٌ، عِسِرَيِلَكَيٍ نَشَ قٌلٍيٍ فٍ فٍيَ قَرِ، عٍ يّتّ مَكَنتَدٍيٍ يَءِلَن فّمّ لٌنفٌرِ رَ. 3 عِسِرَيِلَكَيٍ نَ شّ سَ تّمُي نَشّ، مَدِيَنكَيٍ، عَمَلّكِكَيٍ، نُن بْنسْي فبّتّيٍ نَشٍيٍ كٍلِمَ سٌفٍفٌرٌدٍ، نٍيٍ نُ تٍمَ نّ، عٍ تِ عٍ كَنكٍ. 4 عٍ نُ لُ عٍ قّ مَ عٍ شَ عِسِرَيِلَكَيٍ شَ دَشَمُي بِرِن كَنَ هَن فَسَ. عٍ مُ نُ سٍسٍ لُمَ عِسِرَيِلَ، هَلِ بْشِ دَشَمُييٍ، يّشّييٍ، نِنفٍيٍ، شَ نَ مُ عَ رَ سٌقَلٍيٍ. 5 نَ مِشِيٍ نُ تٍمَ تّمُي نَشّ، نُن عٍ شَ شُرُ سٍيٍ رَ، كِرِ بَنشِيٍ، نُن حْشْمّيٍ، عٍ نُ لُمَ نّ عَلْ كَتٌي فَلِ نَشَن كَسَرّ رَبَمَ بْشِ مَ.

6 مَدِيَنكَيٍ تٌ عِسِرَيِلَ قِندِ سٍتَرٍ بْشِ رَ، عِسِرَيِلَكَيٍ نَشَ عَلَتَلَ مَشَندِ. 7 عٍ تٌ عَلَتَلَ مَكُلَ مَدِيَنكَيٍ شَ قٍ رَ، 8 عَلَتَلَ نَشَ نَمِحْنمّ كٍرٍن شّي عٍ مَ. عَ نَشَ عَ قَلَ عٍ بّ، «عِسِرَيِلَ مَرِفِ عَلَتَلَ شَ مَسٍنيِ نَن يِ كِ، ‹ﭑ بَرَ وٌ رَ مِنِ مِسِرَ بْشِ مَ، وٌ نُ نَ كٌنيِيَ كُي دّننَشّ. 9 ﭑ بَرَ وٌ بَ مِسِرَكَيٍ بّلّشّ، عَ نُن وٌ يَشُي بِرِن. ﭑ بَرَ عٍ كٍرِ وٌ يَ رَ، ﭑ قَ عٍ شَ بْشِ قِ وٌ مَ. 10 ﭑ بَرَ عَ مَسٍن وٌ بّ، «ﭑ تَن نَن نَ عَلَتَلَ رَ، وٌ مَرِفِ عَلَ. وٌ نَشَ فَاشُ عَمٌرِكَيٍ شَ عَلَيٍ يَ رَ، وٌ سَبَتِشِ بْشِ نَشٍيٍ مَ.» كْنْ وٌ مُ بِرَشِ ﭑ شُي قْشْ رَ.›»

11 عَلَتَلَ شَ مَلٍكّ نَشَ سٌ عٌقَرَ دَاشَ كُي، عَ نَشَ دْشْ وُرِ بِلِ بُن مَ، نَشَن تِشِ يٌوَ سِ شْنيِ، نَشَن نُ نَ عَبِيٍسَ بْنسْي يَ مَ. يٌوَ سِ شَ دِ فٍدٍيٌن نُ نَ مّنفِ بْنبْقٍ يِلِ كُي وّنِ بٌفِ نُ بُندُ مَ دّننَشّ، عَلَكٌ عَ شَ عَ نْشُن مَدِيَنكَيٍ مَ. 12 عَلَتَلَ شَ مَلٍكّ نَشَ مِنِ عَ مَ، عَ قَ عَ قَلَ عَ بّ، «عِ تَن فٍرٍ سٌي قَنيِ، وٌ نُن عَلَتَلَ بِرِن نَن عَ رَ.» 13 فٍدٍيٌن نَشَ عَ قَلَ عَ بّ، «ﭑ مَرِفِ، شَ مُشُ نُن عَلَتَلَ بِرِن نَن عَ رَ، يِ قٍ شْرْشْي بِرِن قَ مُشُ لِشِ مُنقٍ رَ؟ عَ شَ كَابَنَكٌي نَ مِندٍن؟ مُشُ بَبَيٍ بَرَ كَابَنَكٌ ندٍ مَدْشْ مُشُ بّ. عٍ نَشّ، ‹عَلَتَلَ نَن مُشُ رَ مِنِ مِسِرَ رَ.› يَكْسِ عَلَتَلَ بَرَ وٌن نَبّحِن، عَ وٌن سَ مَدِيَنكَيٍ سَفٌ.»

14 عَلَتَلَ نَشَ عَ مَسٍن عَ بّ، «عِ سّنبّ سٌ. عِ قَمَ نّ عِسِرَيِلَ رَتَنفَدٍ مَدِيَنكَيٍ بّلّشّ. ﭑ تَن شَ مُ عِ شّيشِ؟» 15 عَ نَشَ عَ يَابِ، «ﭑ مَرِفِ، ﭑ تَن نْمَ عِسِرَيِلَ رَتَنفَدٍ عَ يَشُييٍ مَ؟ ﭑ شَبِلّ شَ سٍتَرٍحَ دَنفِ شَبِلّ بِرِن فبٍ رَ مَنَسِ بْنسْي يَ مَ. ﭑ بَبَ شَ دِ دْنشْي نَ ﭑ تَن نَن نَ.» 16 عَلَتَلَ نَشَ عَ مَسٍن عَ بّ، «كْنْ وٌن بِرِن نَن عَ رَ. نَ كُي عِ قَمَ مَدِيَنكَيٍ بِرِن بْنبْدٍ عَلْ عِ نَ مِشِ كٍرٍن نَن بْنبْقٍ.» 17 فٍدٍيٌن نَشَ عَ يَابِ، «شَ عِ بَرَ هِننّ ﭑ نَ، تْنشُمَ ندٍ مَسٍن ﭑ بّ، نَشَن عَ مَسٍنمَ عِ تَن يَتِ نَن وْيّنشِ ﭑ بّ. 18 يَندِ، عِ نَشَ عِ مَكُيَ بٍ رَ، بٍيمَنُ ﭑ شَ قَ ﭑ مَ سّرّشّ رَ عِ بّ.» عَلَتَلَ نَشَ عَ قَلَ، «ﭑ لُمَ بٍ هَن عِ قَمَ تّمُي نَشّ.»

19 فٍدٍيٌن نَشَ سِفَ، عَ سَ سِ يْرّ كٍرٍن قَشَ، عَ قَرِن بُسَلِ كٍرٍن نَقَلَ تَامِ لّبِنِتَرٍ رَ. عَ نَشَ سُبٍ سَ دٍبٍ كُي، عَ نَشَ بْرّ سَ بْرّ سَسٍ كُي، عَ نَشَ عٍ دّنتّفّ عَلَتَلَ بّ وُرِ بِلِ بُن مَ. 20 عَلَتَلَ شَ مَلٍكّ نَشَ عَ مَسٍن عَ بّ، «سُبٍ نُن تَامِ لّبِنِتَرٍ تٌنفٌ، عِ شَ عٍ سَ يِ فّمّ قَرِ، عِ بْرّ سَ عَ مَ.» فٍدٍيٌن تٌ فٍ نَ رَبَدٍ، 21 عَلَتَلَ شَ مَلٍكّ نَشَ عَ يِسُشُوُرِ عِتَلَ، عَ نَشَ عَ دِن سُبٍ نُن تَامِ لّبِنِتَرٍ رَ. نَ كُي تّ نَشَ دّشّ فّمّ مَ، عَ سُبٍ نُن تَامِ لّبِنِتَرٍ بِرِن فَن. نَ شَنبِ عَلَتَلَ شَ مَلٍكّ نَشَ لْي عَ مَ. 22 فٍدٍيٌن تٌ عَ تٌ عَلَتَلَ شَ مَلٍكّ يَتِ نَن عَ رَ، عَ نَشَ عَ قَلَ، «ﭑ مَرِفِ عَلَتَلَ! ﭑ بَرَ عَلَتَلَ شَ مَلٍكّ تٌ، عَ تِشِ ﭑ يَ عِ.» 23 عَلَتَلَ نَشَ عَ مَسٍن عَ بّ، «هَلِ عِ مُ فَاشُ، عِ مُ قَشَمَ. عِ بْحّ شَ سَ.» 24 فٍدٍيٌن نَشَ سّرّشّبَدٍ يَءِلَن عَلَتَلَ بّ مّننِ، عَ قَ عَ شِلِ قَلَ نَ شُن، «عَلَتَلَ شَ بْحّسَ.» هَن تٌ، مّننِ نَ عٌقَرَ، عَبِيٍسَ شَبِلّ نَ دّننَشّ.

25 نَ لْشْي كْي رَ عَلَتَلَ نَشَ عَ مَسٍن فٍدٍيٌن بّ، «عِ بَبَ شَ تُورَ تٌنفٌ، نَشَن بَرَ حّ سٌلٌقٍرٍ سْتْ. عِ شَ عِ بَبَ شَ بَلِ كُيٍ سّرّشّبَدٍ كَنَ، عَ نُن نَ عَسٍرِ وُرِ مَسٌلِشِ، نَشَن تِشِ عَ شُن. 26 نَ دَنفِ شَنبِ، عِ شَ سّرّشّبَدٍ فبّتّ يَءِلَن عِ مَرِفِ عَلَتَلَ بّ يِ يِرٍ مَفَاشُشِ قَرِ. عِ شَ نَ تُورَ بَ سّرّشّ فَن دَاشِ رَ. نَ عَسٍرِ وُرِ مَسٌلِشِ، عِ نَشَن كَنَمَ، نَ شَ قِندِ يٍفٍ رَ نَ سّرّشّ فَنسٍ رَ.»

27 فٍدٍيٌن نَشَ مِشِ قُ تٌنفٌ عَ شَ كٌنيِيٍ يَ مَ، عَ نَ بِرِن نَبَ، عَلَتَلَ نَشَن مَسٍنشِ عَ بّ. عَ نَ رَبَ كْي نَن نَ، بَرِ مَ عَ نُ فَاشُشِ عَ بَبَ شَ مِشِيٍ نُن تَاكَيٍ يَ رَ. 28 تَاكَيٍ تٌ كٍلِ سُبَشّ مَ، عٍ نَشَ عَ تٌ بَلِ كُيٍ سّرّشّبَدٍ رَبِرَشِ، عَسٍرِ وُرِ مَسٌلِشِ نَشَن نُ تِشِ عَ شُن مَ، نَ قَن نَبِرَشِ. عٍ مَن نَشَ تُورَ تٌ نَشَن بَشِ سّرّشّ فَن دَاشِ رَ سّرّشّبَدٍ نّينّ قَرِ. 29 عٍ نَشَ عٍ بٌورٍ مَشْرِن، «ندٍ يِ رَبَشِ؟» عٍ تٌ نَ قٍ قٍن، عٍ قَ عَ قَلَ عٍ بٌورٍ بّ، «يٌوَ سِ شَ دِ فٍدٍيٌن نَن قْشِ عَ رَ.» 30 نَ كُي تَاكَيٍ نَشَ عَ قَلَ يٌوَ سِ بّ، «عِ شَ دِ رَ مِنِ، عَ شَ قَشَ، بَرِ مَ عَ بَرَ بَلِ كُيٍ سّرّشّبَدٍ كَنَ، عَ مَن بَرَ عَسٍرِ وُرِ مَسٌلِشِ رَبِرَ، نَشَن نُ تِشِ عَ شُن.»

31 يٌوَ سِ نَشَ مِشِيٍ يَابِ، نَشٍيٍ نُ تِشِ عَ كَنكٍ، «وٌ تَن نَن بَلِ شُن مَقَلَمَ؟ وٌ تَن نَن عَ رَتَنفَمَ؟ مِشِ يٌ نَشَن بَلِ شُن مَقَلَ، نَ كَنيِ نَن سِنفٍ قَشَمَ بٍيمَنُ كُيٍ شَ عِبَ. شَ عَلَ نَن نَ بَلِ رَ، عَ تَن شَ عَ يّتّ شُن مَقَلَ، بَرِ مَ عٍ عَ تَن نَن شَ سّرّشّبَدٍ رَبِرَشِ.» 32 نَ لْشْي، عٍ نَشَ يٍرُبَالِ شِلِ قَلَ فٍدٍيٌن شُن مَ، عٍ نُ قَ عَ قَلَ، «بَلِ شَ عَ يّتّ شُن مَقَلَ، بَرِ مَ عَ بَرَ عَ شَ سّرّشّبَدٍ رَبِرَ.»

33 مَدِيَنكَيٍ، عَمَلّكِكَيٍ، نُن بْنسْي فبّتّيٍ نَشٍيٍ كٍلِ سٌفٍتٍدٍ، نٍيٍ نَشَ عٍ مَلَن، عٍ قَ يُرُدّن عِفِرِ، عٍ لُ يِسِرٍيلِ فٍيَ بُنيِ. 34 عَلَتَلَ شَشِلِ نَشَ لُ فٍدٍيٌن بّ. عَ نَشَ قٍرِ قٍ، عَ شَ عَبِيٍسٍرِ بْنسْي مَشِلِ عَلَكٌ عٍ بِرِن شَ بِرَ عَ قْشْ رَ. 35 عَ نَشَ شّيرَيٍ شّي مَنَسِ بْشِ مَ، نٍيٍ قَن شَ بِرَ عَ قْشْ رَ. عَ مَن نَشَ شّيرَيٍ شّي عَسٍرِ، سَبُلٌن، نُن نَقَتَلِ بْشِ مَ، مّننِكَيٍ قَن نَشَ كَقُ عَ مَ.

36 فٍدٍيٌن نَشَ عَ قَلَ عَلَتَلَ بّ، «شَ عِ وَ مَ عِسِرَيِلَ رَتَنفَقٍ ﭑ سَابُي رَ، عَلْ عِ عَ مَسٍنشِ كِ نَشّ، عِ شَ يِ رَبَ ﭑ بّ. 37 ﭑ شَ يّشّي كِرِ عِتَلَ لٌنيِ شُن، عَ شَ لُ مّننِ كْي رَ. شَ شِنِ دْشْ يّشّي كِرِ نَن كَنسَن مَ، بْشِ تَن نَبِلِنيِ نَشَ شَرَ، ﭑ قَمَ عَ كٌلٌندٍ نَ تّمُي نّ، عِ تَن نَن عِسِرَيِلَ رَتَنفَمَ ﭑ سَابُي رَ، عَلْ عِ عَ مَسٍنشِ كِ نَشّ.» 38 عَ نَشَ نَ رَبَ نَ كِ. نَ كُيٍ عِبَ، عَ نَشَ كٍلِ سُبَشّ مَ، عَ يّشّي كِرِ بُندُ عَلَكٌ عَ شَ عَ كٌلٌن شَ شِنِ دْشْشِ كِرِ مَ. يٍ، ثْوتِ يَ كٍرٍن نَشَ مِنِ نَ كُي.

39 فٍدٍيٌن مَن نَشَ عَ قَلَ عَلَ بّ، «هَلِ عِ بْحّ مُ تٍ ﭑ شِلِ مَ، ﭑ مَ وْيّن دْنشْي نَن يِ كِ. ﭑ مَن وَشِ سٍيدٍحْشْيَ نَن مَتٌقٍ يِ كِرِ رَ. كِرِ كَنسَن شَ شَرَ، شِنِ شَ بْشِ بِرِن بُندَ.» 40 نَ كْي رَ، عَلَ نَشَ نَ رَبَ نَ كِ. كِرِ كَنسَن نَشَ شَرَ، شِنِ قَ بْشِ بِرِن بُندَ.