1 شِ سٍننِ دَنفِ شَنبِ، عِسَ نَشَ ثِيّرِ، يَكِ، نُن يَكِ شُنيَ يَيَ شَنِن عٍ دٌرٌ مَ فٍيَ عِتٍشِ ندٍ قَرِ. 2 مّننِ عِسَ نَشَ مَسَرَ، عَ نْرْ عٍ يَ شْرِ. عَ يَتَفِ نَشَ يَنبَ عَلْ سٌفٍ، عَ شَ سٌسٍيٍ نَشَ قِيشّ عَلْ نَءِيَلَنيِ. 3 نَ تّمُي، عَننَبِ عٍلِيَ نُن عَننَبِ مُنسَ نَشَ مِنِ قْشِرَبِرّيٍ يَ شْرِ، عٍ نَشَ عٍ تٌ عٍ نُن عِسَ وْيّنقٍ.

4 ثِيّرِ نَشَ عَ قَلَ عِسَ بّ، «مَرِفِ، قٍ قَنيِ نَن عَ رَ مُشُ تٌ نَ بٍ يِ كِ. شَ عِ وَ، ﭑ لِنفِرَ سَشَن يَءِلَنمَ بٍ، كٍرٍن عِ فبٍ، كٍرٍن عَننَبِ مُنسَ فبٍ، كٍرٍن عَننَبِ عٍلِيَ فبٍ.» 5 عَ نُ وْيّنقٍ تّمُي نَشّ، نُشُي يَنبَشِ نَشَ فٌرٌ عٍ شُن نَ، شُي ندٍ قَن نَشَ مِنِ نُشُي كُي، عَ عَ مَسٍن، «ﭑ مَ دِ مَشَنُشِ نَن يِ كِ نَشَن ﭑ كّنّنشِ كِ قَنيِ رَ. وٌ وٌ تُلِ مَتِ عَ رَ.» 6 قْشِرَبِرّيٍ تٌ نَ شُي مّ، عٍ نَشَ فَاشُ كِ قَنيِ، عٍ عٍ يَتَفِ رَقٍلٍن بْشِ مَ. 7 كْنْ عِسَ نَشَ عَ مَسٌ عٍ رَ، عَ عَ بّلّشّ سَ عٍ مَ، عَ عَ قَلَ، «وٌ كٍلِ. وٌ نَشَ فَاشُ.» 8 عٍ تٌ عٍ يَ رَكٍلِ، عٍ مُ مِشِ يٌ تٌ قٌ عِسَ.

9 عٍ تٌ نُ نَ فٌرٌقٍ فٍيَ قَرِ، عِسَ نَشَ عَ مَتِنتِن عٍ رَ، «وٌ قٍ نَشَن تٌشِ، وٌ نَشَ عَ قَلَ مِشِ يٌ بّ، هَن بٍيمَنُن عَدَ مَ شَ دِ شَ كٍلِ قَشّ مَ.» 10 عِسَ قْشِرَبِرّيٍ نَشَ عَ مَشْرِن، «مُنقٍ رَ سّرِيّ كَرَ مْشْيٍ عَ قَلَمَ عَ قٌ عَننَبِ عٍلِيَ نَن سِنفٍ شَ قَ؟» 11 عَ نَشَ عٍ يَابِ، «نْندِ نَن عَ رَ. عَننَبِ عٍلِيَ نَن سِنفٍ قَمَ يَتِ، عَ قٍ بِرِن يَءِلَن. 12 كْنْ ﭑ شَ عَ قَلَ وٌ بّ، عَننَبِ عٍلِيَ حَن بَرَ قَ، كْنْ عٍ مُ عَ كٌلٌنشِ، عٍ بَرَ عٍ وَشْنقٍ بِرِن نِيَ عَ رَ. عٍ مَن قَقٍ عَدَ مَ شَ دِ تْورْدٍ نَ كِ نّ.» 13 نَ كُي، عِسَ قْشِرَبِرّيٍ نَشَ عَ كٌلٌن عَ عَ نُ نَ يَيَ شُنشَ نَن مَ قٍ قَلَقٍ عٍ بّ.

14 عٍ تٌ حَمَ يِرٍ لِ، شّمّ ندٍ نَشَ قَ عِسَ شْن، عَ عَ شِنبِ سِن عَ بُن مَ، 15 عَ عَ قَلَ، «مَرِفِ، كِنِكِنِ ﭑ مَ دِ مَ، شَشِلِ قُرٍ عَ حَشَنكَتَشِ كِ قَنيِ. عَ لُمَ بِرَ رَ تّ شْورَ، عَ نُن يٍ شْورَ. عَ نَ رَبَمَ هَن. 16 ﭑ بَرَ قَ عَ رَ عِ قْشِرَبِرّيٍ شْن، كْنْ عٍ مُ نْشِ عَ رَيَلَندٍ.» 17 عِسَ نَشَ عٍ يَابِ، «وٌ تَن بْنسْي دَنشَنِيَتَرٍ، وٌ كٌبِ! ﭑ شَ لُ وٌ سّيتِ مَ هَن مُن تّمُي؟ ﭑ شَ تِ وٌ بُن مَ هَن مُن لْشْي؟ وٌ قَ نَ دِ رَ ﭑ شْن.» 18 عِسَ نَشَ حِننّ يَمَرِ، حِننّ نَشَ فبِلٍن دِ مّدِ قْشْ رَ، دِ مّدِ نَشَ يَلَن كٍرٍن نَ.

19 عِسَ قْشِرَبِرّيٍ نَشَ عٍ مَسٌ عِسَ رَ، عٍ عَ مَشْرِن عٍ دٌرٌ مَ، «مُنقٍ رَ مُشُ تَن مُ نْ نَ حِننّ كٍرِدٍ؟» 20 عِسَ نَشَ عٍ يَابِ، «وٌ شَ دَنشَنِيَ نَن شُرُن. ﭑ شَ نْندِ قَلَ وٌ بّ، شَ دَنشَنِيَ نَ وٌ بّ، هَلِ عَ شُرُن عَلْ كٌندٍ شْرِ، وٌ نَ عَ قَلَ يِ فٍيَ بّ، ‹كٍلِ بٍ، عِ عِ مَسِفَ مّننِ،› عَ مَسِفَمَ نّ. قٍقٍ مُ نَ وٌ مُ نْمَ نَشَن نَبَدٍ. 21 كْنْ يِ حِننّ مْولِ تَن مُ كٍرِ مَ قٌ عَلَ مَشَندِ نُن سُنيِ سَابُي رَ.»

22 عِسَ قْشِرَبِرّيٍ تٌ مَلَن فَلِلٍ، عِسَ نَشَ عَ قَلَ عٍ بّ، «عَدَ مَ شَ دِ سَمَ نّ مِشِيٍ بّلّشّ، 23 عٍ عَ قَشَ. عَ شَ قَشّ شِ سَشَن ندٍ مَ، عَ مَن كٍلِمَ نّ قَشّ مَ.» عَ شَ وْيّنيِ نَشَ عَ قْشِرَبِرّيٍ نِمِسَ كِ قَنيِ.

24 عِسَ نُن عَ قْشِرَبِرّيٍ تٌ سٌ كَثّرّنَمُ، هْرْ مْبَنشِ دُوتِ مَشِلِيٍ نَشَ ثِيّرِ مَشْرِن، «ثٍ، عِ كَرَ مْشْ مُ هْرْ مْبَنشِ دُوتِ قِمَ؟» 25 ثِيّرِ نَشَ عٍ يَابِ، «عِيٌ، عَ عَ قِمَ.» ثِيّرِ تٌ سٌ بَنشِ، عِسَ نَن سِنفٍ وْيّن عَ بّ، «ثِيّرِ، عِ عَ تٌشِ دِ؟ دُنِحَ مَنفّيٍ دُوتِ مَشِلِمَ ندٍ مَ، عٍ شَ دِيٍ كَ مِشِ فبّتّيٍ؟» 26 ثِيّرِ نَشَ عَ يَابِ، «مِشِ فبّتّيٍ.» عِسَ قَن نَشَ عَ مَسٍن، «نَ كُي، مَنفّ شَ دِيٍ تَن مُ دُوتِ قِمَ. 27 كْنْ عَلَكٌ وٌن نَشَ يِ مِشِيٍ رَشْنْ، عِ شَ سِفَ بَا دّ رَ، عِ كْنيِ وٌلِ. عِ نَ يّشّ نَشَن سِنفٍ سُشُ، عَ رَتٍ، عِ عَ دّ رَبِ. عِ كْبِرِ كٌلٍ تٌمَ نّ عَ دّ كُي. عِ شَ نَ سٌ دُوتِ مَشِلِيٍ يِ رَ، عَ شَ قِندِ وٌن قِرِن مَ دُوتِ رَ.»